Itampok an Torrengbantayan Ngonyan na Abril
1 Kan an Ingles na Torrengbantayan enot na lumuwas kan Hulyo, 1879, 6,000 na kopya sana an iniimprenta sarong beses kada bulan sa saro sanang tataramon. Ngonyan, pakalihis nin haros 109 taon, labing 13 milyones na kopya kada luwas an iniimprenta sa 103 na tataramon, asin an kadaklan digdi duwang luwas kada bulan. An siring na pag-oswag nagtatao nin ebidensia sa pag-oyon ni Jehova sa instrumentong ini na ginagamit nia tanganing ipahayag an katotoohan manongod sa saiyang Kahadean.
2 Baga man sa halipot pa sanang panahon o dakol na taon na nindong binabasa An Torrengbantayan, nasisierto mi na inaapresyar nindo an espirituwal na mga pakinabang na inako nindo. An Torrengbantayan nagparigon sa saindong pagsarig sa Kahadean nin Dios bilang an solamenteng paagi na magkaigwa nin katoninongan sa daga. Napatanidan kamo kaiyan manongod sa mga peligro sa delikadong mga panahon na ini. (2 Tim. 3:1-5) Nakatabang iyan saindo na akoon an “karangahan hale sa Kasuratan” asin masasarigan na paggiya hale sa Tataramon nin Dios. (Roma 15:4; Sal. 119:105) Mantang hinohorophorop an mga pakinabang na ini, dai daw kamo napapahirong isabi sa iba an halaga kan An Torrengbantayan? Sa Abril, iaalok an sarong taon na suskripsion sa kontribusyon sanang ₱30.00 o ₱60.00 sa ibang tataramon na duwa kada bulan an luwas.
MAGIN POSITIBO SA SAINDONG PUNTO-DE-VISTA
3 An kadonongan nin Dios asin bakong pangangatanosan nin tawo an idinodoon sa An Torrengbantayan. An siring na kadonongan makakapakarhay sa buhay asin makakapatalubo sa tamang mga motibo. Ini kaipuhan tanganing “magdanay na buhay.” (Tal. 9:1-6) Kaya ikaaalok niato an suskripsion na may positibong kaisipan. Maingat na repasohon an kada luwas tanganing makanompong nin mga kapahayagan na makatatabang sa mga kagharong. Ini makatatabang saindo na magin positibo sa pag-aatubang kaiyan.
4 An bayad sa Torrengbantayan kadikit sana kun ikokomparar sa halaga nin mga pakinabang na itatao sa nagbabasa. Kaya may kompiansang ialok an suskripsion sa lambang oportunidad. An iba tibaad gustong ialok an Awake! kaiba kan Watchtower sa kontribusyon na ₱120.00, na kadikit sanang halaga kun ikokomparar sa dakol na kinabanon na babasahon.
AN TORRENGBANTAYAN NAKATATABANG NA GUMIBO NIN MGA DISIPULO
5 Magin determinado na balikan an gabos na nawarasan asin pagmaigotan na pataluboon an interes na ipinaheling. An ibang tugang nagkakaigwa nin mga ruta sa magasin sa mga nagkukua nin manarosarong kopya kan magasin. Kun an saro makabasa nin sarong kopya kan mga magasin, tibaad magkainteres sia. Kaya bumalik asin ialok an minasunod na luwas, na itinatampok an sarong espisipikong artikulo na makapupukaw nin interes. Pakabasa nin nagkapirang luwas, tibaad boot niang sumuskriber.
6 An pagtatampok kan Torrengbantayan ngonyan na Abril maninigong magtao sato nin magayagayang satispaksion. Mantang nakinabang mismo kita, may kompiansa niatong ikaaalok iyan sa iba, sa siring tinatabangan sinda na manindogan sa lado ni Jehova.