Gumawe sa Paagi na Angay sa Maogmang Bareta
1 Bilang Mga Saksi ni Jehova, mawot niato na magtaong onra sa ngaran ni Jehova. Aram niato na an satong paggawe, pagtaram, pag-alinyar, asin paggubing puedeng makaimpluwensia kun paano minamansay nin iba an tunay na pagsamba. Nangorognang totoo ini sa satong mga pagtiripon. Boot niatong siertohon na an gabos na sinasabi asin ginigibo sa mga pagtiripon angay sa maogmang bareta asin nagtataong onra ki Jehova.—Fil. 2:4.
2 An mga pamantayan kan kinaban sa gubing asin pag-alinyar nagin nang malibog sa dakol na lugar. Ini sarong bagay na maninigong tawan nin maingat na atension kan mga ministro kan maogmang bareta. An Hunyo 1, 1989 Torrengbantayan, pahina 24 (w89-E 6/1, p. 20), nagsabi: “Dai kaipuhan na magin mamahalon an satong gubing, alagad dapat na iyan malinig, disente, asin mabini. An satong gamit sa bitis kaipuhan man na bakong raot asin malinig an itsura. Siring man sana, sa gabos na pagtiripon, kaiba an Pag-adal sa Libro kan Kongregasyon, dapat na malinig an satong hawak, asin magin husay asin angay an satong bolos.”
3 An pagigin nasa oras sarong tanda nin mamomoton na konsiderasyon asin pagkamapaggirumdom. Sa panapanahon, an dai malilikayan na mga kamugtakan tibaad makaolang sa sato sa pag-abot nin nasa panahon para sa pagtiripon. Pero an ugale nang pag-abot nin huri puedeng magpaheling nin kadaihan nin paggalang para sa sagradong katuyohan kan mga pagtiripon. Siring man, an mga huring minaabot parateng nakadidistorbo sa iba asin nakaoolang sainda na lubos na makinabang sa programa. An pagigin nasa oras nagpapaheling nin paggalang sa mga saboot asin intereses kan gabos na nag-aatender.
4 An pagkamoot sa satong mga kataed maninigong makatabang sa sato na likayan na magcausa nin mga distorbo durante kan mga pagtiripon. An paghinghing, pagkakan, pagsapa nin tsiklet, pagparagisnis nin mga papel, dai kinakaipuhan na mga pagduman sa kasilyas, makadidistorbo sa iba asin makaiina sa dignidad na maninigo sa lugar nin pagsamba ki Jehova. Bakong tama para sa siisay man na gumibo nin transaksion na pankongregasyon o makipag-olay sa iba apuera sana kun igwa nin emerhensia na kinakaipuhan na humale sa saindang tukawan an mga tugang na lalaki. Kun mayo man, an gabos maninigong nakatukaw asin nagdadangog sa programa tangani na makinabang sinda mismo asin an saindang mga pamilya. An bakong marahay na mga ugale mayong lugar sa Kingdom Hall huli ta an “pagkamoot . . . dai naggigibo kan bakong maninigo.”—1 Cor. 13:4, 5; Gal. 6:10.
5 An marahay na ugale kan satong kaakian sa mga pagtiripon nagtatao man nin onra sa ngaran ni Jehova. Kaipuhan na marhay an maingat na pamamahala kan mga magurang. Maninigong dagkahon an mga aki na maghinanyog asin magpartisipar. Dakol na magurang na igwang saradit na aki an pinipili na tumukaw sa lugar na madali sana sindang makaluwas asin makaasikaso sa mga pangangaipo kan saindang saradit na aki na daing gayo nakadidistorbo sa iba.
6 Nagsadol si Pablo: “Gumawe sa paagi na angay sa maogmang bareta.” (Fil. 1:27) Kaya, pagmaigotan niato na magin marahay an ugale asin makonsiderasyon sa iba kun nag-aatender sa mga pagtiripon.