Taano ta Dapat na Magin Nasa Oras?

AN PAGIGIN nasa oras bako pirmeng pasil. Kaiba sa mga olang na tibaad kaipuhan niatong pangganahan iyo an haralawig na biahe, grabeng trapik, asin sibot na mga iskedyul. Pero, importante an pagigin nasa oras. Halimbawa, sa pangkagabsan an sarong tawo na pirmeng amay sa trabaho minamansay na masasarigan asin mahigos. Sa ibong na lado, an tawong minaabot nin huri puedeng makaapektar sa trabaho nin iba asin sa kalidad nin mga produkto saka serbisyo. Huli sa pagigin huri nin sarong estudyante, puedeng may malipasan siang mga leksion asin makaolang ini sa pag-oswag nia sa klase. Kun an saro huri sa iskedyul sa doktor o dentista, puedeng maapektaran kaini an serbisyong aakoon nia.

Pero, sa nagkapirang lugar bakong arog kaiyan kaimportante an pagigin nasa oras. Sa siring na kamugtakan, madaling magin ugale niato an pagigin huri. Kun totoo iyan sa sato, mahalagang marhay na pataluboon niato an pagmawot na magin nasa oras. An pakasabot sa importansia kaiyan siertong matabang sa sato na dai mahuri. Taano ta dapat kitang magin nasa oras? Paano niato mapapangganahan an mga olang dian? Asin anong mga pakinabang an malalaoman niato huli sa pagigin nasa oras?

Si Jehova—Dios na Pirmeng Nasa Oras

An pangenot na dahelan na gusto niatong magin nasa oras iyo na gusto niatong arogon an Dios na satong sinasamba. (Efe. 5:1) Nagtatao si Jehova nin marahayon na arogan nin pagigin nasa oras. Nungka siang nahuhuri. Sinusunod nia nin estrikto an saiyang iskedyul sa pag-otob kan saiyang mga katuyohan. Halimbawa, kan magdesisyon si Jehova na laglagon an maraot na kinaban paagi sa delubyo, sinabi nia ki Noe: “Gumibo ka para sa saimo nin sarong arka hale sa kahoy nin madugtang poon nin kahoy.” Mantang nagdadangadang kaidto an katapusan, pinagbotan ni Jehova si Noe na lumaog sa arka asin sinabihan ini: “Pitong aldaw na sana papaoranan ko an daga nin kuarentang aldaw asin kuarentang banggi; asin paparaon ko sa ibabaw kan daga an lambang nabubuhay na bagay na ginibo ko.” Dangan eksakto sa oras, “pakalihis nin pitong aldaw an tubig kan delubyo uminabot sa ibabaw kan daga.” (Gen. 6:14; 7:4, 10) Imahinara kun ano kutana an nangyari ki Noe asin sa pamilya nia kun nahuri sinda sa paglaog sa arka. Arog kan Dios na sinasamba ninda, kaipuhan sindang magin nasa oras.

Mga 450 taon pagkatapos kan Baha, sinabihan ni Jehova an patriarkang si Abraham na magkakaigwa sia nin aking lalaki na iyo an gigikanan kan ipinanugang Banhi. (Gen. 17:15-17) Sinabi nin Dios na ipapangaki si Isaac “sa itinalaan na panahon na ini sa masunod na taon.” Nangyari daw iyan? Sinasabi sa sato kan Kasuratan: “Si Sara nagbados dangan nangaki nin lalaki ki Abraham sa saiyang kagurangan sa itinalaan na panahon na sinabi nin Dios sa saiya.”—Gen. 17:21; 21:2.

Kadakol nin halimbawa sa Biblia na nagpapaheling kan pagigin nasa oras nin Dios. (Jer. 25:11-13; Dan. 4:20-25; 9:25) Sinasabi sa sato kan Biblia na padagos na halaton an maabot na aldaw nin paghokom ni Jehova. Dawa kun iyan garo baga “maatraso” sa punto de vista nin tawo, sinisierto sa sato na “dai iyan mahuhuri.”—Hab. 2:3.

An Pagigin Nasa Oras Importante sa Pagsamba

An gabos na Israelitang lalaki kaipuhan na magin presente asin nasa oras sa lugar na duman ginigibo an “panapanahon na mga kapiestahan ni Jehova.” (Lev. 23:2, 4) Sinabi man nin Dios kun noarin idodolot an partikular na mga atang. (Ex. 29:38, 39; Lev. 23:37, 38) Bako daw na ipinaparisa kaini na gusto nin Dios na an mga lingkod nia magin nasa oras sa saindang pagsamba?

Kan enot na siglo, kan instruksionan ni apostol Pablo an mga taga Corinto kun paano maninigong gibohon an Kristianong mga pagtiripon, sinadol nia sinda: “Pabayaan na an gabos na bagay mangyari sa disente asin aregladong paagi.” (1 Cor. 14:40) Huli kaiyan, an Kristianong mga pagtiripon para sa pagsamba dapat na pumoon sa itinalaan na oras. An pagmansay ni Jehova sa pagigin nasa oras dai nagbabago. (Mal. 3:6) Kun siring, ano an magigibo niato tanganing magin nasa oras sa Kristianong mga pagtiripon na ini?

