“Dakol an Gigibohon sa Gibohon kan Kagurangnan”
1 Sierto nanggad na igwa kitang sibot na iskedyul nin teokratikong mga aktibidad ngonyan na Abril asin Mayo! Sa Abril 14 seselebraron niato an Memorial kan kagadanan ni Cristo. Sagkod sa pinakadakol na tawong mapupuwede an maninigong pakosogon na magin presente para sa importanteng okasyon na iyan: mga katrabaho, daing pagtubod na paryentes, kaklase, bagong interesado, asin mga estudyante sa Biblia. Ilista an mga pinaplano nindong imbitaran tanganing mayong malingawan.
2 Sa minasunod na semana pakokosogon ta an gabos na nag-atender sa Memorial na magdangog kan espesyal na pahayag-publiko sa Abril 23, manongod sa temang “Harani Na an Katapusan kan Falsong Relihiyon.” Linalaoman na an dakol na interesado na makakadangog kan prangkang mensaheng ini bobooton na makiasosyar nin regular sa kongregasyon, bako sanang sa espesyal na mga okasyon.
3 Espesyal na Kingdom News na Iluluwas: An tampok na kabtang kan pagtiripon sa Abril 23 iyo an pagluwas kan sarong napapanahon na apat na pahinang Kingdom News na iwawaras nin mahiwas sagkod sa Mayo 14. Dai daw kamo minaoyon na “dakol an gigibohon sa gibohon kan Kagurangnan” durante kan panahon na ini nin Memorial?—1 Cor. 15:58.
4 Ipapadara an suplay kan Kingdom News sa kada kongregasyon. An mga kinahon na Kingdom News maninigong sarayon sa sarong seguradong lugar asin dai maninigong buksan sagkod na matapos an programa sa Abril 23. Sa panahon na iyan iluluwas an Kingdom News sa mga tugang asin sa publiko. Pakatapos kan mga pagtiripon sa kongregasyon, pansirkitong asamblea, o mga programa sa espesyal na aldaw nin asamblea sa Abril 23, an mga nag-atender makakaresibi kada saro nin sarong kopya tanganing magin pamilyar sinda dian asin masangkapan para sa pagwaras kaiyan.
5 Magkakaigwa nin Dakol na Gigibohon an Kamagurangan: Amay pa sa bulan na ini an grupo nin kamagurangan maninigong magmiting tanganing pag-olayan an mga detalye kan espesyal na kampanya. Maninigong magmaigot an mga kongregasyon na taposon an gabos na teritoryong iinasignar sainda. Bago matapos an kampanya, gumibo nin espesyal na paghihingoa na gibohon an mga teritoryo na dai pa nahulitan kan nakalihis na anom na bulan. Huli sa importansia kan gibohon na iyan, daing duwa-duwa na dakol an mapalista bilang auxiliary payunir. Dakol na estudyante sa Biblia an maiba man sa sato bilang bagong dai pa bautisadong mga parahayag. Magkakaigwa nanggad kita nin maogmahon na panahon mantang nagpapagal kitang iriba sa gibohon kan Kagurangnan!
6 An mga nangengenot sa Pag-adal sa Libro kan Kongregasyon maninigong gumibo nin depinidong mga areglo para sa pangrupong pagluwas sa tahaw kan semana asin sa mga Sabado asin Domingo. Dagdag pa, maninigong iiskedyul an pagpapatotoo sa banggi kisuerra sarong beses sa sarong semana durante kan kampanya.
7 An mga pagtiripon para sa paglilingkod sa langtad maninigong iiskedyul tanganing an mga parahayag asin payunir makapoon nin amay sa ministeryo kada aldaw. Maninigong halipot sana an mga pagtiripon na ini. An kada saro maninigong magtampok nin sarong simpleng pag-atubang kan Kingdom News. Maninigo man na an mga parahayag magdara nin bagong mga luwas kan magasin para ikapasakamot kun may ipinaheheling na interes. Puwedeng iiba sa mga pagtiripon para sa paglilingkod sa langtad sa hapon an saro o duwang suhestion para sa mga pagdalaw liwat sa mga nag-ako kan Kingdom News. Minsan siring, may mga parahayag na tibaad mas gustong magwaras kapwa sa aga asin hapon. Sa katuyohan na iyan, bobooton kan paraataman sa paglilingkod na siertohon na igwa nin bastanteng teritoryo. An ngaran asin adres kan gabos na nagpapaheling nin interes maninigong isurat sa house-to-house record.
