Tabangan Sindang Magdangog “sa Iba Pang Panahon”
1 “Madangog liwat kami saimo dapit kaini sa iba pang panahon.” (Gibo 17:32) Iyan an simbag kan nagkapira sa pahayag ni Pablo sa Areopago. Siring man ngonyan, an iba andam na magdangog nin orog pa dapit sa mensahe kan Kahadean na ihiniras niato sainda sa satong enot na pagdalaw.
2 An marahay na pag-andam tatabangan kita kun kita minabalik tanganing kultibaron an interes. An pahina 51 kan School Guidebook nagrerekomendar: “Enot linawon sa isip an mga argumento na nagsusuportar sa materyal. . . . Helingon kun kaya nindong sabihon an mga ideya sa saindo mismong mga tataramon. Magkaigwa nin marahay na pagsabot sa Makakasuratan na mga patotoo. Magin andam na iaplikar sa epektibong paagi an mga teksto.”
3 Kun ikinapasakamot nindo an librong “The Bible—God’s Word or Man’s?,” puwede nindo ining sabihon:
◼ “An librong iwinalat ko saindo nagpapalataw kan hapot na, ‘Taano ta Dapat Basahon an Biblia?’ [Basahon an introduksion sa pahina 5, asin pasimbagon sa pantapos na hapot.] Sinasabi sato kan Biblia na sa dai na mahahaloy reresolberan nin Dios an gabos na problema kan katawohan. An librong ini dinisenyo bilang pantabang sa personal asin pampamilyang pag-adal sa Biblia. Naoogma akong ipaheling saindo kun paano iyan gagamiton.”
4 Sa mga dinalaw na iwinalat nindo an tract na “Why You Can Trust the Bible,” puwede nindong probaran na sabihon ini:
◼ “Kita gabos interesado sa ngapit. Manongod sa presenteng mga kamugtakan sa kinaban, ano sa paghona nindo an mangyayari? [Pasimbagon.] Mantang an tawo makakapagbanabana sana, an Dios eksaktong nakakaaram kan mangyayari. [Basahon an Isaias 46:10.] Ihinuhula kan Biblia na dai na mahahaloy magkakamit kita nin sarong bagong kinaban na paraiso. [Basahon an ikatolong parapo sa pahina 4.] Togoti ako nindong sabihon an dakol pa manongod kaiyan.”
5 Kun kamo minadalaw liwat sa napasakamotan kan “New World Translation,” tibaad an suhestion na ini magigin epektibo para saindo:
◼ “Dai pa sana nahaloy, nagwalat ako saindo nin kopya kan Biblia, asin nanuga akong mabalik tanganing tabangan kamo na magamit iyan. Sa panapanahon puwedeng maghorophorop kita kun paano niato mapapagdanay an makikatood na relasyon sa iba. An Biblia igwa nin marahay na sadol digdi, asin pasil iyan na hanapon sa New World Translation. [Buksan sa pahina 1595 asin helingon sa irarom kan temang “Love(s).” Sambiton an mga teksto na siring kan 1 Corinto 13:4; Colosas 3:14; asin 1 Pedro 4:8.] Ini sarong halimbawa na nagpapaheling kun paano nagtatao an Biblia nin praktikal na mga solusyon sa satong mga problema. Sa masunod, boot kong ipaheling saindo an saro pang paagi na makakatabang an Biblia sa sato na manompongan an katoninongan sa isip.”
6 Mayo na nin maorog pang kayamanan na ikakatao niato sa iba kisa sa tamang kaaraman sa Tataramon nin Dios. An kaaraman na iyan makakatabang sa mga tawo na lumakaw sa dalan ni Jehova, na nagtatao sainda nin daing katapusan na mga bendisyon.—Tal. 2:20, 21.