An mga Pagtiripon Nagtatao nin Pakinabang sa Satong Kaakian
1 Pinagbotan an nasyon kan Israel na “tiponon . . . an mga lalaki asin an mga babae asin an saradit . . . , tanganing sinda maghinanyog asin tanganing sinda makanood.” (Deut. 31:12) Iyo, an kaakian kairiba sa mga pagtiripon para sa pagsamba kan Israel. Siring man ngonyan, an satong mga pagtiripon sa kongregasyon nagtatao nin pakinabang sa kaakian.—Sal. 148:1, 12.
2 Siempre pa, an kaakian kaipuhan na tokdoan na maghinanyog nin atento sa kun ano an sinasabi sa mga pagtiripon. Kaipuhan man ninda an tabang sa pagsabot kan ibang materyal na iinaatubang. An minasunod na mga suhestion tibaad makatabang sa satong kaakian tanganing makinabang nin orog sa mga pagtiripon.
MAG-ANDAM PARA SA MGA PAGTIRIPON
3 An tamang pagpatood sa harong makatatabang sa kaakian na pahalagahan na an pakitipon kairiba nin iba sa pagsamba ki Jehova nagpapaheling nin pagkuyog sa kabotan nin Dios.—Sal. 133:1; Isa. 48:17; Mat. 19:14.
4 An personal na pag-aandam magpapaorog kan kagayagayahan kan aki sa mga pagtiripon. Makatatabang kun an mga aki igwa kan saindang sadiring Biblia, librong kantahan asin iba pang publikasyon na ginagamit. An mga magurang kaipuhan na tabangan an mga hobenes na mag-andam nin kabtang kan leksion para sa lambang pagtiripon.—Heb. 10:23.
5 An ibang mga aki nakikinabang paagi sa pagkakaigwa nin espesyal na mga gibohon durante kan mga pagtiripon. An mga akion pa puwedeng magnotar kun pirang beses sinambit an ngaran nin Dios o an Kahadean. Idtong mas matua nin dikit puwedeng asignaran na ilista an mga kasuratan na binasa o kinotar. Puwede man sindang tawan nin oportunidad pagkatapos na magkomento sa mga puntong nanodan sa pagtiripon.
6 An gabos na aki na nakababasa na kaipuhan na tabangan na magkaigwa nin programa sa pagbasa kan mga publikasyon kan Sosyedad, arog baga kan mga librong Bible Stories, Dakulang Paratokdo, asin Youth, siring man an mga artikulo sa mga magasin.
PAGGUBING ASIN PAMOMOSTURA
7 Naobserbaran na an paagi kan paggubing sa aki igwa nin relasyon sa saiyang kaisipan asin paggawe sa mga pagtiripon. Kun nagbibisita sa sangang opisina kan Sosyedad, angay pareho sa mga aki asin nasa edad na na maggubing kapareho kun sinda maduman sa pagtiripon kan kongregasyon.—om p. 131.
8 An marahay na paggawe kan mga aki sa mga pagtiripon nagdadara man nin kaomawan asin onra ki Jehova. Kun siring, an mga magurang kaipuhan na magdanay na may mapagbantay na pagmangno sa mga pagtiripon. Iaareglo nin nagmamakolog na mga magurang na an pamilya magturukaw na taraed asin siertohon na an saindang mga aki nagdadanay na may angay na paggawe durante kan mga pagtiripon. Para sa dugang na nakatatabang na mga suhestion, an mga magurang puwedeng makipag-olay sa mga nagkakaigwa nin marahay na kapangganahan sa saindang mga saradit.
9 Pagmawot niato na an mga aki makikabtang nin lubos sa pagsamba sa satong Kristianong mga pagtiripon asin ‘sadolon an iba sa pagkamoot asin sa marahay na mga gibo.’ (Heb. 10:24) Sa areglo nin Dios na Jehova, an mga pagtiripon para man sa kaakian.