Magpaheling nin Pagpahalaga sa Harong nin Dios
1 Kan mga panahon nin Biblia pinagbotan ni Jehova an saiyang banwaan na regular na magtiripon sa saiyang harong. (Lev. 23:2) An mga katiriponan na ini nagtao nin panahon na makapag-orolay asin makapaghorophorop sinda sa Pagboot ni Jehova. Napano an saindang isip nin mga kaisipan nin Dios. An areglo nagpalakop nin pagkasararo asin malinig na pagsamba. An mga pagtiripon sa harong nin Dios ngonyan siring kahalaga.
2 Paano Niato Ikakapaheling na Pinahahalagahan Niato an mga Pagtiripon? Paminsanminsan an situwasyon nin saro tibaad makaolang saiya sa pag-atender sa pagtiripon. Pero tinogotan na daw nindo an saradit na problema na makaolang sa regular na pag-atender sa pagtiripon? An nagkapira tibaad dai nakakaatender kun makolog nin kadikit an saindang payo o pagal pakatapos nin sibot na aldaw. An iba naoobligar na istimaron an mayong pagtubod na mga paryentes na nagdadalaw. An nagkapira dai ngani nakaatender nin mga pagtiripon tangani sanang magdalan nin sarong paboritong programa sa TV. An grado nin pagpahalaga na ipinaheheling sa mga situwasyon na ini harayo nanggad sa odok sa pusong pagmawot na ipinahayag kan mga aki ni Core: “An sakong puso naghidaw asin nagmawot man para sa mga patyo ni Jehova.”—Sal. 84:2.
3 Dawa ngani igwa nin abundang espirituwal na pagkakan na itinatao sa mga pagtiripon, an iba nadedepisilan na magtaong atension. Tibaad manompongan ninda an sadiri na nangangatorogan na mata, na nag-iisip manongod sa mga kahaditan kan aldaw, o nagtutungka pa ngani. Nanompongan nin dakol na an pagkua nin halipot na mga nota nakakatabang sainda na magdanay na alisto. Dugang pa, kun patienot kitang nag-aandam nin marhay, pangyayarihon kitang “magtao nin orog kisa dating atension.”—Heb. 2:1.
4 Kaipuhan man na masabotan kan mga aki an pagtotokdo na itinatao sa mga pagtiripon. An nanonodan kan mga aki magigin limitadong gayo kun tinatawan kan mga magurang nin mga kawatan o kinokoloran na mga libro sa pagpadanay sainda na toninong. Kulang nin tamang disiplina kun tinotogotan an mga aki na magkawat, magtaram, maghibi, o gumibo nin iba pang bagay na nakakaistorbo sa iba. An parate asin dai kinakaipuhan na mga pagduman sa kasilyas durante kan pagtiripon parateng naiinaan kun nakakaaram an aki na permi siang iibanan kan saro sa saiyang mga magurang.
5 Importante an Pag-abot nin Amay: Sa panapanahon, an dai malilikayan na mga kamugtakan puwedeng makaolang sa sato sa pag-abot sa pagtiripon na nasa oras, alagad an ugale nang pag-abot nin huri pakatapos kan pambukas na kanta asin pamibi nagpapaheling nin kadaihan nin paggalang sa mga pagtiripon. Girumdomon na an pagkanta asin pagpamibi kaiba kan satong mga tugang sa mga pagtiripon sa kongregasyon kabtang kan satong pagsamba. An ugale nang pagkahuri parateng resulta nin maluyang patienot na pagplano. An pag-abot nin amay nagpapaheling na iginagalang asin pinahahalagahan niato an satong mga pagtiripon.
6 Mantang orog nang naghaharani an aldaw, an pangangaipo na magtiripon magigin mas dakula pa. (Heb. 10:24, 25) Ipaheling niato an satong pagpahalaga paagi sa regular na pag-atender, patienot na pag-andam, pag-abot nin amay, konsentradong pagtao nin atension, dangan pag-aplikar kan satong nanonodan.