Pagpapatotoo sa “Gabos na Klase nin Tawo”
1 Kun nakanonompong kita nin mga tawo na laen-laen an kultura o relihiosong pinaghalean, ginigirumdom niato na an kabotan ni Jehova iyo “na an gabos na klase nin tawo makaligtas asin makaabot sa tamang kaaraman kan katotoohan.” (1 Tim. 2:4) Dagdag pa sa dakol na pulyeto asin brosyur na espesyal na inandam, igwa kita nin duwang ekselenteng publikasyon na puedeng gamiton sa ano man na panahon tangani na tabangan an mga indibiduwal na an relihion dai sainda nagtokdo kan katotoohan manongod sa Dios asin ki Cristo.
2 An librong Mankind’s Search for God nagtatao nin pakarorop sa ginikanan kan mayor na mga relihion kan kinaban asin paagi kaiyan matatabangan an mga tawo sa gabos na lugar na pagkompararon an saindang mga paniniwala asin an itinotokdo kan Biblia dapit sa solamenteng tunay na Dios. Sa ibong na lado, paagi sa pagtampok kan buhay ni Jesu-Cristo, an The Greatest Man Who Ever Lived makatatabang sa saro na orog na mamidbid an Aki nin Dios asin maparani an boot sa saiya, siring kan dakol na tawo kan enot na siglo. (Juan 12:32) Kun angay, tibaad gusto nindong probaran an minasunod na mga suhestion sa pag-introdusir kan mga librong ini.
3 Kun sa paghona nindo angay na ialok sa saro an librong “Greatest Man,” puede nindong ihapot:
◼ “Ano an minasabong sa isip nindo kun hinohorophorop nindo si Jesu-Cristo? [Pasimbagon.] An dakol na historyador rinerekonoser si Jesus bilang an pinakadakulang tawo na nabuhay kasuarin pa man. [Magkotar nin sarong halimbawa sa introduksion na nasa librong Greatest Man.] Ipinaheheling kan Biblia na an buhay ni Jesus sarong modelo na dapat niatong arogon.” Basahon an 1 Pedro 2:21 asin an enot na parapo sa huring pahina kan introduksion sa librong Greatest Man. Kun interesado an kagharong na makanood dapit ki Jesus, ialok an libro. Bago kamo humale, basahon an Juan 17:3 asin ihapot, “Paano niato makukua an kaaraman na ini na minagiya pasiring sa buhay na daing katapusan?” Gumibo nin depinidong mga areglo na mabalik liwat para sa simbag.
4 Sa pagbalik nindo tangani na ipaliwanag kun paano makukua an nagtataong-buhay na kaaraman, puede nindong sabihon:
◼ “Nanuga akong mabalik liwat tanganing ipaheling sa saindo kun paano niato makukua an kaaraman na minagiya pasiring sa buhay na daing katapusan.” Iatubang an librong Kaaraman, asin ginagamit an enot na kapitulo, idemonstrar an pag-adal.
5 Kun boot nindong ialok an librong “Mankind’s Search for God,” puede kamong magsabi:
◼ “Huli sa kadakol na laen-laen na relihion ngonyan, napag-isip-isip na daw nindo kun paano niato maaaraman kun arin an inooyonan nin Dios?” Pakasimbag, buksan an librong Mankind’s Search for God sa pahina 377. Itampok an punto numero 7, asin hapoton kun minaoyon an kagharong na maninigong napagsasararo kan tunay na relihion an gabos na rasa nin katawohan. Helingon an saro sa sitadong mga teksto, asin mantang itinotogot nin oras, ipakipag-olay an nagkapira sa iba pang mga punto na nasa lista. Kun may tunay na interes, ialok an libro. Kun mahale na, puede nindong ihapot, “Ano an maninigong magin epekto kan tunay na relihion sa gawe-gawe nin saro?” Iareglo na madalaw liwat tanganing simbagon an hapot.
6 Pagbalik nindo tanganing ipaliwanag kun ano an epekto kan tunay na relihion sa buhay nin saro, puede nindong ihapot:
◼ “Sa paghona nindo ano an maninigong magin epekto nin relihion sa gawe-gawe nin saro? [Pasimbagon.] Tinawan kita ni Cristo nin pamantayan na iyo an paagi na maninigong sokolon an relihion.” Basahon an Mateo 7:17-20 hale mismo sa pahina 12 sa librong Mankind’s Search for God. Dangan agdahon an kagharong na basahon an parapo 20 sa pahina 13-14. Kun itinotogot nin oras, ipakipag-olay an parapo 25-9 sa pahina 16-18. Puede ining magbunga nin pag-adal magsalang sa brosyur na Kahagadan o sa librong Kaaraman.
7 Mga Pampoon sa Pag-orolay: Dakol an pantabang sa pagtotokdo na nasa librong Mankind’s Search for God, na puedeng gamiton bilang mga pampoon sa pag-orolay sa enot na pagsongko o pagdalaw liwat. Puede nindong ponan an pakikipag-olay paagi sana sa sarong angay na hapot. Halimbawa, mangnoha an mga hapot asin topikong ini patin an mga pahina kun saen iyan ipinaliliwanag:
“Questions That Require an Answer”—17-18.
“Was Jesus a Myth?”—237.
“Who Wrote the Bible?”—241.
“The Qur’ān and the Bible”—285.
“Evidence of the Bible’s Authenticity”—340-1.
“What Jehovah’s Witnesses Believe”—356-7.
“How to Identify the True Religion”—377.
8 Puede nindong buksan an piniling (mga) pahina sa librong Mankind’s Search for God asin ipaliwanag an puntong iinaatubang. Dangan iareglo an pagdalaw liwat paagi sa sarong konektadong hapot na puedeng simbagon magsalang sa brosyur na Kahagadan o sa librong Kaaraman. Siertohon na imbitaran an kagharong sa Pampublikong Pagtiripon, asin magwalat nin handbill.
9 An gabos na klase nin sadiosan an pusong mga tawo naghahanap kan katotoohan manongod sa Dios asin ki Cristo. Puede niato sindang tabangan sa satong pagpatotoo. Kun siring, padagos kitang ‘magpagal asin maghingoa, huli ta ibinugtak niato an satong paglaom sa nabubuhay na Dios, na Paraligtas sa gabos na klase nin mga tawo.’—1 Tim. 4:10.