Espesyal na Kampanya Oktubre 16–Nobyembre 12!
1 “An Katapusan kan Falsong Relihion Harani Na!” Iyan an titulo kan Kingdom News Num. 37, na iwawaras sa bilog na kinaban poon sa sunod na bulan. Durante kan enot na kabangaan nin Oktubre, iaalok niato an mga magasin na Torrengbantayan asin Awake! Poon Lunes, Oktubre 16, sagkod Domingo, Nobyembre 12, makikikabtang kita sa sarong sigidong pagwaras kan Kingdom News Num. 37. Sa mga katapusan kan semana durante kan kampanya, iaalok niato iyan kaiba an bagong mga magasin.
2 Kun Siisay an Puedeng Makikabtang: An gabos na aktibong nagpapahayag kan maogmang bareta bobooton na lubos na makikabtang. An nagkapira makakapag-auxiliary payunir. Igwa daw kamo nin mga aki o inaadalan sa Biblia na nag-ooswag na sa espirituwal? Tabangan sinda na makipag-olay sa kamagurangan tanganing madeterminaran kun sinda kualipikado na bilang dai pa bautisadong mga parahayag. An kamagurangan maninigong gumibo nin inisyatiba na makipag-olay sa inaktibong mga parahayag tanganing enkaminaron sinda na makikabtang, tibaad, paagi sa pakikiibanan sa sainda kan eksperyensiadong mga parahayag.
3 Ipapadara an suplay nin Kingdom News Num. 37 sa gabos na kongregasyon tanganing an mga parahayag puedeng kumua nin tig-50 kopya. Kun dai kaya kan nagkapirang parahayag na iwaras an 50 kopya, puedeng gamiton kan mga regular payunir an ano man na makukuang tada na mga suplay. An mga interesado na bako pang mga parahayag puedeng makakua nin tiglimang kopya tanganing iwaras sa mga kapamilya asin kaamigo. An gabos maninigong magkaigwa nin rekord kun pira an saindang iwinaras asin isurat ini sa likod kan saindang mga report nin paglilingkod sa langtad sa katapusan nin Oktubre asin Nobyembre. Irerekord kan sekretaryo an total na iwinaras kan kongregasyon asin ipapadara iyan sa sangang opisina sa katapusan kan kada bulan. An ano man na natadang mga kopya kan Kingdom News pagkatapos kan kampanya puedeng gamiton sa ano man na kabtang kan ministeryo.
4 Kun Ano an Sasabihon: Papagdanayon na halipot an saindong pag-atubang tanganing mas dakol an mapaabotan kan mensahe. Puede nindong sabihon: “Bilang paglilingkod sa publiko, nakikikabtang ako sa sarong lakop sa dagang pagpaabot kan mahalagang mensaheng ini. Uya an libreng kopya nindo. Basahon tabi nindo iyan.” Tibaad may bentaha na dai kamo magdara nin bag sa pagharongharong. Seguradohon na magkaigwa nin rekord kan mga interesadong nanompongan.
5 Kun Paano Kokobrehan an Saindong Teritoryo: Imbes na iwaras an Kingdom News sa paghuhulit sa tinampo, magkonsentrar sa paghuhulit sa harong-harong asin komersial na teritoryo kun posible. Ilista an mga harong na mayong tawo, asin hingoahon na balikan an mga ini sa ibang oras o aldaw kan semana. Poon sa Lunes, Nobyembre 6, sarong kopya an puedeng iwalat sa mga harong na mayong tawo. Minsan siring, kun dakol na teritoryo kan kongregasyon an dai kayang kobrehan durante kan itinalaan na panahon, an kamagurangan puedeng magdesisyon na an Kingdom News maninigong iwalat sa mga harong na mayong tawo durante kan bilog na kampanya.
6 An paglaglag sa “Dakulang Babilonya” marikas na nagdadangadang. An mga tawo kaipuhan na lumuwas sa saiya bago sia biyong laglagon. (Kap. 14:8; 18:8) Gumibo na nin mga plano ngonyan para sa lubos na pakikikabtang sa pambilog na kinaban na kampanyang ini tanganing an gabos makaaram na harani na an katapusan kan falsong relihion!