Padagos na Makinabang sa An Torrengbantayan Asin Awake!
Ngonyan na an pagpadara sa koreo kan suskripsion sa mga magasin na Torrengbantayan asin Awake! dai na ipagpapadagos, kaipuhan an paghihingoa tangani na seguradohon na kita, asin an mga hinuhulitan niato, dai malipasan dawa sarong isyu.
Personal na mga Kopya: Kun mapaso na an personal na suskripsion nindo, dagdagan an personal nindong pedido sa presente sa magazine counter. Maninigo na an mga magurang pumedido nin igong mga magasin tanganing an lambang miembro kan pamilya magkaigwa nin sadiri niang kopya. An pagsurat kan saindong ngaran sa personal na kopya nindo seseguradohon na iyan dai ikapasakamot nin dai tinutuyo sa ministeryo sa langtad. Pag-abot kan ipinadarang mga magasin, an mga tugang na nag-aasikaso kaiyan iluluwas tolos-tolos an kada isyu sa Kingdom Hall.
Mga Ruta nin Magasin: An mga parahayag maninigong maghingoa na mag-establisar nin ruta nin magasin sa gabos na interesado na gustong mag-ako kan kada isyu. An paghatod kan mga magasin nin personal sa mga siring magtatao sa sato nin mga oportunidad na kultibaron an interes na ipinaheling asin makapoon nin mga pag-adal sa Biblia.—Helingon An Satong Ministeryo sa Kahadean, Oktubre 1998, pahina 8.
An mga May Espesyal na Pangangaipo: Kun an indibiduwal nagpapaheling nin tunay na interes alagad nakaistar sa dai iinasignar na teritoryo, puedeng gumibo nin eksepsion tangani na togotan siang mag-ako kan mga magasin paagi sa suskripsion na ipadadara sa koreo. Kun an saro na nakaistar sa teritoryo kan kongregasyon dai mapapaabotan paagi sa ruta nin magasin alagad interesadong marhay na mag-ako kan mga magasin, ipakipag-olay an kamugtakan na iyan sa Komite sa Paglilingkod kan Kongregasyon. Kun aprobaran ninda, puedeng magsumitir nin suskripsion para sa interesado. Puedeng gamiton an dati nang mga porma para sa suskripsion (M-1 asin M-101) sa katuyohan na ini.
Makakokompiar kita na padagos na bebendisyonan ni Jehova an gabos niatong paghihingoa na ipaisi an Kahadean paagi sa An Torrengbantayan asin Awake!