Gikan sa Boot na Pagpresentar kan Satong Sadiri Para sa Lambang Marahay na Gibo
1 An sarong kinabanon na publikasyon nasambitan an Mga Saksi ni Jehova, na nagsasabi: “Masakit na makanompong nin mga miembro kan arin man na ibang grupo na naggigibong arog kahigos kan mga Saksi sa saindang relihion.” Taano an Mga Saksi ni Jehova ta mahigoson asin gikan na marhay sa boot an espiritu?
2 An sarong rason iyo na sinda biyong nakamamate nin pag-apretar. Minidbid ni Jesus na limitado an panahon nia na taposon an saiyang gibohon sa daga. (Juan 9:4) Ngonyan, narerealisar kan banwaan ni Jehova na limitado an panahon ninda sa paggibo kan saindang gibohon. Kun siring, gikan sa boot nindang iprenepresentar an saindang sadiri para sa banal na paglilingkod. (Sal. 110:1-3) Huling mas dakol pang paraani an kaipuhan sa pagtipon kan ani, dai puedeng inaan an saindang pagmamahigos. (Mat. 9:37, 38) Huli kaini, nagmamaigot sindang arogon si Jesus, na nagtao nin sangkap na halimbawa nin pagigin gikan sa boot asin kaigotan sa saiyang trabaho.—Juan 5:17.
3 An saro pang rason kun taano an Mga Saksi ni Jehova ta bilog na kalag sa gibohon iyo na an saindang organisasyon laen sa gabos na ibang grupo. An kinabanon na relihiosong mga organisasyon sa parate naghahagad sana nin kadikiton na oras asin pagmamaigot sa saindang mga miembro. An saindang tinutubod kadikit an o mayong epekto sa saindang pan-aroaldaw na pamumuhay. Mas gusto ninda na an saindang mga pastor ‘magtaram sa sainda nin magagayon na bagay,’ na inaasegurar sinda na an saindang dai sinasaboot na pagmamaigot igo na. (Isa. 30:10) An saindang klero nagpaonra paagi sa ‘pagpagirok kan saindang mga talinga,’ na nagtatanom nin espiritu nin pagkaindiperente asin espirituwal na paghinugak.—2 Tim. 4:3.
4 Kanigoan na kalaenan sa tahaw kan banwaan ni Jehova! An gabos na bagay manongod sa satong pagsamba nangangaipo nin pagmamaigot asin gibohon. Sa gabos na aldaw asin sa gabos na ginigibo niato, iinaaplikar ta an satong tinutubod. Mantang an katotoohan nagdadara sato nin labi-labing kagayagayahan, iyan nangangaipo nin “dakulang pakikilaban” tanganing maotob niato an kahagadan kaiyan. (Ikomparar an 1 Tesalonica 2:2.) An pag-asikaso sana kan pan-aroaldaw na mga paninimbagan sa buhay igo nang papagdanayon na sibot an kadaklan na tawo. Minsan siring, dai kita kaini naoolang na enoton an intereses kan Kahadean.—Mat. 6:33.
5 An satong paglilingkod ki Jehova kapakipakinabang asin apretadong marhay kaya napahihiro kita na ‘tuboson’ an panahon hale sa ibang mga okupasyon asin gamiton iyan para sa espirituwal na mga bagay. (Efe. 5:16) Sa pakaaram na an satong diosnon na debosyon asin gikan sa boot na espiritu nakapaoogma ki Jehova, napakokosog kita na magdanay na mahigos. An determinasyon niato magpadagos na “nagpapagal asin naghihingoa” para sa intereses kan Kahadean.—1 Tim. 4:10.
6 Debosyon Asin an Espiritu nin Pagsasakripisyo sa Sadiri: Kadaklan sa mga tawo ngonyan pinaoorog an materyal na mga pangangaipo asin intereses kisa sa gabos na iba pang bagay. Nakasentro an atension ninda sa kun ano an saindang kakakanon, iinomon, o gugubingon. (Mat. 6:31) Dai naninigoan sa mga kinakaipuhan, minomotibar sinda kan pasohan na kamtan an lubos na maginhawang pamumuhay ngonyan asin ‘magkaigwa nin dakol na rogaring na rinimpos para sa dakol na taon, tanganing makapahingalo sinda, makakakan, makainom, asin magpasiramsiram.’ (Luc. 12:19) An tipikong parasimba nakamamate na an ano man na personal na pagmamaigot na hinahagad kan saiyang relihion pakikiaram sa saiyang mga diretso. Huling an saiyang kaisipan nakasentro sa saiyang sadiri, an pagkultibar nin espiritu nin pagsasakripisyo sa sadiri bakong praktikal.
