Magin “Maigot sa Marahay na mga Gibo“ Ngonyan na Abril!
1 Kan Abril asin Mayo, 1995, itinao an daing kaagid na pagpatotoo kan an minilyon na kopya kan Kingdom News Num. 34 iwaras sa bilog na kinaban. An mga parahayag sa kongregasyon asin siring man an mga payunir maigot na nakikabtang sa nakapupukaw na gibohon na ini. Kabale daw kamo sa sainda? Kun iyo, daing duwa-duwa na naogma kamong gayo sa pakikikabtang sa pambihirang kampanyang iyan. Ngonyan tibaad naghohorophorop kamo, Anong ‘marahay na gibo’ an nakatagama para sa sato ngonyan na taon?—Tito 2:14.
2 Ngonyan na Abril asin sa pagpopoon kan Mayo, magkakaigwa kita nin kaogmahan sa pagwaras nin sarong espesyal na edisyon kan magasin na Awake!, an Abril 22, 1996 na luwas, na nagtatampok kan “When Wars Will Be No More.” Mantang an temang ini makaaakit sa kadakol-dakol na kagharong, hihingoahon niato na tawan nin pinakamahiwas na mapupuedeng pagwaras an magasin. Huli sa kahalagahan kan impormasyon na yaon dian, an luwas na ini kan Awake! maninigong itampok ngonyan na Abril asin sagkod sa Mayo sagkod na maubos an mga suplay.
3 An Satong Pasohan—Pakikikabtang kan Gabos na Parahayag: Tunay na nakaparirigon sa boot kun an gabos na parahayag sa nasyon na ini makapakikabtang sa paghuhulit ngonyan na Abril. Huling nakaselebrar dai pa sana nahahaloy kan Memorial kan kagadanan ni Cristo, seguradong boot niatong ipaheling an satong apresasyon sa karahayan nin Dios paagi sa pagdolot nin direktang “atang nin pag-omaw” sa ministeryo sa langtad.—Heb. 13:15.
4 Maninigong gumibo nin mahigos na paghihingoa na mansayon an mga pangangaipo nin lambang miembro kan kongregasyon tangani na an gabos magkaigwa nin maigot na pakikikabtang sa ministeryo ngonyan na Abril. (Roma 15:1) An mga nagkokondukta kan pag-adal sa libro maninigong lubos na nakaaaram kan mga kamugtakan kan mga nasa saindang grupo asin magtao nin praktikal na tabang kun kaipuhan. Igwa daw nin nangangaipo nin transportasyon? Siisay an makatatao kaiyan? An iba daw masosopgon o sobra an pag-intindi sa sadiri? Puede daw na ibanan sinda nin mas eksperyensiadong mga parahayag? Kumusta man idtong mga nasa sainda sanang harong o idtong mga naghehelang? Sinda daw makapagpapatotoo paagi sa telepono, sa surat, o sa iba pang mabungang aktibidad?
5 An iba na nagin inaktibo nag-aako na nin regular na espirituwal na pagparigon sa boot, asin puede sindang motibaron na makikabtang giraray sa paghuhulit. An kampanya sa espesyal na Awake! magtatao sa sainda nin ekselenteng oportunidad na magin aktibo liwat.
6 Patoodon an Saradit na Aki na Makikabtang: An dakol na aki kan Mga Saksi ni Jehova nakaibaiba na kan saindang mga magurang sa harong-harong sa laog nin dakol nang taon, maski ngani dai pa sinda naglilingkod bilang dai pa bautisadong mga parahayag. Panahon na daw ngonyan na sinda pumoon? Andam na daw sinda na magkaigwa nin makatuyohan na pakikikabtang sa pagharongharong? An mga payo kan pamilya maninigong gumamit nin oras durante kan pampamilyang pag-adal sa Biblia tangani na tabangan an saindang kualipikadong mga aki na mag-andam nin pag-atubang na ibinagay sa edad asin abilidad kan kada saro. An mga mas matua puedeng pumili nin nakapupukaw sa isip na hapot na paagi kaiyan mapupukaw an interes kan kagharong dangan itokdo an simbag sa magasin. An mas ngohod na mga aki puedeng magtao nin epektibong pagpatotoo paagi sa pira sanang tataramon. Halimbawa, puede nindang parigonon an boot kan kagharong na “basahon an espesyal na magasin na iinaalok sa bilog na kinaban ngonyan na bulan.” Bilang kabtang kan pag-andam kan saindong pamilya, seguradohon na iiba an mga suhestion sa pakapanggana sa lakop na mga pagkontra. Makakukua kamo nin nagkapirang marahay na ideya sa librong Reasoning. Kun nagkakakan asin sa iba pang angay na okasyon, parigonon an boot kan mga miembro nin pamilya na isaysay an mga eksperyensia ninda sa paglilingkod sa langtad.
