Sanayon an mga Aki Nindo na Magin mga Ministro

1. Basado sa Salmo 148:12, 13, ano an obligasyon nin Kristianong mga magurang?

¹ Iniimbitaran ni Jehova an mga hoben na omawon sia. (Sal. 148:12, 13) Kun siring, dai sana tinotokdoan nin Kristianong mga magurang an mga aki ninda dapit sa mga katotoohan sa Biblia asin mga ley nin Dios dapit sa moral. Sinasanay man ninda an mga ini na magin mga ministro kan maogmang bareta. Paano ini progresibong magigibo?

2. Ano an puedeng magin epekto sa mga aki kan marahay na halimbawa kan saindang magurang?

² Marahay na Halimbawa: Sinabihan ni Hokom Gideon an saiyang 300 na tawohan: “Makanood kamo sa pagmamasid sa sako.” (Hok. 7:17) Natural sana na minamasdan asin inaarog nin mga aki an saindang mga magurang. An sarong ama nagtatrabaho sa banggi, alagad imbes na magtorog kun minapuli nin Sabadong aga, iiniiba nia an saiyang mga aki sa ministeryo dawa ngani pagal-pagal na sia. Dawa mayo nin ano man na sinasabi, tinotokdoan nia sinda na an ministeryo sarong prioridad. (Mat. 6:33) Naoobserbaran daw kan saindong mga aki na magayagaya kamong nakikikabtang sa manlaenlaen na aspekto nin pagsamba, arog nin pamimibi, pagbasa kan Biblia, pagkomento, asin paghuhulit? Siempre, dai kamo magigin sangkap na halimbawa. Alagad mas may tendensiang maghimate an saindong mga aki sa paghihingoa nindong tokdoan sindang sambahon si Jehova kun naheheling ninda an saindong kahigosan sa paglilingkod sa saiya.—Deut. 6:6, 7; Roma 2:21, 22.

3. Maninigong tabangan nin mga magurang an saindang mga aki na magkaigwa asin aboton an anong progresibong espirituwal na mga pasohan?

³ Progresibong mga Pasohan: An mga magurang dai nagsasawa sa pagsanay sa mga aki ninda na maglakaw, magtaram, magbado nin solo, asin iba pa. Mientras na naaabot nin mga aki an mga pasohan mantang nagdadakula sinda, napapaatubang man sinda sa bagong mga pasohan. Kun Kristiano an mga magurang, tinatabangan man ninda an saindang mga aki na magkaigwa nin espirituwal na mga pasohan, asin aboton iyan, segun sa saindang edad saka kakayahan. (1 Cor. 9:26) Tinotokdoan daw nindo an saindong mga aki na magkomento sa sadiri nindang tataramon asin mag-andam kan sadiri nindang kabtang sa Teokratikong Paadalan sa Pagmiministro? (Sal. 35:18) Sinasanay daw nindo sinda na makikabtang sa manlaenlaen na aspekto kan ministeryo? Dinadagka daw nindo sinda na magin pasohan an pagpabautismo asin bilog na panahon na paglilingkod? Tinatabangan daw nindo sinda na makiasosyar sa magayagaya asin maigot na mga ebanghelisador na makakadagka sa sainda?—Tal. 13:20.

4. Paano an mga aki nakikinabang sa pagkaigwa nin mga magurang na sinasanay sinda sa ministeryo poon sa pagkaaki?

⁴ An salmista nagsabi: “O Dios, tinokdoan mo ako magpoon sa sakong pagkaniaki, asin sagkod ngonyan padagos kong ipinapahayag an saimong makangangalas na mga gibo.” (Sal. 71:17) Mientras na aki pa, ponan na sanayon an mga aki nindo na magin mga ministro. An espirituwal na pundasyon na pinapatalubo ninda sa tabang nindo siertong matao sa sainda nin pakinabang sagkod sa saindang pagkaadulto!—Tal. 22:6.