8 Kun tinatabangan nin sarong kongregasyon an saro pa na matapos an teritoryo kaiyan, an mga ngaran asin adres kan interesadong mga tawo maninigong itao sa kongregasyon na nagkakapot kan teritoryo.
9 Mga magurang, an saindo daw na mga aki nag-ooswag pasiring sa pagigin dai pa bautisadong mga parahayag? Naobserbaran na sa nagkapirang kongregasyon, may mga aki na nagkapirang taon nang minaiba sa saindang nagdusay na mga magurang sa ministeryo, asin nag-ooswag na marhay an mga aki, minsan ngani bako pa sindang mga parahayag. Kaipuhan na horophoropon kan mga magurang kun baga an saindang mga aki talagang kuwalipikado para sa pribilehiyong ini. Duwa sa mga magurang an puwedeng pag-olayan an gabos na bagay kaiba kan payo kan pamilya asin determinaran kun baga an aki puwedeng ibilang na dai pa bautisadong parahayag.—om p. 99-100.
10 Igwa daw nin parahayag sa teritoryo kan saindong kongregasyon na bako nang aktibo sa pagdolot ki Jehova nin atang nin pag-omaw? (Heb. 13:15) May mga inaktibo na tibaad nadaog nin pagkadisganar o nin mga kahaditan sa buhay, dawa ngani padagos na nagkukuyog sa moral na mga pamantayan sa Biblia. An makikatood na pagsongko kan saro sa kamagurangan tibaad makapahiro sa sainda na bumalik sa regular na pakikiasosyar sa kongregasyon asin, sa angay na panahon, sa pag-iba liwat sa ministeryo.
11 An Gabos Puwedeng Makikabtang sa Nakaoogmang Gibohon na lni: An iba daw sa saindo mga aki o tin-edyer nadedepisilan na makikabtang sa ministeryo sa harong-harong? Kumusta man kamong mga bagohan na an eksperyensia sa paghuhulit limitadong marhay? Manonompongan nindo an espesyal na gibohon na ini sa Kingdom News na pinakanakaoogma! Simple sanang pag-atubang an kaipuhan.
Puwede kamong magsabi nin siring kaini:
◼ “Ngonyan na bulan iwinawaras mi an importanteng mensahe sa 232 na kadagaan sa bilog na kinaban. Importante an mensahe huli ta nagtatao ini sa sato nin marigon na mga dahelan na maniwala na igwa nin solusyon sa mga problema na inaatubang niato ngonyan. Boot ming magkaigwa kamo nin personal nindong kopya.”
O puwede nindong probaran ini:
◼ “Ngonyan na bulan haros limang milyon na boluntaryo an nagwawaras nin importanteng mensahe sa dakol na lenguahe. Inandam iyan para sa mga tawo na boot na maheling an katapusan kan mga problema na inaatubang niato gabos ngonyan. Ini an saindong personal na kopya.”
An simpleng pag-atubang na ini tibaad angay saindo:
◼ “Dinadagka mi an gabos na basahon an importanteng mensaheng ini na may titulong [basahon an titulo kan Kingdom News.] Mangnoha an sinasabi kaini digdi sa pahina 2 manongod sa nagdadakol na problema nin . . . [basahon an piniling mga tataramon gikan sa Kingdom News]. Sierto niamo na maoogma kamo sa pagbasa kan iba pa sa napapanahon na mensaheng ini. Ini an saindong kopya.”
12 Magpaheling nin personal na interes sa kada saro na nag-aako kan Kingdom News. Boot niatong siertohon na an gabos na nagpapaheling nin interes matawan nin personal na kopya. Kun mayo ni saro sa harong, isurat sa saindong house-to-house record tanganing makabalik kamo sa dai mahaloy sa pag-alok kan Kingdom News sa kagharong. An mga tract na ini na Kingdom News puwedeng gamiton sa pagpapatotoo sa tinampo kun an saro nagpapaheling nin interes, alagad dai iyan maninigong basta na sana ipanao na garo baga iyan mga handbill. Imbes, dolokon an mga nag-aaragi, asin ipaliwanag an importansia kan mensahe na itinatampok. Gamiton an Kingdom News sa impormal na pagpapatotoo, mantang nagbibiyahe, o kun nagpapatotoo sa mga kapwa empleyado durante kan saindong pagkakan sa odto. An mga naghehelang o tibaad may namamatean puwedeng ialok iyan sa mga bisita, sa mga doktor asin nars, sa mga ahente, asin sa iba pa na minaduman sa saindang harong.
