Pag-alok kan Mankind’s Search for God
1 Kadakol ngonyan kan nakamamate na an relihiyon sarong pribadong marhay na bagay. Kaya, puwedeng nakaaangat na makipag-olay sa satong mga kataraed dapit sa temang ini. Pero ngonyan igwa na kita kan librong Mankind’s Search for God, na makatatabang sato na maabot an mga tawo na may laen-laen na relihiyosong pinaghalean. Iaalok niato ini sa langtad sa Nobyembre.
2 Ano an saindong sasabihon tanganing mapukaw an interes kan kagharong na basahon an libro? An minasunod na suhestion makatatabang sato na ipaheling sa satong kataraed an pangangaipo na “hanapon si Jehova.”—Isa. 55:6.
3 Taano ta Dapat na Siyasaton Kun Ano an Satong Sasabihon?: Mantang an dakol kontento na sa saindang relihiyon asin dai interesado sa pagliliwat, tibaad kaipuhan niato na iangay an satong introduksion tanganing matabangan an kagharong na siyasaton na may bukas na kaisipan kun ano an satong sasabihon.
4 Pakatapos nin angay na pataratara, puwede nindong sabihon:
◼ “Sa pakikipag-olay sa samong kataraed, naheling niamo na kadakol kan kontento na sa saindang relihiyon asin habong magliwat. Pero kun magkakaigwa an mga tawo nin panahon na siyasaton an mga paniniwala kan iba, sa paghona daw nindo puwede ining gumiya sa mas marahay na pakasabot asin diit na pagkaongis sa kinaban? [Pasimbagon an kagharong.] Mangnoha an sinasabi kan Biblia manongod sa mga namomoot sa Dios asin kun paano an maninigong pagtratar ninda sa iba.” Pakabasaha kan Gibo 17:26, 27, darahon an atension sa parapo 15 asin 16 sa pahina 10 kan librong Mankind’s Search for God.
5 Kadakol kan nakadiskobre na an pagbukas sa sarong kapitulo kan libro na naglalaman kan relihiyon kan kagharong makakukua kan saiyang atension. Mangnoha kun paano ini puwedeng gibohon.
6 Pakatapos na ipamidbid an sadiri, puwede nindong sabihon:
◼ “Huli sa kadakol na relihiyon ngonyan, nakapaghorophorop na daw kamo kun paano kita makasisierto na an satong relihiyon inooyonan nin Dios?” Pakakomento kan kagharong, darahon an saiyang atension sa kahon na nasa pahina 377 kan librong Mankind’s Search for God, na nagpapaheling kan sampulong paagi na mamimidbid an tunay na relihiyon, na itinotokdo partikularmente an punto numero 7. Hapoton an kagharong kun minaoyon sia na an saro na nagsasagibo nin tunay na relihiyon maninigo na mamatean an siring dapit sa ibang rasa asin nasyonalidad. Basahon an mga kasuratan na sinitar.
7 Iba Pang Nakatatabang na Kabtang: Puwede man na gamiton an indese kan mga tema sa likod kan libro. Halimbawa, kun kadakol kan nagsasabi na an gabos na relihiyon parareho, helingon an temang “Religion” asin an sub-temang “‘all religions equal’: 12.” An limang “Questions That Require an Answer” sa pahina 17-18 tibaad espesyalmenteng makainteres sa mga naghahapot kun baga an Biblia nagtotokdo kan ihinuhulit kan kadaklan na relihiyon.
8 Paagi sa paggamit nin epektibong mga pantulay sa libro, puwede niatong matabangan an mga tawo na nakakaolay niato na hanapon an sarong tunay na Dios, si Jehova.