An mga Kagayagayahan sa Bilog na Panahon na Paglilingkod
1 Bilang sarong hoben, daing duwa-duwa na hinorophorop mo na an manongod sa saimong ngapit. An Talinhaga 21:5 nagsasabi sa sato na “an mga plano kan mahigos seguradong nagbubunga nin bentaha.” Magigin bentaha para sa saimo na seryosong horophoropon an saimong mga pasohan sa buhay. Mantang ika nagpaplano para sa ngapit, estudyare an paglaog sa bilog na panahon na paglilingkod. Taano?
2 Hapota an nagkapirang nasa edad na na nagpayunir durante kan saindang mga taon nin pagkahoben kun ano an saindang mga impresyon asin pirme nindang sasabihon an iyo man sanang bagay: “Idto an pinakamarahay na mga taon sa buhay ko!” An sarong tugang na lalaki na nakaeksperyensia kan mga kagayagayahan sa bilog na panahon na paglilingkod poon sa pagkahoben nia nagsabi sa huring kabtang nin buhay nia: “Iyan gikanan nin hararom na satispaksion na magirumdoman an panahon nin pagkahoben asin makapagsabi na hinimate nin saro an madonong na hatol na: ‘Girumdoma, ngonyan, an saimong Kaharohalangkaweng Kaglalang sa mga aldaw kan saimong pagkahoben na lalaki.’” (Ecl. 12:1) Kaipuhan an maingat na pagplano ngonyan, ika sagkod kan saimong mga magurang, na gumibo nin paagi na maeksperyensiahan mo an klaseng ini nin kagayagayahan sa saimong pagkahoben na lalaki o pagkahoben na babae.
3 Mga Magurang, Enkaminaron an Bilog na Panahon na Paglilingkod: Si Jehova, bilang mapagmakolog na Ama, ipinaheheling sa saindo nin eksakto kun saen kamo malakaw. (Isa. 30:21) Sa pagtao nin siring na mamomoton na giya, sia nagtatao nin marahay na halimbawa para sa saindo bilang Kristianong mga magurang. Imbes na pabayaan na an mga aki nindo an pumili kun arin na dalan an pinakamarahay para sa sainda, madonong na sanayon sinda sa dalan na maninigo nindang lakawan tangani na magkamit sinda kan bendisyon ni Jehova. Dangan, kun dakula na sinda, makatatabang an pagsasanay nindo sa sainda na “mamidbid kun ano an tama sagkod an sala.” (Heb. 5:14) Aram nin mga nasa edad na gikan sa eksperyensia na dai sinda makapagtitiwala sa sadiri nindang paghusgar; dapat sindang magsarig ki Jehova na itanos an saindang dalan. (Tal. 3:5, 6) An pangangaipong ini mas dakula pa ngani para sa mga hoben, na dikit pa an eksperyensia sa buhay.
4 Mga magurang, mantang nagdadangadang an mga aki nindo sa mga taon nin pagkatinedyer, o mas amay pa ngani, kaolayon sinda sa realistikong paagi manongod sa saindang mga pasohan na karera. An mga parakonseho sa eskuelahan, paratokdo, asin kaklase hihingoahon na impluwensiahan sinda apabor sa kinabanon, materyalistikong mga okupasyon. Tabangan an mga aki nindo na pumili nin mga kurso sa eskuelahan na nagtatao nin praktikal na pagsasanay, na inaandam sinda na asikasohon an saindang materyal na mga pangangaipo na dai isinasakripisyo an intereses kan Kahadean. (1 Tim. 6:6-11) Sa dakol na kamugtakan, an edukasyon sa haiskul kaiba an bokasyonal asin/o eksperyensia sa trabaho tibaad iyo sana an kaipuhan tangani na maasikaso nin igo an mga pangangaipo nin saro mientras na nagpopoon sa ministeryo bilang regular payunir.
5 Enkaminaron an mga hoben na ipagpadagos an balaog nin pagigin daing agom. Kun sa huri magdesisyon sindang mag-agom, sinda nasa mas marahay nang kamugtakan na mag-asumir nin mas magagabat na paninimbagan sa pag-agom. (Helingon an parapo 19 sa suplemento kan Hunyo 2001 An Satong Ministeryo sa Kahadean na, “Puede daw Kamong Magpresentar?”) Paagi sa pagtaram nin positibo manongod sa pagpapayunir, paglilingkod kun saen mas dakula an pangangaipo, paglilingkod sa Bethel, asin pagmimisyonero, itadom sa mga hoben dawa aki pa an pagmawot na gamiton an saindang buhay sa paagi na nakapaoogma ki Jehova, kapakipakinabang sa iba, asin nagtatao nin kagayagayahan sa saindang sadiri.
6 Mga Hoben, Enoton an Bilog na Panahon na Paglilingkod: Mga hoben, dai kaipuhan na kamo nali sa kun anong klase an pagpapayunir. Puede nindong probaran iyan paminsanminsan paagi sa pag-auxiliary payunir kun posible sa bilog na taon nin pag-eskuela asin durante kan mga panahon nin bakasyon. Dangan maaaraman nindo kun gurano talaga kanakakokontento kan paglilingkod bilang payunir! Puede na daw kamong magplano nin patienot na mag-auxiliary payunir poon ngonyan asin sa katapusan kan tig-init?
7 Kun ika hoben na tugang na lalaki sa organisasyon nin Dios, odok man na pakaisipon an manongod sa pag-aabot na makualipikar bilang ministeryal na lingkod. (1 Tim. 3:8-10, 12) Saro pa, magdesisyon kun baga boot mong mag-aplay para sa paglilingkod sa Bethel o umatender sa Paadalan sa Ministeryal na Pagsasanay, oras na maabot mo an kahagadan na edad. An saimong eksperyensia sa ministeryo bilang payunir matokdo sa saimo nin mahalagang mga leksion, arog baga kan kun paano mamumuhay sono sa iskedyul, kun paano paooswagon an saimong personal na organisasyon, kun paano makakasundo an iba, asin kun paano mapatatalubo an pagigin responsable. Aandamon ka kaini gabos para sa mas dakulang mga pribilehio nin paglilingkod sa huri.
8 An mahalagang bagay tangani na magin mapanggana sa bilog na panahon na paglilingkod iyo an pagkaigwa nin espiritu nin teokratikong kahigosan. Inenkaminar ni apostol Pablo an siring na aktitud, asin sinabi nia an ibubungang mga pakinabang: “Ano man an saindong ginigibo, gibohon iyan nin bilog na kalag na siring baga kun para ki Jehova, . . . huli ta aram nindo na hale ki Jehova mag-aako kamo kan tamang balos.” (Col. 3:23, 24) Bendisyonan logod kamo ni Jehova nin dakol na kagayagayahan sa bilog na panahon na paglilingkod!