Mga Pamilyang Makosog sa Espirituwal​​—Paano?

¹ Kinokomendaran an Kristianong mga pamilya huli sa ‘paggibo nin diosnon na debosyon sa saindang kasararo sa harong.’ (1 Tim. 5:4) Minsan siring, huli sa kadakol na maraot na impluwensia sa palibot niato na puedeng makapaluya sa satong pagtubod, mahalagang marhay na magmaigot an mga pamilya na magdanay na makosog sa espirituwal. Paano daw ini magigibo?

² Isagibo an Pagkapayo na Arog-Cristo: Kaipuhan na arogon kan mga payo nin pamilya si Jesu-Cristo sa paagi na isinasaabaga ninda an saindang paninimbagan na pakosogon an saindang mga kasararo sa harong. Dugang pa sa pagtao nin sararoan na pagpaheling kan saiyang pagkamoot sa sato paagi sa saiyang kagadanan bilang atang, padagos na ‘pinakakakan asin minamahal’ ni Jesus an kongregasyon. (Efe. 5:25-29) An mamomoton na mga magurang inaarog an halimbawang ini nin mapagpadangat na pagmakolog paagi sa pag-asikaso kan aroaldaw na espirituwal na mga pangangaipo kan saindang pamilya. Kaiba digdi an pamamayo nin pampamilyang pag-adal sa Biblia kada semana, pagkaigwa nin hararom na espirituwal na orolay noarin man posible, asin pagtaong atension sa mga problema kun lumataw iyan.​​—Deut. 6:​6, 7.

³ Sa Ministeryo sa Langtad: Maninigong apresyaron kan gabos na miembro nin pamilya na an pagpapatotoo sa iba manongod ki Jehova asin sa saiyang mga katuyohan sarong importanteng kabtang kan saindang pagsamba. (Isa. 43:10-​12) Kun gusto nindong mga magurang na an saindong mga aki magin fiel na mga Saksi ni Jehova, dapat kamong magpoon nin amay na marhay sa pag-andam kan saindang puso para sa ministeryo. Ipakipag-olay an mga dahelan kun taano ta kaipuhan na magin mapagsakripisyo sa paglilingkod asin makikabtang dian kada semana. (Mat. 22:37-​39) Dangan gumibo nin mga areglo na sinda makaibanan nindo nin regular sa ministeryo sa langtad.

⁴ Pataluboon an pag-apresyar sa gibohon na paghuhulit paagi sa pagtagama nin panahon durante kan semanal na pampamilyang pag-adal tangani na mag-andam asin mag-ensayo nin epektibong pag-atubang. Tawan an saindong mga aki nin indibiduwal na pagsasanay sa ministeryo, na tinatabangan sindang umoswag oyon sa saindang edad asin abilidad. Pakatapos na maglingkod nin iriba, ipakipag-olay kun paano ninda naheling mismo an karahayan ni Jehova. Magsaysay nin nakapakokosog sa pagtubod na mga eksperyensia. Mientras na ‘nananamitan nin mga pamilya na an Kagurangnan maboot,’ orog man sindang mapararani ki Jehova, na pinasasarig sinda na labanan an “gabos na karatan.”​—1 Ped. 2:1-3.

⁵ Sa mga Pagtiripon: Abaa karahay kun nagtitinabangan an mga miembro nin pamilya tangani na makaatender sa gabos na pagtiripon kan kongregasyon, nangorogna kun an saro sa sainda pagal, nanluluya an boot, o nagagabatan! “Kun minapuli an sakong ama hale sa trabaho, sia pagal,” an komento nin sarong hoben na tugang na babae. “Alagad ihinihiras ko sa saiya an sarong marahay na punto na pag-oolayan sa pagtiripon sa bangging iyan, asin iyan nakaeenkaminar sa saiya na dumuman. Dangan kun pagal man ako, ineenkaminar man nia akong dumuman.”​​—Heb. 10:​24, 25.

⁶ Pagtitinabangan: Maninigo na an mga pamilya magtinabangan, siring baga kan pagtabang sa mga paninimbagan sa harong. Maninigo man na magtagama nin panahon para sa piniling marhay na pag-aling-aling. An pagpiknik, pagbarobaklay, pagkawat, asin pagbiahe tangani na dalawon an mga paryente o katood puedeng magtao nin maogmang mga oras asin mahal na marhay na mga rekuerdo na magigirumdoman.​​—Ecl. 3:4.

⁷ An marigon na Kristianong mga pamilya nadadaog an aroaldaw na mga kaolangan sa saindang espirituwalidad. Paagi sa pagrani nin orog pa ki Jehova, naeeksperyensiahan ninda an kapangyarihan na itinatao nia.​​—Efe. 6:10.