Tabangan an mga Aki na Orog na Makinabang sa mga Pagtiripon
1 Kun an saindong mga aki nag-aatender sa mga pagtiripon, sinda daw talagang naghihinanyog? Ikasasaysay daw ninda sa saindo pagkatapos an mga nanodan ninda sa kada pagtiripon? Tinatawan daw nindo sinda nin aktibong halimbawa paagi sa saindong mga pagpapahayag sa mga pagtiripon, na saindang naheheling, nadadangog, asin maaarog? Inaarog daw kan saindong mga aki an saindong pagtubod? An positibong simbag sa mga hapot na ini napakahalaga tanganing an mga aki magdakula na maimbod na mga lingkod ni Jehova.
ITANOM AN HALAGA NIN PAG-ATENDER SA MGA PAGTIRIPON
2 An aki nagkakaipo nin pagtotokdo sa Biblia tangani siang magkaigwa nin buhay na daing katapusan. (Juan 17:3) Tanganing makanood an aki na pahalagahan an espirituwal na mga bagay, kaipuhan an pag-atender sa mga pagtiripon. Kun beses, an mga magurang nag-aalangan na ipag-iba sa pagtiripon an mga aki huli ta natatakot sinda na an aki makaribok sa iba. An iba tibaad iwalat sa harong an saindang mga aki tanganing mag-adal kan leksion sa eskuwelahan. Alagad an madonong na magurang ipinag-iiba sa pagtiripon an saiyang mga aki.—Deut. 31:12.
3 An enot na maninigong manodan nin aki poon sa pagkaomboy iyo na sia minaduman sa Kingdom Hall tanganing maghinanyog. Pero kun sia tinatawan nin mga mapagkakaabalahan, arog baga nin mga kawatan o kakanon, o kun sia pababayaan na magkawat sa saiyang tukawan, makakanood daw siang maghinanyog asin apresyaron kun taano kita ta nag-aatender sa pagtiripon sa Kingdom Hall? Kun an aki nagkakaraw, an madonong na magurang itatanos sia asin mamomoton na totokdoan siang maghinanyog, bakong paagi sa pagsuhol sa saiya nin dulse o kawatan, kundi paagi sa pag-aplikar kan disiplina kan Tataramon nin Dios.—Tal. 13:24; Efe. 6:4.
AN SAINDONG HALIMBAWA BILANG MAGURANG
4 An The Watchtower kan Enero 15, 1982, pahina 17, naghapot kan minasunod: “Aram daw kan saindong mga aki na isinasapuso nindo an mga pagtiripon para sa pag-adal kan Biblia? Naheheling daw ninda na ibinibilang nindo an mga pagtiripon na ini na mahalaga nanggad bako sanang tanganing saindong atenderan kundi pakikabtangan, na nagtatao nin komento kun ini hinahagad?” Kun naheheling kamo kan saindong mga aki na nakikiestoryahan sa oras kan pagtiripon o kun kamo o an iba nakikikawat sa sainda, anong impresyon an itatao kaiyan sa sainda? Ano an magigin pagheling ninda sa oras nin pagtiripon? Mantang an mga aki arog-arogan, an saindong halimbawa puwedeng magkaigwa nin dakulang epekto sa sainda.
5 An ibang magurang nadiskobre na nakatatabang na tawan pati an saradit na aki nin sadiring kopya kan mga babasahon na ginagamit sa pagtiripon. Tibaad sa pampamilyang pag-adal, tinatabangan ninda an saindang mga aki na mag-andam nin tamang komento. Siring man, madadagka nin mga magurang an saindang mga aki paagi sa pagrepaso sa mga punto na pinag-olayan sa pagtiripon asin paagi sa pagtao nin panahon na simbagon an saindang mga hapot. An mga magurang maninigo man na alistong omawon an saindang mga aki sa saindang pakikikabtang sa mga pagtiripon.
6 Totoo na an pagtotokdong ini nagkakaipo nin pagpapagal nin mga magurang. Minsan siring, an paggibo sa mga bagay sono sa dalan nin Dios nagbubunga nin marahay na mga resulta. Arog kan sabi kan kasuratan: “An matanos naglalakaw sa saiyang integridad. Maogma an saiyang mga aki na masurunod sa saiya.”—Tal. 20:7.