Tabangan an Kaakian na Maglingkod ki Jehova Gikan sa Puso
1 Sinabi ni Salomon na an “mga aki mana hale ki Jehova.” (Sal. 127:3-5) An mga magurang igwa nin paninimbagan na itinao nin Dios na magtokdo asin magdisiplina sa saindang mga aki. Kabale digdi an pagsasanay sa ministeryo, na dinadagka sinda na magtaram gikan sa puso dapit ki Jehova.—Efe. 6:4.
2 Sa anong edad kaipuhan na ponan kan mga magurang an pagsasanay na ini? Malinaw an simbag kan Biblia: Maninigo na iyan poon sa pagkaomboy. (2 Tim. 3:14, 15) Mientras na mas amay na pinoponan an pagsasanay, mas dakula an posibilidad na mapatatalubo kan kaakian an mapusog na pundasyon sa katotoohan asin gigibohon an ministeryo na saindang karera. An amay na pagsasanay na ini magsiserbi man na protehiran sinda sa kinabanon na mga kaisipan asin gawe.
3 Kadakol na dai pa nag-eeskuwela an nakapaheling nin kakayahan sa pagsabot sa komplikadong mga abilidad. Kaipuhan na an kakayahan na ini sa pakanood sa amay na edad gamiton sa pagsasanay sainda sa mga abilidad na nakatatao nin pag-oyon ni Jehova. (w88-BI 8/1 p. 23 [w88 8/1 p. 15]; w89 12/1 p. 31) Dakol sa mga akion pang marhay an nag-oswag sagkod sa punto na nagin dai pa bautisadong mga parahayag. An iba sa kaakian minagibo nin pagdusay asin nababautismohan bago pa nagin mga tin-edyer. Binuksan kaini an dalan para sainda na maglingkod bilang mga auxiliary payunir asin regular payunir pa ngani bago matapos sa saindang pag-eskuwela.
4 An ibang gurang na tibaad an pagheling sa mga hobenes ngonyan agresibo asin daing paggalang tibaad habong magdangog sa sarong hoben na nagsosongko. Ano an puwedeng sabihon nin hoben na parahayag tanganing mapangganahan ini? Ginamit nin sarong hoben na parahayag an arog kaini: “Marahay na aldaw po, ako si ․․․․․․․․. Nandadalaw po ako sa sakong mga pagtaraed ngonyan huli ta kadakol kan nahahadit dapit sa ngapit. Bilang maedad na, siertong mas eksperyensiado po kamo sa mga bagay sa buhay kisa sako. Pero, uya po an sarong kasuratan na nakaaaling sa sato gabos.” Pakatapos na basahon an Kapahayagan 21:3, 4, puwedeng isentro an pag-orolay sa tract na Life in a Peaceful New World.
5 An saro pang suhestion iyo an: “Kumusta po, ako si ․․․․․․․․. Dinadalaw ko po sa madali an mga pagtaraed huli ta aram ko na dakol na mga maedad na an nahahadit dapit sa iginagawe kan mga hobenes ngonyan. Kun minsan po an mga hobenes nagpapaheling nin daing paggalang na ugale. Pero uya po an sarong kasuratan na nagpapaheling kun paanong sa maabot na panahon an gabos makanonood na mamuhay nin iriba sa katoninongan.” Dangan basahon an Salmo 37:11 asin komentohan nin angay. Kun madangog nin mga kagharong an siring na odok sa boot na mga kapahayagan kan satong hoben na mga parahayag, siertong dakol sa sainda an mahanga nin marhay.
6 Rinibo sa mga hoben na parahayag an maigot na nakikakabtang sa gibohon na paghuhulit kan Kahadean. Kaipuhan na komendaran sinda. An mga hobenes na sinanay kan saindang diosnon na mga magurang poon sa pagkaomboy tolos-tolos na minahiro sa pagpapakosog na magkaigwa nin lubos na pakikakabtang sa ministeryo. An mga nag-eeskuwela igwa nin pambihirang oportunidad na hulitan an mga kaklase asin maestro man.
7 Kaya tabangan an mga hoben na parahayag sa saindong kongregasyon na maglingkod ki Jehova na may kabagsikan, na inoomaw sia gikan sa puso.—Ecl. 12:1.