Itampok an mga Brochure Tanganing Ikahiras an Saindong Paglaom sa Kahadean
1 Mantang naheheling niato an kaotoban kan hula sa Biblia, kita naggagayagaya sa satong paglaom sa Kahadean, asin kita napahihiro na magtaram dapit dian sa siisay man na maghihinanyog. (Luc. 6:45; Roma 12:12) An satong pagtatampok kan mga brochure sa paglilingkod sa langtad sa Agosto sarong paagi na ikahihiras niato an satong paglaom sa Kahadean sa iba arog kan ipinagboot ni Jesus.—Mat. 24:14.
2 Mantang igwa kita nin nagkapirang brochure na mapagpipilian, arin sa mga iyan an tibaad pinakamarahay sa pangangaipo kan mga nasa satong teritoryo asin makapupukaw kan saindang interes? Tanganing mapakinabangan nin marhay an mga brochure, kaipuhan na maaraman niato an mga laog kaiyan. Makatatabang an minasunod na halipot na pagrepaso sa bagay na ini.
3 The Government That Will Bring Paradise: Kan si Jesus yaon pa digdi sa daga, an Kahadean nin Dios an tema kan saiyang paghuhulit. Ipinaheheling kan brochure na ini na an Kahadean sarong tunay na gobyerno asin kun paano reresolberan kaiyan an mga problema na ginigibong masakit na gayo an buhay ngonyan.
4 Enjoy Life on Earth Forever!: Ipinaliliwanag kaiyan kun taano ta linalang nin Dios an tawo asin kun paano niato makakamtan an buhay sa daga sagkod lamang. An mga ilustrasyon asin haralipot na paliwanag sa brochure na ini nakaiinteres sa mga hobenes asin sa may limitadong abilidad sa pagbasa.
5 The Divine Name That Will Endure Forever: Ipinaliliwanag kan brochure na ini an ngaran nin Dios paagi sa Makakasuratan asin makasaysayan na pagmansay, na ipinaheheling kun taano ta mahalaga para sa mga Kristiano na maaraman an ngaran asin gamiton iyan sa saindang pagsamba.
6 “Uya! Ginigibo Kong Bago an Gabos na Bagay”: Ilinaladawan kan brochure na ini an paraiso asin pinakokosog an pag-apresyar para sa Biblia asin sa satong Kaglalang. Pakatapos na pag-olayan kun taano ta tinotogotan nin Dios an karatan, isinisentro kaiyan an atension sa tolong pangenot na katokdoan kan Biblia: an pantubos, pagkabuhay liwat, asin an Kahadean. Igwa man an brochure na ini nin mga hapot sa ibaba kan mga pahina, na pinagigin pasil an satong pagkondukta nin pag-adal sa Biblia dian.
7 Should You Believe in the Trinity?: Puwedeng sabihon kan mga tawo na nagtutubod sinda sa Trinidad, alagad sinda nagkakalaenlaen sa saindang pakasabot dapit dian. Sinisimbag kan brochure na ini an mga hapot na: Ano an Trinidad? Itinotokdo daw iyan kan Biblia? Si Jesu-Cristo daw an makapangyarihan sa gabos na Dios asin kabtang nin Trinidad? Ano an banal na espiritu, asin paano iyan naghihiro?
8 Kun nakapili na kita nin mga brochure na boot niatong gamiton, maninigo niatong repasohon an mga artikulo sa pahina na nasa likod kan luwas na ini kan An Satong Ministeryo sa Kahadean. Digdi maheheling niato an mga suhestion para sa pag-alok kan satong literatura asin paggibo nin mga pagdalaw liwat na may pasohan na mapatalubo an interes asin makapoon nin pag-adal sa Biblia.
9 Sa dakol na okasyon, baga man sa pormal o impormal na pagpapatotoo, an sarong partikular na brochure iyo sana an kaipuhan tanganing makatao nin marahay na patotoo. An bendisyon logod ni Jehova sa satong maigot na paglilingkod magbunga nin mas dakol pa na naggagayagaya kaiba niato sa paglaom sa Kahadean!—Gibo 13:47, 48.