Magmaigot sa Pagpalakop kan Mensahe kan Kahadean
1 Si Jehova Dios nin marahay na mga gibo, asin sia maigot sa paghaman kaiyan. An gabos na ginigibo nia para sa ikararahay kan mga naglilingkod sa saiya. Si Jesus nagtao nin marahay na halimbawa sa pag-arog sa kaigotan kan saiyang Ama. Kita man dapat na magpaheling nin kaigotan sa satong paglilingkod ki Jehova Dios kun boot niatong mamidbid bilang banwaan na “maigot sa marahay na mga gibo.”—Tito 2:14.
2 An marahay na gibo nin mga Kristiano pinakikinabangan nin iba. An pinakakapakipakinabang na magigibo niato para sa iba tabangan sia na mamidbid si asin makapaglingkod ki Jehova. (Juan 17:3) Itinatao niato an tabang na iyan paagi sa satong maigot na paghuhulit kan Kahadean asin paggibo nin mga disipulo.
3 Ano an kaigotan? An kaigotan laad nin boot. An Kristianong kaigotan gikan sa odok na pagmawot na gibohon an tama asin maninigo. An termino sa Griego para sa “kaigotan” nangangahulogan “magkalakaga.” Bilang mga ministro nin Dios, maninigo niatong ipahayag an kuwalidad na ini mantang ilinalakop niato an mensahe kan Kahadean. Kita daw maigot sa ministeryo? Ginigibo daw niato an bilog niatong makakaya tanganing matabangan an iba na makanood manongod sa mga katuyohan ni Jehova?
IPAHELING AN KAIGOTAN SA PAG-ALOK NIN SUSKRIPSION
4 Sa bulan nin Oktubre, magkakapribilehiyo kita liwat na ialok an suskripsion sa Awake! sa laog nin sarong taon. An Awake! pinaaaram an mga parabasa manongod sa makahulogan na mga pangyayari sa kinaban. An nakaaapod nin atension na mga ilustrasyon kaiyan na nagpapaheling kan mga ngangalasan sa mga linalang nakapupukaw nin interes sa bagong kinaban asin pinarararom an apresasyon sa mamomoton na Kaglalang.
PAGGIBO KAN SATONG KABTANG
5 Bago niato madadagka an mga may sadiosan na puso na basahon an satong mga magasin, kaipuhan na aram niato kun ano an laog kan kada magasin. Kaipuhan na pamilyar kita sa kun paano niato ikakokonektar an Topikong Mapag-oolayan sa isyu na gagamiton niato sa pag-alok. Anong espisipikong mga punto sa magasin an masasambitan niato? Kun tatawan niato nin panahon an pagigin pamilyar sa mga magasin asin an pagpukaw sa satong isip nin entusiasmo dian, masasangkapan kita na iatubang iyan na may kaigotan sa mga yaon sa satong teritoryo.
6 Saro pa, paagi sa pagdara kan bagong mga magasin mantang kita nananaod, nakasakay sa pampublikong transportasyon, sa eskuwelahan, sa satong pinagtatrabawohan, o magsaen man kita, maaaprobetsaran niato an angay na mga oportunidad na makapagpatotoo. An marahay an pagkapiling introduksion sa librong Reasoning kaiba an sarong punto hale sa saro sa mga artikulo tibaad makapukaw sa pagmawot nin tawo na basahon an satong mga magasin.
7 Kun an tawo umoyon na basahon an mga magasin, puwede niatong ipaliwanag an satong gibohon asin kun paano an mga magasin na ini ipinupublikar nin duwang beses kada bulan bilang kabtang nin lakop sa kinaban na pagtotokdo kan Biblia. An impormasyon sa pahina 4 kan Awake! magayonon an pagkapaliwanag kaini. Mantang nalilista permi an laog kan masunod na luwas, puwede kitang magpalataw nin konektadong mga hapot o mag-apod nin atension sa maarabot na artikulo. Tibaad mapukaw kaini an gana kan tawo asin mapahiro siang magpahayag nin pagmawot na sumuskriber sa mga magasin.
8 Mantang delikadong mga panahon ngonyan, an mensaheng dara niato apretado. Kaipuhan na kita magmaigot sa pagpalakop kan mensahe kan Kahadean, na dinadagka an iba na midbidon an Dios asin an saiyang Tataramon. Paagi sa maigot na pagpalakop kan kaaraman na ini na nagtatao nin buhay, kita nagtatao nin ebidensia sa satong diosnon na debosyon asin sa satong pagkamoot ki Jehova. Mientras na orog kitang nakikakabtang sa pagpalakop kan mensahe kan Kahadean, madudugangan man an satong kaigotan asin orog man niatong mapatutunayan na kita man nanggad banwaan na maigot sa marahay na mga gibo.