An Biblia—Gikanan nin Karangahan Asin Paglaom sa Sarong Maribok na Kinaban
1 An mga tawo ngonyan napapairarom sa makuring pangigipit asin nangangaipo nin karangahan asin paglaom. An Biblia iyo an solamenteng gikanan nin tunay na karangahan. Nagtatao iyan nin paglaom na sarong bagong kinaban. (Roma 15:4; 2 Ped. 3:13) An librong Insight, Tomo 1, pahina 311, nagsasabi: “Kun mayong Biblia dai niato mamimidbid si Jehova, dai niato maaaraman an makangangalas na mga pakinabang na bunga kan sa pantubos na atang ni Cristo, asin dai niato masasabotan an mga kahagadan na kaipuhan maabot tanganing magkamit nin buhay na daing katapusan sa o sa irarom kan matanos na Kahadean nin Dios.”
2 Ngonyan na Nobyembre ipapaheling niato kun paano nagtatabang sa mga tawo an Tataramon nin Dios na mapangganahan an mga pangigipit kan kinaban. Iaalok niato an New World Translation of the Holy Scriptures (o Ang Banal na Kasulatan) asin an librong The Bible—God’s Word or Man’s? Ano an puwede niatong sabihon na matabang sa marahay an boot na mga indibiduwal na apresyaron an halaga kan Biblia?
3 Pakapamidbid kan saindong sadiri, puwede nindo ining sabihon:
◼ “Posibleng minaoyon kamo na napapalibotan kita nin mga problema na nakakaraot sa satong katoninongan sa isip. Saen kita makakanompong nin praktikal na sadol tanganing matabangan kita na mapangganahan an mga problemang ini? [Pasimbagon.] Nanompongan ko an Biblia na nag-aasegurar huli ta iyan nagtotokdo sato kun paano magigin maogma. [Basahon an Lucas 11:28.] An katuyohan kan samong gibohon iyo na dagkahon an mga tawo na basahon an Biblia. An pantabang na ini sa pag-adal sa Biblia, an The Bible—God’s Word or Man’s?, makakatabang saindo na gibohon iyan. Mangnoha an sinasabi kaiyan dapit sa pagresolber sa mga problema. [Basahon an ikaduwang sentence sa parapo 9 sa pahina 187.] Naoogma akong iwalat an kopyang ini saindo.”
4 Puwedeng booton nindong gamiton an sarong simpleng pag-atubang na arog kaini:
◼ “Interesado kami sa pagdagka nin mas dakulang paggalang sa Tataramon nin Dios, an Biblia. Boot kong tawan kamo nin sarong kopya kan tract na ini na Why You Can Trust the Bible. Ipinaliliwanag kaiyan kun taano kita ta makakadolok sa Biblia tanganing makua an sarong seguradong paglaom para sa sarong mas marahay na kinaban. [Buksan sa pahina 6, asin basahon an Salmo 37:29 kaiba an pantapos na parapo.] Basahon mismo nindo an tract na ini, asin sa sunod na panahon na dumalaw ako, ipaaram nindo sako kun ano an iniisip nindo dapit sa paglaom na itinatao kan Biblia.”
5 An ibang parahayag puwedeng boot na gamiton an direktang pag-atubang na ini sa pagpoon nin pag-adal sa Biblia:
◼ “Minadalaw ako tanganing alokon kamo nin libreng pag-adal sa Biblia sa harong. An New World Translation of the Holy Scriptures dinisenyo para sa personal na pag-adal. Iyan popular sa minilyon na parabasa kan Biblia sa bilog na kinaban. Togotan nindo akong idemonstrar kun paano nindo magagamit iyan. [Buksan sa pahina 1653, asin apodon an atension sa 23A. Basahon an saro o duwang sitadong teksto asin ipaliwanag iyan.] Naoogma akong bumalik asin ipaliwanag nin orog pa an paglaom na ini sa Kahadean.”
6 An Biblia iyo an gikanan nin katotoohan na puwedeng gumiya pasiring sa buhay na daing katapusan. (Juan 17:3, 17) An paghiras sa iba kan katotoohan sa Biblia nakakapaogma ki Jehova, “na an kabotan iyo na an gabos na klase nin tawo makaligtas.”—1 Tim. 2:4.