Tokdoan an Saindong mga Aki na Omawon si Jehova
1. Puede daw na omawon si Jehova nin sadit na mga aki?
1 Ineenganyar kan Awit 148:12, 13 an mga aking lalaki asin babae na ‘pag-omawon an ngaran ni Jehova.’ An Kasuratan igwa nin dakol na halimbawa nin sadit na mga aki na naggibo kaiyan. Halimbawa, “si Samuel naglilingkod [kaidto] sa atubangan ni Jehova, bilang sarong aki.” (1 Sam. 2:18) “Sarong sadit na aking babae” an nagsabi sa agom ni Naaman na an makakapaomay sa daot ni Naaman iyo an propeta ni Jehova sa Israel. (2 Ha. 5:1-3) Kan si Jesus lumaog sa templo asin gumibo nin makapangyarihan na mga gibo, “mga aking lalaki” an nagkagsing: “Ligtasan tabi an Aki ni David!” (Mat. 21:15) Paano matotokdoan nin mga magurang an saindang mga aki na omawon si Jehova?
2. Taano ta importante na magtao an mga magurang nin marahay na halimbawa sa saindang mga aki?
2 Halimbawa: Bago itadom sa puso kan saindang mga aki an katotoohan, tinokdoan nguna an mga amang Israelita na kamotan si Jehova asin mamugtak sa sainda mismong puso an saiyang mga pagboot. (Deut. 6:5-9) Kun kamo magtataram nin nakakaparigon manongod sa ministeryo asin gigibohon nindo iyan na kabtang kan saindong semanal na iskedyul, mamansayon kan saindong mga aki na importante asin nakakakontento an ministeryo.
3. Paano nakinabang an sarong tugang na babae sa halimbawa kan saiyang mga magurang?
3 An sarong tugang na babae gustong-gustong girumdomon: “Kan nagdadakula ako, kaiba sa rutina kan samong pamilya an pakikikabtang sa ministeryo sa langtad kada katapusan kan semana. Naheheling ko na an sakong mga magurang talagang maogma sa paghuhulit. Nagdakula kami na an pagmansay sa ministeryo bagay na kawiliwili.” An tugang na ini nagin dai pa bautisadong parahayag kan sia siete anyos asin nasa ika-33 nang taon kan saiyang pambilog na panahon na paglilingkod.
4. Ano an boot sabihon kan pagsasanay sa mga aki sa progresibong paagi?
4 Progresibong Pagsasanay: Ilabot an saindong mga aki mantang kamo nakikikabtang sa ministeryo. Puede gayod sindang magtuktok sa pinto, magtao nin pulyeto sa kagharong, o magbasa nin teksto. Ini magtatao sa sainda nin kaogmahan asin matatabangan sinda na magkaigwa nin kompiansa sa saindang kakayahan na magpaabot kan mensahe kan Kahadean. Mantang sinda nagigin mas may edad, dapat na madagdagan an saindang pakikikabtang sa ministeryo. Kun siring, tabangan sinda na magin progresibo asin mag-isip-isip manongod sa espirituwal na mga pasohan.
5. Ano an kaipuhan tangani na makualipikar an sarong aki bilang dai pa bautisadong parahayag?
5 Kaolayon tolos an kamagurangan kun sa pagmate nindo kualipikado na an saindong mga aki na magin dai pa bautisadong mga parahayag asin kun ipinapahayag ninda an saindang pagmawot na magin siring. An pagigin parahayag itutudok sa isip ninda an saindang personal na paninimbagan na omawon si Jehova. Girumdomon na bago makualipikar an sarong aki dai man kaipuhan na an kaaraman nia kapareho kan sa bautisadong mga adulto. Nasasabotan daw kan aki nindo an pundamental na mga katokdoan sa Biblia? Sinusunod daw nia an moral na mga pamantayan kan Biblia? Mawot daw niang makikabtang sa ministeryo asin mamidbid bilang saro sa Mga Saksi ni Jehova? Kun iyo, puede nang magdesisyon an kamagurangan na sia kualipikado na bilang dai pa bautisadong parahayag.—Helingon an Organisado sa Paggibo kan Kabotan ni Jehova, p. 79-82.
6. Taano ta kapakipakinabang na sanayon nin mga magurang an saindang mga aki?
6 Nagkakaipo nin paghihingoa an pagtotokdo sa mga aki na omawon si Jehova gikan sa saindang puso. Minsan siring, pira sanang bagay an dahelan nin orog na kagayagayahan sa mga magurang kisa sa pakaheling sa saindang mga aki na umoswag sa espirituwal. An mas importante, naoogma si Jehova kun an mga aki nagtataram manongod sa saiyang makangangalas na mga gibo.