Kun Paano Mapapangganahan an mga Olang sa Pagigin Nasa Oras

Napatunayan nin nagkapira na dakulang tabang an patienot na pagplano. (Tal. 21:5) Halimbawa, kun kaipuhan niatong makaabot sa sarong lugar sa espesipikong oras, magigin madonong daw na humale sa oras na haros eksakto sana kitang makakaabot? Bako daw na magigin madonong kun matao kita nin ekstrang oras tanganing dai kita mahuri, dawa kun may mangyaring “pagkanorongod” mantang nasa biahe? (Ecl. 9:11) “An sarong bagay na makakatabang sa siisay man na makaabot na nasa oras iyo an pakaaram kun pirang oras an kaipuhan sa pagbiahe,” an sabi kan hoben na si Jose na pirmeng nasa oras.a

Tibaad kaipuhan nin nagkapira na gumibo nin mga areglo na makahale nin amay sa trabaho tanganing dai sinda mahuri sa Kristianong mga pagtiripon. Ini an ginibo nin sarong Saksi sa Etiopia kan marealisar nia na mahuhuri sia nin 45 minutos sa mga pagtiripon kan kongregasyon huli sa pagrelyibo sa saiyang trabaho. Kinaolay nia an saro niang katrabaho na amay siang salidahan kaini sa trabaho sa mga banggi na may pagtiripon. Bilang karibay, an Saksi nagtogot na magtrabaho nin dagdag na pitong oras para sa katrabaho nia.

Olang man sa pag-abot nin amay sa mga pagtiripon an pagkaigwa niato nin saradit na aki. Minsan ngani sa pangkagabsan paninimbagan kan ina an pag-andam sa mga aki, an ibang miembro kan pamilya puede asin maninigong tumabang. Si Esperanza na taga Mejico sarong ina na solong nag-aataman sa walong aki. An edad ninda ngonyan nasa 5 sagkod 23. Ipinaliwanag ni Esperanza kun paano nahihimo kan pamilya nia na magin nasa oras: “An mas matua kong mga aking babae nagtatabang na andamon an mga mas nguhod. Huli kaini natatapos ko an mga gibo sa harong asin nakakapag-andam ako na makahale sa itinalaan na oras pasiring sa mga pagtiripon.” An pamilyang ini igwa nin itinalaan na oras nin paghale sa harong, asin nakikikooperar an gabos tanganing magibo iyan.

Makinabang sa Pagigin Nasa Oras sa Kristianong mga Pagtiripon

An paghorophorop sa mga bendisyon na nakakamtan niato huli sa pagigin nasa oras sa Kristianong mga pagtiripon puedeng magpakosog kan satong pagmawot asin determinasyon na gibohon an gabos na paagi tanganing magin nasa oras. An hoben na si Sandra, na nakatodan na an pagigin nasa oras sa mga pagtiripon, nagkomento: “An gusto ko sa pag-abot nin amay iyo na nagkakaigwa ako nin oportunidad na kumustahon an mga tugang, makipag-olay sa sainda, asin mamidbid sinda nin orog pa.” Kun amay kitang minaabot sa Kingdom Hall, makikinabang kita sa mga eksperyensia dapit sa pakatagal asin maimbod na paglilingkod nin iba. An satong pagigin presente asin nakakaparigon na pakikipag-olay puede man na magkaigwa nin marahay na epekto sa satong mga tugang, na ‘dinadagka sinda sa pagkamoot asin sa marahay na mga gibo.’—Heb. 10:24, 25.

An pambukas na kanta asin pamibi sa kada Kristianong pagtiripon importanteng kabtang kan satong pagsamba. (Sal. 149:1) An satong mga kanta nag-oomaw ki Jehova, nagpapagirumdom sa sato kan mga kualidad na maninigo niatong pataluboon, asin nagdadagka sa sato na magayagayang makikabtang sa ministeryo. Asin kumusta man an pambukas na pamibi? Kan suanoy na mga panahon, inapod ni Jehova an templo na saiyang “harong na pamibian.” (Isa. 56:7) Sa satong mga pagtiripon ngonyan, nag-iiribanan kita tanganing mamibi sa Dios. An pambukas na pamibi ginigibo bako sana tanganing hagadon an paggiya asin banal na espiritu ni Jehova kundi tanganing andamon man an satong isip asin puso sa pag-ako nin impormasyon. Maninigo kitang magin determinado na mag-abot na nasa oras sa satong mga pagtiripon para sa pambukas na kanta asin pamibi.

An 23 anyos na si Helen nagsabi dapit sa dahelan nia na mag-abot nin amay sa mga pagtiripon: “Para sa sako saro iyan na paagi na ikapaheling ko an sakong pagkamoot ki Jehova, huling hale sa saiya an gabos na impormasyon na ipinepresentar, kaiba na an mga kanta asin pambukas na pamibi.” Bako daw na maninigong arog man kaiyan an satong pagmansay dian? Iyo nanggad. Kun siring, pagmaigotan niato na pataluboon an ugale nin pagigin nasa oras sa gabos na aktibidad niato, nangorogna sa mga bagay na may koneksion sa satong pagsamba sa tunay na Dios.

[Nota sa Ibaba]

[Ritrato sa pahina 26]

Patienot na mag-andam na marhay

[Ritrato sa pahina 26]

Magtagama nin panahon para sa “pagkanorongod”

[Mga Ritrato sa pahina 26]

Makinabang sa pag-abot nin amay sa mga pagtiripon