Magmaigot Para sa Malinig na Pagsamba
1 Si Jehova an maigot na Dios. (Isa. 9:7; 59:17) Malalaoman na an gabos na namomoot ki Jehova magigin maigot man sa pagsamba sa saiya. Kapareho ni Jesus, nagpapaheling sinda nin tunay na pagmakolog sa kamurawayan ni Jehova asin sa espirituwal na kapakanan nin katawohan.—Sal. 69:9; Juan 2:17.
2 Paagi sa organisasyon ni Jehova nag-aako kita nin daing ontok na mga pagirumdom tanganing matabangan kita na magmaigot sa satong paglilingkod ki Jehova. Paagi sa pagkuyog sa mga pagirumdom na ini, dai kita magigin paramas sana sa satong pagsamba. (Sal. 119:113) Aarogon niato an maigot na mga tawo na kapareho ni Jehu asin ni apostol Pablo, saka an iba pang maimbod na mga lingkod nin Dios.—2 Hade 10:16; 1 Cor. 14:12.
SA MINISTERYO SA LANGTAD
3 Sa bulan nin Hunyo, magkakaigwa kita nin marahay na mga oportunidad na magpaheling nin kaigotan sa pakikikabtang niato sa ministeryo sa langtad. Boot niatong gamiton an presenteng Topikong Mapag-oolayan, “An Biblia Nagtatao nin Pakinabang sa Buhay Pampamilya” kaiba an isinusuherir na alok, an librong Happiness—How to Find It. Paano daw ini magigibo?
4 Pakapagpamidbid, puwede nindong ihapot: “Narisa daw nindo na an dakol na pamilya nadedepisilan na tagalan an mga problema sa buhay ngonyan asin bilang resulta dakol na pamilya an mayo nin kaogmahan? [Pasimbagon.] Minsan ngani an iba garo baga marahay an kamugtakan, an dakol pang iba nag-aagi sa magagabat na problema magpoon sa problema sa kuwarta sagkod sa pagdiskompiar asin pagkalaglag kan pag-agoman asin kan pamilya. Sa paghona nindo saen makadodolok an mga miembro nin pamilya para sa masasarigan na hatol? [Pasimbagon.] An Dios, na iyo an autor sa pag-agoman, nagtatao sato kan pinakamarahay na hatol sa buhay pampamilya. Helinga kun paano sinasabi kan Genesis 1:27, 28 an katuyohan nin Dios para sa pamilya nin tawo. [Basahon.] An Dios iyo an Saro na nakaaaram kun ano an kaipuhan kan pamilya tanganing magkaigwa nin tunay na kaogmahan. Kita gabos makikinabang sa pagkuyog sa mga instruksion nin Dios manongod sa buhay pampamilya. [Basahon an Isaias 48:17, 18.] An librong ini na Happiness—How to Find It ipinublikar sa katuyohan na giyahan an satong atension sa mga prinsipyo kan Biblia na nagtatao nin pakinabang sa buhay pampamilya.” Dangan, pakaapoda kan atension sa sarong espisipikong punto sa kapitulo singko sagkod dies kan librong Happiness, ialok iyan sa kagharong. An saro pang puwedeng ialok, an librong Survival Into a New Earth epektibo man na ikaaalok may koneksion sa presenteng Topikong Mapag-oolayan paagi sa pagdodoon na an kaligtasan nagin dakulang bagay na pinaghahaditan nin mga pamilya sa satong panahon. An pambihirang mga hula sa Biblia malinaw na nagpapaheling na may mga makaliligtas asin ipinublikar an libro tanganing matabangan an dakol na makabilang sa sainda.
5 Mantang ipinahahayag niato an maogmang bareta, dakol na may sadiosan na puso an nakakaheling na kita “sarong banwaan na . . . maigot sa marahay na mga gibo.”—Tito 2:14.