7 An Kualipikadong mga Estudyante sa Biblia Ginigibo an Ginibo ni Jesus: Si Jesus dai linimitaran an saiyang pagtotokdo sa pagtao nin instruksion manongod sa mga doktrina. Inibanan nia sa ministeryo an saiyang mga estudyante asin tinokdoan sinda kun paano maghulit. (Luc. 8:1; 10:1-11) Ano an situwasyon ngonyan? Labing 95,000 na pag-adal sa Biblia an kinokonduktahan sa Pilipinas. Daing duwa-duwa, paagi sa angay na pagparigon sa boot dakol sa mga estudyanteng ini an makagigibo kan masunod na tangga sa pagpatood sa sainda asin makukualipikar na maglingkod bilang dai pa bautisadong mga parahayag ngonyan na Abril.
8 Kun nagkokondukta kamo nin pag-adal sa Biblia, konsiderara an mga hapot na ini: Nag-ooswag daw an estudyante, na kadungan kan saiyang edad asin abilidad? Pinonan na daw niang ihiras sa iba sa impormal na paagi an saiyang pagtubod? Isinusulog na daw nia “an bagong pag-katawo”? (Col. 3:10) Naaabot na daw nia an mga kualipikasyon para sa dai pa bautisadong mga parahayag, na sinumaryo sa pahina 98 asin 99 kan librong Our Ministry? Kun nagtutubod kamo na kualipikado na sia, taano ta dai ipakipag-olay sa saiya an bagay? An ibang estudyante nangangaipo sana nin direktang pag-agda na makikabtang sa gibohon. Siempre, kun gusto kan estudyante, kaipuhan ngunang iareglo sa dating paagi kan nangengenot na paraataman an pag-orolay kaiba kan duwa sa kamagurangan. Sa ibong na kampi, tibaad igwa nin nakapopogol sa estudyante. Tibaad puede kamong ibanan kan saro sa kamagurangan sa pag-adal sa Biblia asin hapoton an estudyante manongod sa saiyang mga saboot dapit sa katotoohan. Pakahinanyoga sa sasabihon kan estudyante, an magurang sa kongregasyon puedeng magtao nin praktikal na mga suhestion, kaiba an Makakasuratan na tabang.
9 ‘Tuboson an Panahon’ na Mag-auxillary Payunir: Kada taon sa panahon nin Memorial, an pasasalamat sa pantubos nagpapahiro sa rinibo na ‘tuboson’ an panahon na mag-auxiliary payunir. (Efe. 5:15-17) Maski ngani kaipuhan an nagkapirang pagsasakripisyo, dakula an mga balos. An kahangahangang bilang nin mga hoben inaaprobetsaran an bakasyon sa eskuelahan sa pag-auxiliary payunir. An mga adulto na nagtatrabaho nin bilog na panahon lubos na inaaprobetsaran an mga banggi asin mga Sabado patin Domingo sa iyo man sanang aktibidad. Sa siring, an bilog na mga pamilya kinua an oportunidad na iribang mag-auxiliary payunir! Sa ibang kongregasyon an kadaklan sa kamagurangan asin ministeryal na lingkod saka an saindang mga agom nagpalista bilang auxiliary payunir. Napahiro kan saindang maigot na pangengenot, inarog kan iba an saindang halimbawa, kaya an dakol sa kongregasyon naglingkod bilang mga auxiliary payunir kan Abril.
10 Baga man kaya nindong mag-auxiliary payunir o dai, humanap nin mga paagi na madugangan an saindong paglilingkod sa langtad ngonyan na Abril. Magbugtak nin personal na pasohan para sa saindong sadiri, saro na mangangaipo nin paghihingoa na maabot alagad kayang aboton. An saindong pagmawot na ‘gamiton asin lubos na pagamit’ sa paglilingkod ki Jehova, sono sa saindong personal na mga kamugtakan, magkakamit kan saiyang bendisyon.—2 Cor. 12:15.
11 Mga Pagtiripon Bago Maglingkod sa Langtad: An mga pagtiripon bago maglingkod sa langtad maninigong iareglo aroaldaw sa kampanya kan Awake!, sa panahon na matogot sa amay na pagpoon sa ministeryo. Maninigo man na gibohon an probisyon para sa pagpatotoo sa banggi. An kadaklan na parahayag makikikabtang sa paglilingkod sa langtad sa mga Sabado asin Domingo, kaya an mga kongregasyon maninigong mag-iskedyul nin mga pagtiripon bago maglingkod sa langtad sa mga Sabado, pareho sa aga asin hapon, sa bilog na espesyal na pagwaras kan Awake!
