Maogmang Pag-abot sa “Diosnon na Debosyon” na Pandistritong Kombension
IGWA kita nin marahay nanggad na tema para sa pandistritong kombension sa taon na ini: “Diosnon na Debosyon”! Asin tinawan kita ni Jesu-Cristo nin marahay nanggad na halimbawa sa banal na debosyon! Bakong makangangalas na pinasabngan si apostol Pablo na magsurat manongod sa saiya: “Sa katotoohan, an banal na hilom kan diosnon na debosyon na ini tunay na dakula: ‘Sia nahayag sa laman, ipinahayag na matanos sa espiritu, nagpaheling sa mga anghel, ihinulit sa mga nasyon, tinubod sa kinaban, inako duman sa kamurawayan.’ ”—1 Timoteo 3:16.
Pakokosogon kita kan satong pandistritong kombension na magin mga tawo nin tunay na diosnon na debosyon, siring ki Jesus. Kaya, enot sa gabos, mawot niato na siertohon na dai nanggad niato togotan an ano man na makaolang sa satong pakikabtang sa espirituwal na kapiyestahan na ini. Kun siring, nasa satong mga tukawan na kita sa Biyernes nin aga sa alas 8:50 tanganing magayagayahan sa musikal na presentasyon asin sa siring nasa tamang kamugtakan nin isip na makinabang nin lubos sa minasunod na programa. An piniling tema para sa enot na aldaw iyo an “Paglilingkod sa Dios na Naghahagad nin Dai Nababangang Debosyon,” na basado sa Exodo 20:5. Angay nanggad an pahayag kan tsirman: “Maogmang Pag-abot, Nindo mga Tawo nin Diosnon na Debosyon!” Sa enot na aldaw, mapapakosog man kita kan mga pahayag na nagpapaheling kun taano ta ipinipirit ni Jehova an diosnon na debosyon asin kun taano ta kaipuhan kitang makanood kan hilom kan diosnon na debosyon. Magkakaigwa man nin nakaoogmang impormasyon dapit sa pagkamidbid sa tunay na Dios asin sa pagigin tunay kan saiyang Tataramon.
An tema sa Sabado iyo “An Diosnon na Debosyon Nangangahulogan nin Dakulang Pakinabang,” basado sa 1 Timoteo 6:6. Sa Sabado nin aga, mag-aako kita nin impormasyon manongod sa kun ano an kaipuhan tanganing ipagpadagos an diosnon na debosyon. Asin siyempre pa, magkakaigwa nin pahayag para sa bautismo para duman sa mga andam na maglaog sa paagi nin buhay sa diosnon na debosyon. Sa Sabado nin hapon idodoon sato an pangangaipo nin kaimbodan sa “maimbod asin madonong na oripon,” asin makakanood kita kun paano niato puwedeng ipaheling an mga gibo nin diosnon na debosyon sa laog kan pamilya. Huli sa mga problema na naaatubang kan satong mga hobenes, magkakaigwa nin espesyal na mensahe para sa sainda.
“Isikwal an Kabikoan asin Mamuhay sa Diosnon na Debosyon,” na kinua sa Tito 2:12, an tema para sa Domingo. Sa Domingo nin aga, mag-aako kita nin nagkapirang napapanahon na instruksion na nagpapatanid sato tumang sa “tawo nin katampalasanan” asin tumang sa pagkalagalag manongod sa pagkakan asin pag-inom, pamomostura, asin pag-aling-aling. (2 Tesalonica 2:3) Susundan ini kan modernong panahon na drama na nagdodoon kan importansia kan pagpapasakop niato sa Dios. An pahayag publiko sa hapon mag-aatubang nin maogmang bareta na harani na an kaligtasan para sa mga tawo nin diosnon na debosyon. An satong espirituwal na kapiyestahan matatapos sa pag-orolay na nagpapaheling na “Mahalaga an Satong Padagos na Pagpatood sa Diosnon na Debosyon.”
Kaya mag-abot na andam na subaybayan sa saindong mga Biblia an mga reperensia kan mga tagapagtaram asin ilista an risang gayong mga punto hale sa mga pahayag sa suratan na papel. An pagkua nin mga nota dakulang tabang sa konsentrasyon asin sa lubos na pakikinabang sa nadadangog nin saro. Asin nungka na malingawan niato an katotoohan na dakol na gayong gibohon an kinaipuhan tanganing magpunsionar an kombension sa mahusay asin aregladong paagi asin kadakol na kamot an nagpapagian kan gibohon. Paagi sa pagboboluntaryong makatabang, marerealisar niato an mas dakulang kaogmahan sa pagtatao.—Gibo 20:35.
Kaya an satong diosnon na debosyon logod an magpahiro sato na mag-atender sa kombension na ini asin magmotibar sa sato na makinabang nin lubos digdi. Logod magpuli kitang napakosog asin determinado na mamuhay sa diosnon na debosyon nin lubos pa.