Napapanahon na Kingdom News na Ididistribuwir sa Bilog na Kinaban
1 Sa Domingo, Abril 23, sarong espesyal na pahayag-publiko an itatao dapit sa nakakapukaw nin atension na temang “Harani Na an Katapusan kan Falsong Relihiyon.” Sa pagtatapos kan pagtiripon sa aldaw na iyan, sarong apat na pahinang Kingdom News an iluluwas. An napapanahon na mensahe na yaon dian ididistribuwir sa bilog na kinaban durante kan tolong semanang peryodo poon sa Abril 24 sagkod sa Mayo 14.
2 Sa gabos na parte kan kinaban, an mga tawo nariribaraw asin dinadamat nin mga problema. An Kingdom News siertong magigin interesante sa mga nahahadit dapit sa nangyayari, mantang gigiyahan sinda kaiyan pasiring sa Tataramon nin Dios bilang an dai nasasalang gikanan nin giya para sa tawo. (Sal. 119:105) Kita gabos nag-aantisipar na makakua nin kopya kan Kingdom News kun iyan iluwas na sa Abril 23. Mientras tanto, dakol an dapat gibohon bilang pag-andam para sa sigidong tolong semanang kampanya na ini.
3 Pakosogon an Gabos na Magkaigwa nin Maigot na Pakikikabtang: Siisay an puwedeng makikabtang sa gibohon? Sierto nanggad na an gabos na parahayag na magigin galaga na gibohon iyan! Kumusta man an mga estudyante sa Biblia na regular na nag-aatender sa mga pagtiripon sa kongregasyon? May mga haloy-haloy nang nakiasosyar sa sato asin padagos na nag-ooswag. Kun ikinaoyon na ninda an saindang buhay sa mga prinsipyo sa Kasuratan, kuwalipikado daw sindang ibilang na mga parabalangibog kan Kahadean? An parahayag na nagkokondukta kan pag-adal sa Biblia puwedeng ipakipag-olay sa estudyante an bagay na iyan, asin kun sia nagmamawot na makikabtang sa paglilingkod sa langtad, duwang magurang an marepaso sa saiya kan materyal sa pahina 98 asin 99 kan librong Organized to Accomplish Our Ministry. Maninigo ining gibohon sa pinakaamay na mapupuwede tanganing an mga makukuwalipikar bilang dai pa bautisadong mga parahayag puwedeng magkaigwa nin lubos na pakikikabtang sa kampanya. An mga estudyante sa Biblia na bako pang kuwalipikado bilang dai pa bautisadong mga parahayag puwede pa man giraray na dagkahon na ihiras an tract sa mga kamidbid o miembro nin pamilya.—Helingon man an The Watchtower, Nobyembre, 15, 1988, pahina 17, parapo 8.
4 Bakong depisil an gibohon na ini; an gabos puwedeng makikabtang. Sa saindang semanal na pampamilyang pag-adal, puwedeng iiba kan mga magurang an mga pag-ensayo sa tract tanganing an gabos na miembro nin pamilya magin andam na iatubang an Kingdom News sa harong-harong. An simpleng pag-atubang parateng iyo an pinakamarahay. Pakatapos nin halipot na introduksion, ialok an Kingdom News sa kagharong, asin dagkahon sia na basahon iyan. Kun nagpapaheling nin interes an mga kagharong, gumibo nin rekord tanganing makabalik kamo sa pagkultibar kan interes. (1 Cor. 3:6, 7) An liyabe sa kapangganahan iyo an pagkaigwa nin simple, inandam na marhay na pag-atubang.
5 “Dakol an gigibohon” durante kan Abril asin Mayo. Sa masunod na bulan na luwas kan An Satong Ministeryo sa Kahadean, dugang pang impormasyon an itatao sa suplemento na may titulong “Dakol an Gigibohon sa Gibohon kan Kagurangnan.”—1 Cor. 15:58.