7 Iba an pagmansay niato sa bagay na ini. Ilinangkaw kan Tataramon nin Dios an satong pag-isip kaya iniisip niato an kaisipan nin Dios imbes na kan sa tawo. (Isa. 55:8, 9) Igwa kita nin mga pasohan sa buhay na minalampas sa makalaman na mga pig-aaabot. An pagbindikar sa soberaniya ni Jehova asin an pagpakangbanal kan saiyang ngaran an pinakaimportanteng mga isyu sa bilog na uniberso. An hiwas kan mga isyung ini dakulaon kaya, sa pagkomparar, an gabos na nasyon “siring sa dai nag-eeksister sa atubangan nia.” (Isa. 40:17) An ano man na pagprobar na mamuhay sa paagi na nag-iignoro kan kabotan nin Dios dapat na mansayon na kamangmangan.—1 Cor. 3:19.
8 Kaya mantang an pirang materyal na bagay kaipuhan, nasasabotan niato na an mga ini bako nanggad na an “orog na mahalagang mga bagay.” (Fil. 1:10) Kita nangangapot sa prinsipyo kan 1 Timoteo 6:8 sa paglimitar sa satong paghanap nin materyal na intereses asin pagpadanay kan satong puso na nakasentro sa ‘mga bagay na dai naheheling na daing katapusan.’—2 Cor. 4:18.
9 Mantang orog kitang nag-iisip kan mga kaisipan nin Dios, mas dikit an paghadit niato manongod sa materyal na mga bagay. Kun hinohorophorop niato an ginibo ni Jehova para sa sato asin an makangangalas na mga bendisyon na ipinanuga nia sa ngapit, kita gikan sa boot na magibo nin ano man na pagsakripisyo na hagadon nia sato. (Mar. 10:29, 30) Utang niato saiya an mismong pag-eksister niato. Namamatean niato na dapat itao ta an satong sadiri, huling an gabos niatong ginigibong paglilingkod saiya ‘iyo an katongdan niatong gibohon.’ (Luc. 17:10) Ano man na bagay na hinahagad sato na itao ki Jehova, itinatao niato na may kaogmahan, sa pakaaram na kita ‘mag-aani nin abunda.’—2 Cor. 9:6, 7.
10 An Gikan sa Boot na mga Trabahador Kaipuhan Ngonyan: Sa mismong kapinonan, an Kristianong kongregasyon luminaog sa panahon na pano-pano nin aktibidad. An lubos na patotoo kaipuhan na ikatao antes kan kalaglagan kan Jerusalem kan 70 C.E. Durante kan panahon na iyan an mga disipulo ni Jesus ‘sibot na gayo sa tataramon.’ (Gibo 18:5) An marikas na paglakop dahelan na mangaipo na magsanay nin dakol pang ebanghelisador asin may kakayahan na mga pastor. An mga lalaking may eksperyensia sa pakikipag-olay sa sekular na mga autoridad asin siring man an mga lalaking may kakayahan na mag-asikaso sa pagtipon asin pagdistribwir nin materyal na mga bagay kinaipuhan. (Gibo 6:1-6; Efe. 4:11) Mantang an nagkapira prominenteng naglingkod, an kadaklan nagdanay na dai midbid. Alagad gabos sinda ‘naghingoa nin maigot,’ na iribang naggigibo nin bilog na puso tanganing matapos an gibohon.—Luc. 13:24.
11 Minsan ngani sadit an pangangaipo para sa mabagsik na aktibidad durante kan mga siglong suminunod, sarong dakulang pagbuhay liwat kan pan-Kahadean na gibohon an nagpoon kan si Jesus nag-ako kan kapangyarihan sa Kahadean kan 1914. Kan enot, bakong dakol an nakarealisar na an pangangaipo nin mga trabahador magigin dakulang marhay, na mangangaipo nin tabang kan minilyon sa palibot kan globo.
