An Pangangaipo kan Katawohan na Hanapon an Dios
1 Durante sa ika-20 siglong ini, nagkaigwa nin kadakol na mobimiento nin populasyon bilang resulta nin mga guerra, pangigipit, asin kadepisilan sa ekonomiya. Dinara kaini an laen-laen na grupo nin relihiyon sa mas haraning pagkairiba. Kaya bakong pambihira sa satong gibohon na paghuhulit na makanompong nin mga tawo na manlaenlaen an relihiyosong pinaghalean.
2 Tanganing matabangan kitang masabotan an ibang relihiyon asin an saindang kasaysayan, igwa na kita ngonyan kan librong Mankind’s Search for God. Sinisimbag kaiyan an kadakol na hapot manongod sa mga paniniwala kan darakulang relihiyon sa kinaban. Gagamiton ta iyan sa satong ministeryo sa Nobyembre. Ano an puwede niatong itampok tanganing madagka an mga odok sa boot na makanood nin orog pa dapit sa Dios?
3 An sarong pangenot na hapot na sinisimbag kan libro iyo an: Igwa daw nin inmortal na kalag an tawo na nabubuhay pagkagadan? Haros gabos na relihiyon itinotokdo an ideyang ini. An iba pang hapot na pinalataw sa libro iyo an: Igwa daw nin impierno kun saen pinasasakitan an mga kalag? Ano an paglaom para sa gadan? Igwa daw nin sarong Dios o kadakol na dios? Puwede nindong darahon an atension sa mga hapot sa pahina 17-18 kan libro.
4 An gabos na tawo nangangaipo na hanapon an Dios ngonyan na an Armagedon haranihon na. Gurano kadakulang pribilehiyo niato na dagkahon an iba na hanapon si Jehova ngonyan mantang puwede pa siang manompongan! (Isa. 55:6, 7) Nagtatao an librong Mankind’s Search for God nin impormasyon para sa mga tawong may laen-laen na pinaghalean. Halimbawa, an parapo 26 sa pahina 297 nagpapaliwanag sa mga Muslim na an tunay na Kristianismo dai nagtotokdo kan doktrina nin Trinidad.
5 Igwa kita nin gabos na dahelan na magin entusiastiko dapit sa pag-alok kan librong ini. Kun pamilyar kitang marhay sa mga laog kaiyan, makakukua kita nin mga oportunidad tanganing mapukaw an interes kan odok an boot na mga tawo sa gabos na relihiyon. Ipaheling logod niato an kaigotan para sa paglilingkod na ini.
6 Si Jehova matinao asin maheherakon na Dios. Kanigoan kaboot kan saiyang imbitasyon na makanood dapit saiya! Puwedeng magkaigwa nin mas dakol pang magigin mga paraomaw ki Jehova. Sa Nobyembre, sa tabang kan librong Mankind’s Search for God, matatabangan niato an dakol sa Kakristianohan siring man an mga nasa bakong Kristianong pinaghalean na sumamba ki Jehova “sa espiritu asin katotoohan.” (Juan 4:23, 24) Maghingoa logod kita sa paghanap sa mga naghahanap nin katotoohan asin pakosogon an saindang relasyon sa Dios nin katotoohan. Puwede siang manompongan!