Tinatawan nin Dakol—Hinahagadan Man nin Dakol
1 Inoyonan nanggad kita sa pagkaigwa kan katotoohan! Huli sa satong pagdusay ki Jehova, pinaniwalaan kita kan maogmang bareta. (1 Tes. 2:4) Ipinapasairarom kita kaini sa mas dakulang paninimbagan. Nagsabi si Jesus: “An kada saro na tinawan nin dakol, dakol man an hahagadon sa saiya.”—Luc. 12:48b.
2 Kanigoan katotoo kan mga tataramon na iyan! Binendisyonan nin kaaraman manongod sa Tataramon nin Dios, nin sarong magayonon na asosasyon nin magturugang, asin makangangalas na paglaom, siertong dakol na an itinao sa sato. Makatanosan nanggad, dakol man an linalaoman bilang balos.
3 Papagdanayon an Tamang Punto-de-vista sa mga Kahagadan: May mga nagkonklusyon na dakolon an linalaoman sa sato. Bilang Payo kan Kristianong kongregasyon, si Jesu-Cristo an nagdedeterminar “kan kinakaipuhan” tanganing magpunsionar iyan nin tama. (Efe. 4:15,16) Inaasegurar nia kita na an ‘saiyang sakal maboot asin an saiyang pasan magian.’ (Mat. 11:28-30) Mamomoton niang kinokonsiderar an mga igwa nin limitasyon. (Luc. 21:1-4) Kun itatao niato an satong pinakamakakaya, gurano man kadakol, bebendisyonan kita.—Col. 3:23, 24.
4 Hapota an saindong sadiri, ‘An intereses daw kan Kahadean an enot sa sakong buhay? Ginagamit ko daw an sakong panahon asin mga rogaring tanganing omawon an ngaran nin Dios asin makinabang an iba? Nakukua ko daw an sakong pinakadakulang kaogmahan sa paglilingkod ki Jehova imbes na sa pagkamit nin materyal na mga bagay?’ An satong sadiosan na mga simbag sa mga hapot na ini naghahayag kan mga motibo na nasa laog kan satong puso.—Luc. 6:45.
5 Likayan na Matentaran na Gumibo nin Maraot: Nungkang nagkaigwa kaidto kan siring na mga pangigipit sa kapasloan, kahanaban, asin pagkamoot sa makalaman na kaogmahan. Aroaldaw napapaatubang sa sato an mga pagtentar na magkompromiso. Tanganing mapangganang maatubang an mga ini, dapat na hagadon niato ki Jehova na tabangan kita. (Mat. 26:41) Paagi sa saiyang espiritu, pakokosogon nia kita. (Isa. 40:29) An pagdisiplina sa sadiri asin pagpopogol sa sadiri igwa man nin dakulang kabtang.—1 Cor. 9:27.
6 Bakong igo na mamotan an marahay, kundi kaipuhan ta man na ikaongis an maraot. (Sal. 97:10) Nakalista sa Talinhaga 6:16-19 an pitong bagay na ikinaoongis ni Jehova. Malinaw nanggad na an saro na boot na makapaogma ki Jehova kaipuhan man na maongis sa siring na mga bagay.
7 Tama na mamibi para sa mga kamugtakan na perming matogot sa sato na magkaigwa nin ‘dakol na gigibohon sa gibohon kan Kagurangnan.’ (1 Cor. 15:58) Dakol an nakanompong na an sibot na iskedyul sa paglilingkod ki Jehova sarong proteksion huli ta nagtotogot iyan nin dikit na panahon sa paghihingoa sa mayong kamanungdanan na mga bagay.
8 Kinonsiderar an gabos na bagay, an hinahagad sa sato ni Jehova makatanosan na marhay. (Miq. 6:8) Kaya padagos kitang “nagpapagal asin naghihingoa,” na kompiado na orog kadakula an satong balos kisa sa ano man na bagay na hinahagad sa sato.—1 Tim. 4:10.