Sarong Arogan na Dapat na Sunodonnin Estrikto
1 Si Jesus sangkap na arogan para sa saiyang mga disipulo. Maski ngani dai kita makakaabot sa saiyang pamantayan nin pagkasangkap, dinadagka kita na ‘sunodon nin estrikto an saiyang mga lakad.’ (1 Ped. 2:21) Siring ki Jesus, maninigo niatong mawoton na maigot na ihiras an katotoohan sa iba.
2 Si Jesus labi pa sa paratokdo; sia pinakanangongorog na paratokdo. “Napangalas an kadaklan sa saiyang paagi nin pagtotokdo.” (Mat. 7:28) Taano sia ta epektibong marhay? Siyasaton niato nin marhay an saiyang “paagi nin pagtotokdo.”
3 Kun Paano Kita Makakasunod ki Jesus: An motibo ni Jesus iyo na tawan nin onra si Jehova asin pamurawayon an Saiyang ngaran. (Juan 17:4, 26) Sa satuya man na pagtotokdo, an satong motibo maninigong an pagtao nin onra ki Jehova asin bakong makaapod nin atension sa satong sadiri.
4 An gabos na bagay na itinokdo ni Jesus basado sa Tataramon nin Dios asin padagos siang nagsambit sa ipinasabong na Kasuratan. (Mat. 4:4, 7; 19:4; 22:31) Boot niatong giyahan sa Biblia an mga naghihinanyog sa sato; sa siring tinotogotan niatong maheling ninda na an satong ihinuhulit asin itinotokdo basado sa pinakahalangkaw na autoridad.
5 Naggamit si Jesus nin praktikal, simpleng mga argumento. Halimbawa, sa pagpaliwanag kun paano kita magkakamit nin kapatawadan nin Dios, pinakosog nia kita na magpatawad sa iba. (Mat. 6:14, 15) Maninigo niatong hingoahon na ipaliwanag an mensahe kan Kahadean sa simple, praktikal na mga termino.
6 Naggamit si Jesus nin mga ilustrasyon asin hapot na mapukaw sa pag-isip kan iba. (Mat. 13:34, 35; 22:20-22) An mga ilustrasyon manongod sa aroaldaw na mga bagay makakatabang sa mga tawo na masabotan an komplikadong mga doktrina sa Biblia. Maninigo kitang maghapot na nakakadagka sa mga naghihinanyog sa sato na isipon an saindang nadadangog. An naggigiyang mga hapot makakatabang sainda na makaabot sa tamang mga konklusyon.
7 Nagkaigwa si Jesus nin panahon na ipaliwanag an depisil na mga bagay sa mga sinserong naghagad nin dakol pang impormasyon. (Mat. 13:36) Maninigo man kitang magin matinabang kun may pagkasinsero an mga ihinahapot. Kun dai niato aram an mga simbag, puwede niatong siyasaton an tema asin dumalaw liwat na dara an simbag sa dai mahaloy na panahon.
8 Naggamit si Jesus nin obhetong mga leksion sa pagtokdo. An halimbawa kaini iyo an paghanaw nia kan mga bitis kan saiyang mga disipulo. (Juan 13:2-16) Kun kita nagpapaheling nin mapakumbabang espiritu, mamomotibar an mga tinotokdoan na iaplikar an saindang nanonodan.
9 Pinukaw ni Jesus an puso nin saro asin an saiyang pagkamoot sa katanosan. Boot man niatong aboton an mga puso. Hinihingoa niatong pukawon an natural na pagmawot kan gabos na sumamba asin mabuhay sa katoninongan kaiba kan iba.
10 Ngonyan na Disyembre iaalok niato an librong The Greatest Man Who Ever Lived. An pag-arog ta sa mga kuwalidad nin pagtotokdo ni Jesus puwedeng motibaron an mga sinsero na maghinanyog mantang ipinaliliwanag niato an saiyang itinokdo.—Mat. 10:40.