Anong mga Pasohan an Ibinubugtak Nindo sa Atubangan kan Saindong mga Aki?
1 An kapangganahan sa buhay minadepende sa pagbugtak asin pakaabot sa kapakipakinabang na mga pasohan. Kaipuhan an kadonongan tanganing mamansayan kun arin na mga katuyohan an pag-aaaboton tanganing “makapangapot nin marigon sa tunay na buhay.” (1 Tim. 6:19) Kanigoan an pasasalamat niato na eksaktong ipinaheheling sa sato ni Jehova kun arin na dalan an maninigong lakawan!—Isa. 30:21.
2 Si Jehova nagtatao nin marahay na halimbawa sa mga magurang. Imbes na pabayaan an saindang mga aki na kulang an eksperyensia na iyo an pumili kun arin na dalan an pinakamarahay, an madonong na mga magurang sinasanay sinda sa dalan na maninigo nindang lakawan, asin kun sinda maggurang na, “dai [sinda] masiko dian.” (Tal. 22:6) An Kristianong mga magurang nakaaaram basado sa eksperyensia na sinda kaipuhan na magtiwala ki Jehova. (Tal. 3:5, 6) An pangangaipong ini mas dakula para sa mga aki, na limitado an kaaraman asin eksperyensia.
3 An mga magurang puedeng magbugtak sa atubangan kan saindang mga aki nin kapakipakinabang na mga pasohan na matabang sa sainda na magkonsentrar sa “orog na mahalagang mga bagay.” (Fil. 1:10) Sinda puedeng magpoon sa pampamilyang pag-adal sa Biblia, na pinakokosog an mga aki na apresyaron iyan. Marahay na ugaleon kan mga aki na mag-adal nin patienot para sa mga pagtiripon sa kongregasyon asin mag-andam na magkomento sa saindang sadiring tataramon. Importante an regular na pakikabtang sa paghuhulit. An mga aki puedeng tumabang paagi sa pag-alok nin mga tract, o magasin, o pagbasa nin mga teksto. Kun nakababasa na sinda, an pagpalista sa Teokratikong Paadalan sa Pagmiministro makatatabang sa saindang espirituwal na pag-oswag. An makualipikar bilang dai pa bautisadong parahayag o akoon para sa bautismo sarong mayor na tangga sa pag-oswag.
4 Mantang nagdadakula an saindang mga aki, an mga magurang maninigong realistikong ipakipag-olay sa sainda an manongod sa mga pasohan na karera. An mga parakonseho sa eskuelahan asin mga kaklase madaling makaimpluwensia sa sainda apabor sa materyalistikong mga pasohan. An mga magurang maninigong tabangan an saindang mga aki sa pagpili nin mga kurso sa eskuelahan na nagtatao nin praktikal na pagsasanay, na nagsasangkap sainda na mapangatamanan an saindang materyal na mga pangangaipo na dai isinasakripisyo an intereses kan Kahadean. (1 Tim. 6:6-10) Puede sindang pakosogon na ipagpadagos an “balaog” na pagigin daing agom dangan sa huri, kun sinda magdesisyon na mag-agom, makakaya na nindang isaabaga an magabat na mga paninimbagan sa pag-agom. (Mat. 19:10, 11; 1 Cor. 7:36-38) An pagtaram sa positibong paagi manongod sa pagpapayunir puedeng makatanom sa aki minsan sa hoben pang edad nin pagmawot na gamiton an saindang buhay sa paagi na nakapaoogma ki Jehova, nakikinabang an iba, asin an saindang sadiri.
5 Kadakol kan satong hoben sa organisasyon ngonyan na nangangapot sa halangkaw na Kristianong mga pamantayan asin nagmamaigot na maabot an teokratikong mga pasohan. An dakol na kapangganahan ninda ikaaatribwir sa mamomoton na mga magurang. Kun kamo sarong magurang, pasaen daw an direksion kan saindong mga aki? Sinda daw progresibong nag-ooswag pasiring sa buhay na nakasentro sa intereses kan Kahadean? Girumdomon, an saro sa pinakaimportanteng magigibo nindo iyo na itadom an katotoohan sa saindong mga aki asin sabihon iyan kada aldaw. Tibaad kamo bendisyonan nin sarong pamilya na maimbod na naglilingkod ki Jehova.—Deut. 6:6, 7; Jos. 24:15.