12 Ngonyan an organisasyon igwa nin dakol na laen-laen na proyekto na haros nakauubos kan satong pondo. An aktibidad kan Kahadean nag-aabante sa dakulang sokol. An pagkaapretado kan satong mga panahon nagpapahiro sato na maghingoa sa sadiri asin gamiton an gabos tang rogaring tanganing hamanon an gibohon na nasa atubangan niato. Mantang nagrarani nang marhay an katapusan kan bilog na maraot na sistema nin mga bagay, naglalaom kitang mas orog pang aktibidad an maabot! Gabos na dusay na lingkod ni Jehova inaapodan na gikan sa boot niang ipresentar an sadiri sa apretadong gibohon nin pagtitipon!
13 Ano an Kaipuhan na Magibo? Tunay na masasabi niato na “dakol an gibohon sa gibohon kan Kagurangnan.” (1 Cor. 15:58) Sa dakol na teritoryo hinog na an anihon, alagad kakadikit kan paraani. Imbitado kitang gibohon an satong kabtang bako sanang sa lubos na pagpapatotoo sa satong bilog na teritoryo kundi siring man sa pag-atubang sa angat nin paglilingkod kun saen mas orog an pangangaipo.
14 Kaomaw-omaw na maheling na an mga Saksi sa bilog na kinaban gikan sa boot na minapresentar kan saindang sadiri para sa ibang mga aktibidad. Tibaad kabale digdi an pagboboluntaryo sa pagtogdok nin mga lugar para sa pagsamba, paglilingkod sa mga kombension, pagtabang sa pag-aayuda sa mga panahon nin kalamidad, o paglinig kan lokal na Kingdom Hall. Kaipuhan tang perming seguradohon na an Kingdom Hall bayaan na malinig asin nasa aregladong kamugtakan pakatapos nin kada pagtiripon. An paggibo nin mga asignasyon na tibaad kinokonsiderar na menus nagpapaheling nin tamang pakasabot sa mga tataramon ni Jesus sa Lucas 16:10: “An maimbod sa kadikit maimbod man sa dakol, asin an bakong matanos sa kadikit bako man na matanos sa dakol.”
■ Pagtao nin Suporta sa mga Aktibidad kan Kongregasyon: An kada kongregasyon binibilog nin indibiduwal na mga parahayag kan Kahadean. An mga nahahaman kan kongregasyon minadepende nin dakula sa kun gurano an gikan sa boot asin kayang gibohon kan lambang Saksi. Iyan minakonsentrar sa pagtapos kan paghuhulit kan maogmang bareta, paggibo nin bagong mga disipulo, asin dangan pagpapakosog sa sainda sa espirituwal. An lambang saro sa sato puedeng makakontribwir sa gibohon na ini. Puede man kitang maggibo nin mga pasohan para sa satong sadiri sa personal na pag-adal, pakikikabtang sa mga pagtiripon, asin pagtabang sa iba na may pangangaipo sa laog kan kongregasyon. An mga aktibidad na ini nagbubukas nin dakol na marahay na oportunidad para sa sato na ikapaheling an pagigin gikan sa boot niato.
■ Pangengenot sa mga Katongdan nin Pangangataman: Ipinaniwala ni Jehova sa mga ninombrahan na kamagurangan an pag-asikaso sa kada kongregasyon. (Gibo 20:28) Ini mga lalaking naghingoa tanganing makualipikar para sa pribilehiong ini. (1 Tim. 3:1) Haros lambang tugang na lalaki sa kongregasyon may potensial na makualipikar para sa mas dakulang mga paninimbagan. Dakol na tugang na lalaki an nagtatalubo sa espirituwal. An mga lalaking ini maninigong magin maigot na mga estudyante kan Biblia asin kan satong mga publikasyon. Puede nindang ipaheling an saindang pagigin gikan sa boot paagi sa pagigin mapagpasakop sa mga ninombrahan nin espiritung kamagurangan, pag-arog kan saindang pagtubod, asin pagkultibar kan mga kualidad na hinahanap sa mga paraataman.—Heb. 13:7, 17.
