Pagbabalik na May Pasohan na Makapoon nin Pag-adal sa Biblia
1 Pakatapos kan enot na pakanompong sa interesadong tawo, kaipuhan na pagdanayon ta na buhay an interes na ini. An paggibo nin mga pagdalaw liwat puwedeng direktang gumiya sa pag-adal sa Biblia. Konsideraron an mga suhestion na ini sa paggibo nin epektibong mga pagdalaw liwat.
Sa katapusan kan enot na pagsongko, puwede nindong ibugtak an pundasyon para sa pagdalaw liwat paagi sa paghapot:
◼ “Noarin tatapuson nin Dios an kasakitan?” Sa pagbabalik puwede nindong sabihon: “Kan huri kong pagdigdi, an hapot na pinalataw kun noarin tatapuson nin Dios an kasakitan. Sa iwinalat ko saindong librong Creation igwa nin malinaw na simbag sa pahina 223. [Basahon an parapo 20, 21.] Dangan digdi sa pahina 224 asin 225 may mga ebidensia na kita nabubuhay na ngonyan sa panahon na mahiro na an Dios tanganing tapuson an gabos na kasakitan.” Ialok an pag-adal sa Biblia.
2 Pagmidbid sa mga Tunay na Nagsusunod sa Biblia: Tanganing an Dios nasa relihiyon, maninigo na iyan nagpapaluwas kan tamang mga bunga.
Sa pagpopoon nin pag-dalaw liwat, puwede nindong ihapot:
◼ “Paano an relihiyon maninigong makaapektar sa gawe nin saro? An sinabi ni Jesu-Cristo sa Mateo 7:17-20 nagtatao sa sato kan mga giya na linalaoman na kuyogon nin tunay na relihiyon. [Basahon.] Mantang minilyon an naghihingakong nagtutubod sa Dios, dakol an nagpapainda saiya paagi sa saindang mga gibo. Anong klase nin mga gibo an nagpapamidbid sa mga nabubuhay kaoyon kan Biblia? Itinatao kan librong Creation sa pahina 229 sagkod 231 an tolong simpleng tanda nin midbidan.” Buksan an libro asin sambiton sa halipot an tolong punto basado sa Isaias 2:2-4, Juan 13:35, asin Mateo 24:14. Dangan sabihon na mabalik sa sarong semana tanganing pag-olayan ini sa dakol pang detalye.
3 Ano an nakatagama sa ngapit para sa mga naghahanap sa tunay na Dios? An pag-orolay sa hapot na ini hale mismo sa librong Creation puwedeng gumiya sa pag-adal sa Biblia.
Sa pagpopoon nin pag-orolay, puwede nindong sabihon:
◼ “Sa siring na mga kamugtakan kan ekonomiya ngonyan, kadakol na tawo an naghahadit dapit sa ngapit. Togotan nindo ako na ihiras saindo an panuga nin Dios sa Isaias 65:21, 22, 25. [Basahon.] Sinisimbag kan librong Creation an pirang interesanteng hapot dapit digdi, poon sa parapo 10 sa pahina 238.” Idemonstrar an areglo nin pag-adal sa Biblia, na ginagamit an parapo 10-12. “Sa sarong semana boot ko na ipakipag-olay an dakol pa sa mga hulang ini kan Biblia, poon sa parapo 13.”
4 An paggibo nin mga pagdalaw liwat na may pasohan na makapoon nin pag-adal sa Biblia puwedeng mangahulogan nin buhay na daing katapusan sa mga hinuhulitan niato.