13 Pirang pagdalaw liwat an gigibohon nindo durante kan kampanya? Daing duwa-duwa na dakolon, huling an gabos na nagpaheling nin interes sa Kingdom News maninigong dalawon liwat. Sa enot na pagsongko, pinakamarahay na itampok nin solo an Kingdom News. Dangan, sa pagbalik nindo, magkomento nin dikit dapit sa pagigin napapanahon kan mensahe sa Kingdom News. Magdangog nin maingat mantang ipinapahayag kan kagharong an saiyang opinyon sa saiyang nabasa. Tatabangan kamo kan saiyang mga komento na maaraman kun ano an iaalok sa pinakabagong mga magasin asin tibaad kun paano maandam nin orog pang pag-orolay. Kun marahay an paghimate sa saindong pagdalaw liwat, probaran na makapoon nin pag-adal sa Biblia.—1 Cor. 3:6, 7.
14 “An Saindong Pagpapagal Bakong Daing Kapakanan”: Magigin daw kapakipakinabang an gabos na gibohon na ini? Inasegurar ni Pablo an mga taga-Corinto: “An saindong pagpapagal bakong daing kapakanan dian sa Kagurangnan.” (1 Cor. 15:58) Sa laog nin dakol na taon, an satong mga paghihingoa na iwaras an Kingdom News binendisyonan na gayo. An sarong mag-agom na buminalyo sa bakanteng apartment nakanompong nin daan na kopya kan Kingdom News sa sarong sulong-sulong. Iyan sana an nawalat sa bilog na apartment. Pakabasa kaiyan, kinontak ninda an lokal na kongregasyon asin naghagad nin pag-adal sa Biblia. Nagpoon sindang umatender sa gabos na pagtiripon asin sa huri nagpahayag nin kamawotan na magpabautismo. Tibaad an sarong kopya na iwinalat nindo magresulta nin kapareho kaiyan!
15 Dakulaon an gibohon na natatagama sa sato. An satong pasohan iyo na an kada kongregasyon matapos an asignadong teritoryo kaiyan pag-abot kan Mayo 14 o sa katapusan kan bulan kun kinakaipuhan na dagdagan an panahon para sa pagwaras kan Kingdom News. Ipinadara an suplay tanganing, sa mga kongregasyon sa siudad o sa mga mahiwas an teritoryo, an kada regular payunir makakaresibi nin mga 250 kopya kan Kingdom News asin an kada parahayag sa kongregasyon makakakua nin mga 50 kopya. An mga kongregasyon na mas saradit an teritoryo makakaresibi nin mga kabanga kan nasa enotan na bilang. Sisingilon sa kuwenta kan kongregasyon an kantidad na 20 sentimos para sa kada kopya kan Kingdom News, kaya an mga makua kan saindang suplay bobooton na magkontribuwir kan kantidad na ini tanganing mabayadan an mga gastos. Kun huli sa pagkaigwa nin mahiwas na iinasignar na teritoryo may mga kongregasyon na dai natatapos an saindang teritoryo pag-abot kan kabangaan nin Mayo asin igwa pang makukuang mga kopya, magigin praktikal na imbitaran an haraning mga kongregasyon tanganing makatabang. Sa ibang kongregasyon, puwedeng mahipnoan an pangangaipo sa lokal kun dadagdagan nin mga parahayag an saindang aktibidad paagi sa pagpalista bilang auxiliary payunir o paagi sa pagmiministeryo nin mas parate.
16 An bilog na kalag na debosyon ki Jehova kaipuhan kun boot niatong maotob an satong gibohon. (Col. 3:23) Kalabot an mga buhay. Dai mahihimo kan mga tawo na ignorohon an kahulogan kan mga kamugtakan sa kinaban ngonyan. Nauubos na an panahon. Kaipuhan nindang atubangon an katotoohan na an tawo mayo kan solusyon sa mga problema sa kinaban. Solamente an Dios an may solusyon. An mga nagmamawot na makamtan an bendisyon nin Dios kaipuhan na desididong humiro, na dai nag-aatraso, kaoyon sa mga kahagadan nia.
17 Pakatapos kan espesyal na kampanyang ini sa Mayo 14, magluluwayluway daw kita sa satong aktibidad? Dai! Magigin sibot kita kaoyon sa ipinasabong na sadol ni Pablo.