Magin Alisto sa Pagpopoon nin Pag-adal sa Biblia
1 An pagpopoon asin pangengenot sa mga pag-adal sa Biblia kabtang kan sugo sa sato bilang mga Saksi ni Jehova. (Mat. 28:19, 20) Kun siring, magigin saro daw kamo sa mga katabang nin Dios sa paggibo kaini? (1 Cor. 3:9) Kanigoan kadakulang pribilehiyo na tabangan an iba na mamidbid an kadarudakulaing Persona sa uniberso!
2 Huli sa kadakol na problema may koneksion sa marikason an pagkaliwat na mga pangyayari sa kinaban, an dakol na may sadiosan na puso naghahanap nin simbag sa kun taano ta nangyayari an mga bagay na ini. Kaidto pang suanoy itinao ni Jehova an simbag sa mga hapot na ini. Kun an mga sinsero tinotokdoan sa Tataramon nin Dios, sinda nararanga. Kun siring, kaipuhan kitang mag-alisto sa mga oportunidad na makapoon nin pag-adal sa Biblia.—Tal. 3:27.
MAGIN ALISTO SA MGA OPORTUNIDAD
3 Naisip na daw nindong ponan an pag-adal sa Biblia sa sarong haraning paryente o kamidbid na mayo sa katotoohan? An pakamidbid sa sainda matao saindo nin bentaha sa paggamit nin pagmansay sa kun noarin an angay na panahon na ipakipag-olay iyan sa sainda. Kun napupukaw an pag-usyoso nin saro, parateng minasunod an mabungang mga orolay, asin tibaad maponan an pag-adal sa Biblia.
4 Sa dakol na kaso an marahay na ugale nin sarong agom na Kristiano nakabukas kan dalan tanganing an daing pagtubod mapasa katotoohan. (1 Ped. 3:1, 2) An daing pagtubod na agom asin iba pang daing pagtubod na mga miembro kan pamilya sa kadaklan inaapresyar kun sinda minimidbid asin iginagalang kan mga miembro kan kongregasyon. An pagpaheling nin personal na interes sa sainda dakula an magigibo sa pagtogdok nin makikatood na relasyon. Paagi sa pakipagtabangan sa agom o miembro kan pamilya na nasa katotoohan, tibaad makaestablisar kamo nin pag-adal sa Biblia.
5 Mantang naghaharongharong, puwede niatong probaran na ponan an pag-adal sa Biblia sa enot na pagsongko. An ibang parahayag nagin mapanggana digdi kun an kagharong naghahapot nin mga bagay na direktang masisimbag hale sa sarong publikasyon. Kun an tawo umoyon na basahon an literatura o kun palaogon nia kita, puwede niatong aprobetsaran an oportunidad na ipadagos an orolay asin tibaad idemonstrar an sarong pag-adal. Sa maabot na mga pagsongko, tibaad boot nindong ipadagos na ipakipag-olay an temang iinintrodusir nindo kan enot na pagsongko.
IMPORMAL NA MGA OKASYON
6 Magin alisto sa mga okasyon para sa impormal na pagpatotoo, asin magin andam paagi sa pagdara nin dakol na pulyeto asin magasin na mapakosog sa interes kan naghihinanyog sa katotoohan. (Ecl. 11:1) An impormal na pagpatotoo puwedeng magin saro pang paagi sa paghihingoa niato na makapoon nin mga pag-adal sa Biblia.
7 An paggibo nin mga disipulo bako sanang para sa nagkapira. Iyan para sa gabos na yaon sa kongregasyon. An paggirumdom na isinugo sa mga Kristiano na gumibo nin mga disipulo magpapakosog sato na magin alisto sa mga oportunidad na makapoon nin mga pag-adal sa Biblia.