Mga Magurang—Sanayon an Saindong mga Aki na Maghulit
1 An satong mga kongregasyon igwa nin dakol na aki na may sinserong pagmawot na maglingkod sa Dios. (Ecl. 12:1) Kabale sinda sa mga inimbitaran ni Jehova na makikabtang sa pag-omaw sa saiya. (Sal. 148:12-14) Huli kaini, maninigong kabale sa aroaldaw na pagsasanay na itinatao kan mga magurang sa saindang mga aki an pagtokdo kun paano ihihiras an saindang pagtubod sa iba sa paghuhulit kan Kahadean.—Deut. 6:6, 7.
2 Sanayon an mga Aki sa Progresibong mga Paagi: Maninigong sanayon an mga aki sa pinakaamay na edad na umiba sa saindang mga magurang sa ministeryo. Bago umiba sa paglilingkod, andamon an saindong mga aki na makikabtang sa makatuyohan na paagi. Ipaaram nin patienot kun ano an linalaoman nindong gigibohon ninda sa pinto. An sadit pang marhay na mga aki puedeng magtao nin mga tract asin handbill patin imbitaran an mga tawo sa Kingdom Hall. An mga aki na marahay magbasa puedeng agdahon na bumasa nin mga teksto sa pinto. Puede sindang mag-alok nin mga magasin, na ginagamit an halipot na pag-atubang. Mantang nagkakaigwa sinda nin kabatidan, sanayon sinda na gamiton an Biblia sa saindang pag-atubang. An dakol na hoben na parahayag nagpoon na kan saindang sadiring ruta sa magasin asin regular na nagdadalaw liwat. Pinakamarahay para sa sarong aki na maghulit kaiba nin sarong adulto imbes na nin sarong hoben. Puedeng ipaliwanag kan adulto sa kagharong na sinasanay an aki sa ministeryo.
3 An sarong sadit na aking babae nagpatabang sa kamagurangan tangani na makualipikar sia bilang parahayag kan Kahadean. Dawa ngani limang taon pa sana sia kan panahon na idto asin dai pa tataong bumasa, ikinaaatubang nia nin epektibo an mensahe kan Kahadean sa mga pinto. Tinuom nia an lokasyon kan mga teksto, binubukasan iyan, ipinababasa iyan sa kagharong, dangan nagtatao sia nin paliwanag.
4 Maninigo man na itokdo sa mga aki paagi sa halimbawa nin mga magurang an kahalagahan nin pagkaigwa nin marahay na iskedyul para sa regular na pakikikabtang sa ministeryo. Kaipuhan na establisaron nin mga magurang an daing liwat-liwat na semanal na pinagkatodan sa paglilingkod asin otobon iyan, tanganing aram kan mga aki kun anong kabtang kan semana an perming itinatagama para sa paghuhulit.
5 Kun sinasanay an mga aki poon sa pagkaaki na mamotan asin ikaogma an ministeryo, mamomotibar sinda na pag-aaboton an orog pang mga pribilehio sa ngapit, tibaad kabale an paglilingkod bilang payunir. (1 Cor. 15:58) Kita gabos maninigong enkaminaron an mga aki sa tahaw niato na umoswag na marhay bilang mga paraomaw ki Jehova.