12 Maninigong siertohon kan mga nangengenot sa mga pagtiripon bago maglingkod sa langtad na igwa nin dakol na teritoryong nakaandam. An teritoryo na haloy nang dai nagigibo maninigong enot na kobrehan. Kun nakobrehan na kan saindong kongregasyon an gabos na teritoryo kaiyan asin kaipuhan nin tabang nin sarong haraning kongregasyon, puedeng makikomunikar sa sainda an kamagurangan asin alokon na tabangan sinda na makobrehan an saindang teritoryo durante kan kampanya. Daing duwa-duwa na aapresyaron ninda an tabang asin maoogma an mga parahayag saka payunir sa saindong kongregasyon na makiiba sa laen na teritoryo. Siempre ini maninigo sanang gibohon kun itinotogot kan kongregasyon na nagkakapot kan teritoryo.
13 Pirang Magasin an Ipapasakamot Nindo? An hapot na iyan sisimbagon kan kada indibiduwal. Sa pagdeterminar kun pirang magasin an ikapapasakamot nindo durante kan kampanya, konsideraron an klase kan teritoryo na gigibohon nindo, an saindong edad, an saindong salud, an panahon na ikadudusay nindo sa gibohon, asin iba pang mga bagay. Minsan siring, mangnoha an itinaong pagirumdom sa Enero 1, 1994 luwas kan An Torrengbantayan: “Bilang suhestion, an mga parahayag puedeng magkaigwa nin pasohan na, halimbawa, 10 magasin kada bulan, depende sa saindang mga kamugtakan; an mga payunir puedeng pag-aaboton an 90.” An kaagid daw na pasohan magigin realistiko sa saindong kamugtakan? Nagpedido na daw kamo nin ekstrang mga kopya kan Abri1 22 na Awake!? siyasaton tangani na masierto na supisyente an saindong pedido. Kun madiskobre kan kongregasyon na an espesyal na pedido kaiyan nin dagdag na mga magastn dai magigin supisyente, puede sindang magpadara nin ikaduwang pedido sa sangang opisina asin pagmamaigotan kan Sosyedad na mahipnoan an pedido sagkod na igwa pa kami nin suplay.
14 Kamagurangan—Kaipuhan an Maingat na Pagplano: An lokal na mga areglo para sa kampanya sa Abril didirehiran kan grupo nin kamagurangan. Maninigo nindang siertohon na, kun mapupuede, an gabos na teritoryo kan kongregasyon magibo na dara an espesyal na luwas kan Awake! Maninigong magtao nin maingat na atension sa paggibo sa arin man na komersial na teritoryo na iinasignar sa kongregasyon. An mga naggigibo kaiyan maninigong andam na marhay asin malinig an gubing. Dai kaipuhan an detalyadong pag-atubang. Kun minadolok sa sarong negosyante, puede nindong sabihon na dai nindo parateng nanonompongan sa harong an mga negosyante, kaya minasongko kamo sa saiyang lugar nin negosyo tangani na iatubang an sarong artikulo na seguradong magigin interesante para sa saiya. Dangan puede nindong ihiras sa halipot an sarong espesipikong punto sa magasin. An pagpatotoo sa tinampo na dara an mga magasin maninigo man na organisaron nin tama sa laog kan teritoryo kan kongregasyon. An pinakaepektibong paagi na makikabtang sa paggibo sa tinampo iyo na magsadiring boot asin dolokon an mga minaagi, imbes na maghalat sa sainda na dumolok sa saindo. Mantang pagmamasdan kamo kan publiko, maninigo kamong magin mapag-isip sa pagkaigwa nin kagalanggalang na itsura. Tibaad igwa nin iba pang lugar sa saindong teritoryo na puedeng gibohon durante kan kampanya, siring baga kan mga aeropuerto, ospital, paradahan, asin parke. Maninigong aramon kan grupo nin kamagurangan kun anong angay na mga areglo an puedeng gibohon para sa pagpatotoo sa mga lugar na ini sa teritoryo kan saindong kongregasyon.
15 Si Jehova paragibo na mayong kapagalan. (Juan 5:17) Linalang nia an kalangitan asin an daga siring man an mga tinanom asin hayop; alagad padagos siang naggibo sagkod na linalang nia an saiyang pinakamagayon na naginibo digdi sa daga—an tawo. An bagay na igwa kita nin buhay sarong direktang resulta nin pagigin andam nin Dios na gumibo. Bilang “mga paraarog sa Dios,” maninigo kitang pahiroon kan satong pagkamoot sa saiya na magin “maigot sa marahay na mga gibo.” (Efe. 5:1; Tito 2:14) Huling si Jehova an angay na mag-ako kan satong pinakamarahay na paghihingoa, asin huling an pagmawot na magkamit nin mga bunga karakteristiko nin saro na maigot, maninigo kitang magin interesado sa paggibo nin de kualidad na gibohon sa ministeryo. Siempre, innapresyar ni Jehova an ano man na pagsasakripisyo niato para sa saiya, asin an satong gibohon nungkang mayong kamanungdanan. (1 Cor. 15:58) Kaya, paagi sa mapagpasalamalat na puso, magmahigos kita sa maigot na aktibidad ngonyan na Abril, na kompiado sa pag-oyon asin bendisyon ni Jehova patin sa mayaman na kapangganahan!