Hapot

◼ Ano an tamang paagi sa pagbilang kan mga nag-aatender sa mga pagtiripon?

Ipinaheheling kan Deuteronomio 31:​12, 13 kun sairisay an maninigong umatender sa mga pagtiripon: “Tiponon mo an banwaan, an mga lalaki asin an mga babae asin an saradit . . . tanganing sinda maghinanyog asin tanganing sinda makanood.” Kun binibilang an mga nag-atender, malinaw na binibilang niato an gabos na adulto. Minsan siring, an paghinanyog asin pakanood sa mga pagtiripon kahagadan sa gabos, pati sa “saradit.” Kan panahon ni Nehemias, an “gabos na may igo nang isip tanganing magdangog” nagtirindog “poon sa amay na aga sagkod sa odto” sa pagdangog kan pagbasa kan Pagboot. (Neh. 8:​1-8) Malinaw na kabilang sa mga nagdadangog an dakol na aki. Minsan ngani dai ninda naiintindihan an gabos, puede nindang masabotan na sinda dapat na mamoot, sumamba, asin kumuyog ki Jehova Dios. Tunay nanggad, an mga aki na nakikinabang sa mga pagtiripon maninigong bilangon na kaiba kan mga nag-aatender.

Malinaw na dai maninigong bilangon an omboy na karukarga nin ina na dai pang kaaram-aram sa kun ano an nangyayari. Apuera kaini, an pagigin kaiba sa bilang minadepende sa pag-atento. Siempre, bakong realistikong laoman na an sarong aki magdadanay na atentibo durante kan bilog na pagtiripon. Minsan siring, kun aram kan aki kun ano an nangyayari, na nagpapaheling nin paggalang sa sinasabi, maninigo siang bilangon minsan ngani tibaad paminsanminsan naglalagawlagaw an saiyang atension.

Maninigong sanayon kan mga magurang an saindang mga aki na pahalagahan an mga pagtiripon paagi sa pagtokdo sa sainda na tumukaw nin silensio asin maghinanyog durante nin pampamilyang pag-orolay sa Biblia. An iba binabasahan an saindang mga aki tanganing pakosogon an pagpahalaga sa espirituwal na mga bagay. (Helingon an Agosto 1, 1988 An Torrengbantayan, pahina 20, parapo 13 [w88-E 8/1 p. 13, par. 13].) An iba tinatawan nin asignasyon an mga aki na isurat an nagkapirang ngaran o punto na ginamit sa mga pagtiripon na sa huri puedeng isaysay sa pamilya. Bakong madonong na magdara sa mga pagtiripon nin mga kawatan, librong kinokoloran, o kaagid na mga bagay sa katuyohan na papagdanayon na may ginigibo an aki.

Maninigong helingon kan mga attendant na nagbibilang an mga kasilyasan asin iba pang lugar tanganing ikaiba ninda an mga tibaad naghale nguna sa saindang tukawan. Isinusuherir na an pagbilang gibohon sa huring kabangaan kan pagtiripon.