“An Bagong Milenyo—Ano an Tagama kan Ngapit Para sa Saindo?”
1 An hapot na iyan haloy nang nasa isip nin mga tawo sa bilog na daga. Minsan ngani dakol an nagibo nin katawohan sa nag-aging mga siglo, nadedesganar an mga tawo huli ta nag-eeksister pa man giraray an pundamental na mga problema na nagpasakit sa mga tawo sa laog nin dakol na milenyo. (Job 14:1; Sal. 90:10) Saen daw makanonompong nin kaginhawahan an katawohan?
2 Durante kan mga bulan na ini nin Oktubre asin sa Nobyembre, magkakaigwa kita nin espesyal na oportunidad na itao sa satong mga kataed an simbag sa hapot na iyan. Paano? Paagi sa pagdistribwir kan Kingdom News Num. 36. Iyan may temang “An Bagong Milenyo—Ano an Tagama kan Ngapit Para sa Saindo?” Durante kan enot na kabangaan kaining Oktubre, iaalok niato an mga magasin na An Torrengbantayan asin Awake! Dangan poon sa Lunes, Oktubre 16, sagkod sa Biernes, Nobyembre 17, makikikabtang kita sa sigidong pagdistribwir kan Kingdom News Num. 36. Durante kan kampanyang ini, makonsentrar kita sa pagpasakamot kan Kingdom News Num. 36 sa ordinaryong mga aldaw kan semana. Sa mga katapusan kan semana, iaatubang niato iyan kaiba kan presenteng mga magasin.
3 Kamo daw Lubos na Makikikabtang? Bobooton kan kamagurangan, ministeryal na mga lingkod, asin payunir na mangenot sa kampanyang ini, huling sinda an nasa enotan kan gibohon. An dakol na parahayag liniwat an saindang mga kamugtakan tangani na makapag-auxiliary payunir durante kan saro o duwang bulan kan pagdistribwir. An iba nagplanong gumamit nin mas dakol na oras sa ministeryo kisa kan dati.
4 An mga namamayo sa Pag-adal sa Libro kan Kongregasyon puedeng makatabang sa pag-enkaminar sa lambang miembro kan saindang grupo na makikabtang nin lubos sa pagdistribwir kan Kingdom News Num. 36. Tibaad may nagkapirang parahayag na nagin inaktibo sa paghuhulit. Maninigong dalawon kan kamagurangan an mga ini tanganing maheling kun ano an magigibo sa pagtabang sa sainda. Tibaad puedeng gumibo nin mga areglo na ibanan sa langtad nin sarong eksperyensiadong parahayag an lambang inaktibo durante kan mga bulan na ini. An simpleng pag-atubang kan Kingdom News Num. 36 puedeng iyo sana an kaipuhan tangani na mareaktibar an mga parahayag na ini.
5 Ini magigin marahay man na oportunidad para sa mga inaadalan sa Biblia na madali nang matapos an librong Kaaraman asin kualipikado nang magin dai pa bautisadong mga parahayag na pumoon sa pakikikabtang sa ministeryo. Maski an sadit na mga aki puedeng magkaigwa nin marahay na pakikikabtang sa nakaoogmang gibohon na ini.
6 An kaipuhan saro sanang simpleng pag-atubang. Puede kamong magsabi:
◼ “Nagboluntaryo ako kan sakong oras tangani na tumabang sa pagdistribwir kan importanteng marhay na mensaheng ini sa lambang pamilya digdi sa [ngaran kan banwaan o distrito]. Ini an saindong kopya. Basahon tabi nindo iyan.” Tibaad may bentaha na dai magdara nin portpolyo sa paghuhulit kun nagdidistribwir kan Kingdom News Num. 36.
7 Plinanong Marhay na mga Pagtiripon Para sa Paglilingkod sa Langtad: Dapat na siertohon kan kamagurangan na kombenyente sagkod praktikal an mga areglo sa paghuhulit. Maninigong seguradohon nangorogna kan paraataman sa paglilingkod na igwa nin magigibong dakol na teritoryo sa pagharongharong asin lugar nin komersio tanganing an gabos makapakikabtang nin lubos sa gibohon. Kun posible, maninigong mag-organisar nin mga pagtiripon bago lumuwas sa paglilingkod para sa kada ordinaryong aldaw kan semana, sa mga katapusan kan semana, asin sa mga banggi. Puedeng gumibo nin mga areglo na magtiripon sa mga oras bago bumanggi para sa kapakinabangan kan mga nag-eeskuela, relyibong trabahador, asin iba pa.
8 Kun Ano an Dapat na Gibohon sa mga Mayo sa Harong: An pasohan niato iyo na makaolay an pinakadakol na kagharong na mapupuede. Kun mayo ni sarong tawo sa harong sa pagsongko nindo, isurat an adres asin sumongko sa ibang oras kan aldaw na iyan. Kun pag-abot kan huring semana kan kampanya bako pa man giraray na mapanggana an mga paghihingoa nindo na makaolay an mga kagharong na ini, puede kamong magwalat sa sainda nin sarong kopya kan Kingdom News Num. 36 sa lugar na dai iyan maheheling nin mga nag-aagi. Puedeng tawan nin instruksion kan lokal na kamagurangan an kongregasyon na magwalat nin kopya kan Kingdom News Num. 36 sa mga mayo sa harong sa enot na pagsongko kun naghuhulit sa puerang mga lugar asin kun saen dakol pa an teritoryo na dai makokobrehan durante kan kampanya.
9 Magin Sibot Kita! Maninigong hingoahon kan mga kongregasyon na makobrehan an saindang teritoryo bago matapos an kampanya sa Nobyembre 17. Kun medyo dakula an saindong teritoryo, puedeng maghulit nin solo an nagkapirang parahayag kun saen ini praktikal asin daing peligro. Pangyayarihon kan areglong ini na mapaabotan an pinakadakol na maninigo. Seguradohon na magkaigwa nin sarong marahay na rekord kan gabos na nanompongan na interesado.
10 Maninigong antisiparon kan kamagurangan kun pirang dagdag na magasin an kakaipuhanon kan kongregasyon asin magpedido sono dian. Dai na kaipuhan na pedidohon an Kingdom News Num. 36, huling ipadadara an suplay sa kada kongregasyon. Kun saen may supisyenteng teritoryo, an mga espesyal, regular, asin auxiliary payunir maresibi nin tigdo-250 kopya na ididistribwir, mantang an mga parahayag kan kongregasyon tatawan nin tigsi-50 kopya. Kun siring kamo daw andam na asin galagang magin sibot sa espesyal na aktibidad na ini? Kanigoan kadakulang pribilehio niato na ipaaram sa gabos na kataed niato an ipinanuga nin Dios para sa harani nang ngapit!