Pag-aatubang kan Maogmang Bareta—Sa Pag-alok kan Mankind’s Search for God
1 Sa paghulit niato sa harong-harong, sa tinampo, asin sa impormal na paagi, kun minsan nakanonompong kita nin mga tawong may relihiyon na bakong Kristiano. Kun kita may dikit sanang kaaraman sa saindang relihiyon, tibaad masakit sa sato na makatao nin epektibong patotoo manongod sa Kahadean. Ngonyan, paagi sa bagong publikasyon na Mankind’s Search for God, mas masasabotan niato an mayor na mga relihiyon kan kinaban asin an mga paniniwala kan mga tawong ini. Kita masasangkapan na matabangan an pinakadakol sagkod sa posible tanganing makahale “sa siod kan Diablo.”—2 Tim. 2:24-26; Tito 3:2.
2 Kun nakanonompong kita nin mga Muslim, Judio, Hindu, Sikh, Budhista, o iba pa, puwede niatong may kabootan na tawan nin atension an saindang paniniwala asin puwedeng sabihon: “Nakaiinteres na makanompong nin mga tawo kan dakol na manlaenlaen na relihiyon. An paghanap kan katawohan sa Dios nagkaigwa nin kadakol na manlaenlaen na direksion. Pero dai daw kamo maoyon na parateng an mga tawo naghihingako kan relihiyon kan saindang mga magurang, imbes na hanapon mismo ninda an Dios? Sa ibang pananaram, namundag sinda sa sarong partikular na relihiyon. Ini an punto sa enot na kapitulo kan librong ining Mankind’s Search for God. [Ipaheling an pahina 8, parapo 12.] An pakanood nin orog dapit sa ibang relihiyon nakaiinteres. An librong ini nagpapaliwanag kan pinaghalean, mga gawe, asin mga katokdoan kan mayor na mga relihiyon sa kinaban.” Dangan buklaton an mga pahina tanganing ipaheling an ibang ilustrasyon kan relihiyon na hinihingako kan kagharong. Ipaliwanag na kamo boluntaryo bilang kabtang kan panbilog na kinaban na paghihingoa tanganing matabangan an mga tawo sa saindang paghanap sa Dios. Pakosogon an tawo na basahon an libro.
3 An saro pang paagi iyo an direktang pagbuklat sa kapitulo na nagpapaliwanag kan sadiring relihiyon kan kagharong. Siertong an Hindu maaakit sa mapa kan India sa pahina 123 asin sa mga retrato sa pahina 96 asin 117. Tibaad makanompong kita nin Sikh na may turbante. An pahina 100-101 nag-aatubang nin halipot na sumaryo kan pagtubod na iyan.
4 An Muslim tibaad magngalas na maheling an mga retrato kan Mecca asin Kaʽbah sa pahina 289 asin an mga kinotar hale sa Qurʼān sa pahina 288 asin sa ibang pahina. An mga Budhista tibaad magpaheling nin interes sa kapitulo 6 asin sa mga ilustrasyon sa pahina 141 asin 157. An mga tawong may Intsik na pinaghalean mag-aapresyar kan kapitulo 7, manongod sa Taoismo asin Confucianismo, asin sa mga ilustrasyon sa pahina 171 asin 173. An kadaklan na Hapones mag-aapresyar kan mga ilustrasyon sa pahina 190 asin 195 sa kapitulong “Shinto—Japan’s Search for God.”
5 Kun makanompong kita nin mga ateista asin mga agnostiko, an kapitulo 14, na may titulong “Modern Disbelief—Should the Search Continue?,” makaakit sa mga sinsero sa tahaw ninda. An mga argumentong apabor sa paniniwala sa Dios manonompongan magpoon sa pahina 334 padagos.
6 Sa siisay man na naghihingakong kabilang sa relihiyon kan Kakristianohan, an kapitulo 10 tibaad makapukaw nin interes. An pahina 236 naghahapot, “Jesus—What Were His Credentials?” An pahina 243 asin 251 nag-iilustrar kan duwang milagrong ginibo ni Cristo. Paano niato maaaraman na si Jesus may pag-oyon nin Dios? An ilustrasyon sa pahina 253 sinisimbag an hapot na iyan.
7 Maliwanag, tanganing ikabagay niato an satong presentasyon sa kada indibiduwal, kaipuhan niatong maaraman an mga laog kan libro asin magin pamilyar sa pagkasunodsunod kan mga kapitulo asin mga ilustrasyon. (Para sa dugang na suhestion helingon an Reasoning From the Scriptures, pahina 21-4.) Sa siring puwede kitang makasabwag nin banhi kan katotoohan paagi sa mataktikang pag-aatubang kan bagong librong ini. (1 Cor. 9:19-23; Col. 4:5, 6) Mantang an Biblia parateng kinokotar para sa pagkomparar sa bilog na libro, may marahay na basehan para sa pagpoon nin mga pag-adal sa Biblia. An sarong artikulo kan An Satong Ministeryo sa Kahadean sa masunod na bulan magsusuherir kun paano kita magibo nin pagdalaw liwat tanganing makapoon nin mga pag-adal sa mga tawo na kabilang sa dakol na pagtubod.