■ Paglaog sa Bilog na Panahon na Paglilingkod: An kongregasyon sa pangenot nagpupunsionar tanganing ihulit an maogmang bareta. (Mat. 24:14) Kanigoan na bendisyon kun an mga maigot dinadagdagan an saindang pagmamaigot paagi sa pagpalista bilang mga payunir! Parateng kalabot digdi an mga pagliliwat sa saindang personal na buhay. Idtong mga nagdadanay sa pribilehiong ini imbes na magpondo pakalihis nin mas o menus sarong taon huli sa temporaryong panluluya seguradong makaeeksperyensia kan mayaman na bendisyon ni Jehova. An mamomoton na kamagurangan asin an iba pang maygurang puedeng tumabang sa mga payunir na makapanggana, na pinakokosog sinda paagi sa tataramon asin gibo. Kanigoan karahay na kaisipan an ipinaheheling nin hobenes na direktang minalaog sa pagpapayunir pakatapos kan saindang pag-eskuela! Totoo man iyan sa mga adulto na tolos na nagpapalista bilang mga regular payunir sa panahon na nainaan na an sekular na mga paninimbagan ninda. Kanigoan na pagkakontento an dinadara sa sarong nagdusay na Kristiano kun sia sa siring nakikikooperar sa pagpaparikas ni Jehova kan gibohon na pagtitipon!—Isa. 60:22.
■ Pakikikabtang sa Pagtogdok Asin Mantension kan mga Lugar na Tiriponan: Ginatos na modernong Kingdom Hall patin dakol na Assembly Hall an ikinatogdok na. Haros gabos na trabaho ginibo kan satong mga tugang na lalaki asin babae na gikan sa boot na nagboluntaryo kan saindang panahon asin mga kakayahan. (1 Cron. 28:21) Ribo-ribong nagtatrabaho nin gikan sa boot an nagpapadanay kan mga pasilidad na ini sa marahay na kamugtakan paagi sa paggibo kan ano man na trabahong kaipuhan. (2 Cron. 34:8) Mantang an gibohon na ini sarong kabtang kan banal na paglilingkod, an mga nagtatabang gikan sa boot na iprenepresentar an sadiri ninda, na dai naghahagad na bayadan an saindang paglilingkod, kun paanong dai sinda mahagad na bayadan sa paghuhulit sa harong-harong, pagtao nin pampublikong mga pahayag, o pagtabang sa gibohon sa asamblea o kombension. An mga boluntaryong ini bulaos na iprenepresentar an saindang mga serbisyo sa pagpaplano asin pagtotogdok kan mga lugar nin pagsamba sa ikaoomaw ni Jehova. An maimbod na mga lingkod na ini ni Jehova dai sa ano man na paagi naghahanap nin mga paagi na makinabang sa materyal magin direkta o indirekta hale sa mga serbisyo na itinatao ninda, huling an gabos nindang talento asin kayamanan idinedikar ki Jehova. An aktibidad na ini nangangaipo nin mahigos na mga trabahador na an saindang mga serbisyo ginigibong “bilog na kalag na siring baga kun para ki Jehova.”—Col. 3:23.
15 Kun siring, ano an nagpapalaen kan pagin gikan sa boot kan banwaan ni Jehova? Iyan iyo an espiritu nin pagtatao. An buka-an-palad na pagtatao ninda kalabot an labi pa sa kuarta o materyal na mga bagay—‘gikan sa boot na nagpepresentar sinda kan saindang sadiri.’ (Sal. 110:3) Iyo ini an pinakaubod kan satong pagdusay ki Jehova. Kita binabalosan sa espesyal na paagi. Naeeksperyensiahan niato an “orog na kaogmahan” asin kita ‘nag-aani nin abunda’ huli ta an satong ginigibo inaapresyar kan iba, na nagtatao sa sato bilang balos. (Gibo 20:35; 2 Cor. 9:6; Luc. 6:38) Si Jehova “namomoot sa maogmang paratao.” (2 Cor. 9:7) Babalosan nia kita nin sanggatos na doble, nin bendisyon na matagal sagkod lamang. (Mal. 3:10; Roma 6:23) Kaya kun an mga pribilehio sa paglilingkod ki Jehova binuksan sa saindo, gikan sa boot daw kamong magboboluntaryo kan saindong sadiri asin masimbag arog kan ginibo ni Isaias: “Uya ako! Sugoa ako”?—Isa. 6:8.