Nag-aalok daw Kamo nin mga Pag-adal sa Biblia?
1 Kadakol kan nagkakaigwa nin marahay na kapangganahan sa pagpopoon nin mga pag-adal sa Biblia paagi sa paggamit nin direktang pagdolok sa pag-aalok sa mga tawo kan oportunidad na mag-adal kan Biblia. An sarong lalaki na nagsayuma sa literatura sa nagkapirang beses nagsimbag tolos-tolos kan alokan nin pag-adal sa Biblia. Sia nagsimbag: “Kaidto pa gusto ko nang mag-adal sa Biblia.” Naponan an pag-adal sa Biblia, asin an bilog na pamilya madaling nag-oswag.
2 An gabos kaipuhan na magin alisto sa pagpopoon nin mga pag-adal. Tanganing umoswag an mga indibiduwal sa pagigin mga disipulo ni Cristo, maninigo sindang tokdoan. (Mat. 28:19, 20) Tanganing matokdoan, kaipuhan ninda na may mag-adal sainda sa Biblia. Sa parate mapoponan an mga pag-adal paagi sana sa pag-alok na idemonstrar kun paano an kagharong makanonood nin dakol pa dapit sa Biblia asin sa mga panuga nin Dios. Nakapoon an sarong tugang na lalaki nin limang pag-aadal sa tract na Life in a Peaceful New World. Mantang dai nia kayang konduktahan nin regular an siring kadakol na pag-aadal sa Biblia, pinonan niang itao an mga inaadalan sa Biblia sa ibang parahayag.
3 Kun naheheling niato na pasil na makapoon nin pag-adal, puwede niatong iiba an ibang parahayag asin tabangan sindang makakua man nin mga pag-adal. O puwede tang itao an ibang inaadalan na naponan niato sa iba na nasa kongregasyon. Kun boot nindong makapagkondukta nin pag-adal sa Biblia, taano ta dai probaran na mag-alok nin pag-adal sa Biblia sa mga nanonompongan nindo sa paglilingkod sa harong-harong? Sarong halimbawa an sarong parahayag na nagdalaw liwat sa sarong daragita na dai nagpaheling nin dakol na interes. Minsan siring, inalok sia kan parahayag na mag-adal sa Biblia, asin inako nia. Ngonyan bautisado na sia, asin an saiyang tugang na babae asin an agom kaini nag-aatender naman sa mga pagtiripon.—Gal. 6:6.
4 Bakong gabos na naponan niatong adalan magpapadagos na mag-adal. Bakong gabos na nag-aadal makalalaog sa katotoohan. Alagad an iba iyo. Mientras na mas dakol na pag-aadal an napoponan niato, mas dakol man an posibilidad na matatabangan niato an iba na magin mga paraomaw ki Jehova.