Espesyal na Kampanya nin Pulyeto—Oktubre 20–Nobyembre 16!
1 Poon sa Lunes, Oktubre 20, asin magpapadagos sa laog nin apat na semana, makikikabtang kita sa espesyal na pagdistribwir nin bagong pulyeto na may titulong Gusto daw Nindong Maaraman an Katotoohan? Linalaoman na an espesyal na kampanyang ini sa bilog na daga makakatabang tanganing mas dakol na tawo an magin interesado sa solamenteng gikanan nin katotoohan.—Juan 17:17.
2 An pulyeto nagtatao nin deretso sa puntong mga simbag basado sa Biblia sa anom na mahahalagang hapot: “An Dios daw talagang may pagmakolog sa sato?” “Matatapos pa daw an guerra asin pagsakit?” “Ano an nangyayari sa sato kun kita magadan?” “Igwa daw nin ano man na paglaom para sa mga gadan?” “Paano ako mamimibi asin dadangogon nin Dios?” asin “Paano ako makakanompong nin kaogmahan sa buhay?” An mga iglesia kan Kakristianohan nungkang nakatao nin nakakakontentong simbag sa mga hapot na ini. Dawa an dakol na dai naghihingakong Kristiano nag-iisip-isip manongod sa mga hapot na iyan, alagad tibaad dai ninda aram na manonompongan sa Biblia an maliwanag na mga simbag. Kun siring, inaasahan niato na magigin nakakaakit sa dakol na tawo an mensaheng ini.
3 Distribwiran an Bilog na Teritoryo: Hingoahon na distribwiran an bilog nindong teritoryo. Kun dakula an saindong teritoryo, tibaad dagkahon kamo kan kamagurangan na magwalat nin kopya kan pulyeto sa mga harong na mayo nin tawo sa enot nindong pagdalaw. Dai nindo paglingawan na tawan nin kopya an saindong mga kataed, paryente, katrabaho, kaeskuela, asin iba pa na parate nindong nakakaolay. Tibaad puede nindong planohon na mag-auxiliary payunir sa Oktubre o Nobyembre. Igwa daw kamo nin aki o inaadalan sa Biblia na nag-ooswag sa espirituwal asin puedeng makualipikar na mag-iba sa sato sa kampanyang ini bilang dai pa bautisadong parahayag? Kun igwa, ipaaram iyan sa kamagurangan.
4 Kun Ano an Sasabihon: Tanganing mas dakol na tawo an mapaabotan kan mensahe, pinakamarahay na gibohon na halipot an saindong presentasyon. Sambiton sana sa kagharong an saro sa anom na hapot na nasa atubangan na pahina asin ipaheling sa saiya an simbag sa pulyeto. Ini mapangyari na ibagay kan gabos na parahayag an saindang presentasyon sa mga pangangaipo kan teritoryo. Kun may magpaheling nin interes, ilista iyan asin dumalaw liwat. Sa mga katapusan kan semana, puedeng ialok an bagong mga magasin kaiba kan pulyeto. Pagkatapos kan kampanya sa Nobyembre 16, iaalok niato an librong Itinotokdo kan Biblia. Kun may matadang mga pulyeto, iyan gagamiton sa kaparehong paagi nin paggamit kan iba pang makukuang pulyeto.
5 Pumoon nin Pag-adal sa Biblia: Partikularmenteng dinisenyo an pulyetong ini tanganing tabangan kita na makapoon nin mga pag-adal sa Biblia. Kun nagdadalaw liwat sa sarong tawo na nagpaheling nin interes, puede nindong hapoton an kagharong kun arin na katotoohan sa Biblia an nakaranga o nakapaginhawa sa saiya. Ipaheling sa saiya an likod na pahina na nagsasambit manongod sa satong areglo nin pag-adal sa Biblia, asin tawan sia nin kopya kan librong Itinotokdo kan Biblia. Kun posible, ipakipag-olay nin halipot an saro o duwang parapo sa kapitulo na may mas dakol na impormasyon dapit sa temang napili nia.
6 Hinahanap ni Jehova an mga masamba sa saiya “sa espiritu asin katotoohan.” (Juan 4:23) Logod na kita gabos makikabtang sa espesyal na kampanyang ini tanganing tabangan an iba na maaraman an katotoohan!