Hinguwahon na Magin Nasa Oras Pirmi
1. Anong halimbawa an ipinapahiling ni Jehova manungod sa pagigin nasa oras pirmi?
1 Si Jehova pirming nasa oras. Halimbawa, nagtatao siya sa mga lingkod niya nin ‘tabang sa panahon nin pangangaipo.’ (Heb. 4:16) Nagtatao man siya nin espirituwal na “kakanon sa [tamang] panahon.” (Mat. 24:45) Kaya makakapagtiwala kitang ‘dai mahuhuri’ an pag-abot kan aldaw kan saiyang kaanggutan. (Hab. 2:3, NW) Talagang nakikinabang kita sa pagigin nasa oras ni Jehova! (Sal. 70:5) Pero huling kita bakong perpekto asin sibot pirmi, talagang nasasakitan kita na magin nasa oras. Taano ta kaipuhan tang maghinguwa na ugalion iyan?
2. Taano ta natatawan nin onra si Jehova pag pirmi kitang nasa oras?
2 An pagigin nasa oras dai nang gayo napapahalagahan sa huring mga aldaw na ini kun sain kadakul na tawo an daing pagpupugol asin makasadiri. (2 Tim. 3:1-3) Kaya pag an mga Kristiyano pirming nasa oras pag-abot sa trabaho, appointment, saka mga pagtiripon, naririsa iyan kan iba asin natatawan nin onra si Jehova. (1 Ped. 2:12) Pirmi daw kitang nasa oras pag-abot sa trabaho, pero naririsa tang parati kitang huri sa teokratikong mga gibuhon? An pagigin nasa oras sa Kristiyanong mga pagtiripon, kaiba na diyan an pambukas na kanta asin pamibi, nagpapahiling na gusto tang arugon an satong Ama sa langit sa pagigin areglado.—1 Cor. 14:33, 40.
3. Taano ta an pagigin nasa oras pagpapahiling nin konsiderasyon sa iba?
3 An pagigin nasa oras pagpapahiling man nin konsiderasyon sa iba. (Fil. 2:3, 4) Halimbawa, pag nasa oras kita sa Kristiyanong mga pagtiripon, kaiba na an pagtiripon bago maglingkod sa langtad, dai madidisturbo an satong mga kapagtubod. Pero kun ugali ta na an pagigin huri, maiisip kan iba na mas mahalaga sa sato an satong panahon kisa kan sa sainda. An pagigin pirming nasa oras nagpapahiling na kita maaasahan, mahigos, asin mapagkakatiwalaan—mga kuwalidad na inaapresyar kan iba.
4. Kun parati kitang nahuhuri, ano an puwede tang gibuhon?
4 Pag-isipan kun taano ta parati kang nahuhuri. Magin organisado paagi sa paggibo nin realistikong iskedyul na makakatabang sa saimo na tapuson an mga gibuhon sa itinalaan na panahon. (Par. 3:1; Fil. 1:10) Maghagad nin tabang ki Jehova. (1 Juan 5:14) An pagigin nasa oras sarong paagi nin pagpahiling na mahalaga sa sato an duwang pinakanangungurog na tugon kan Ley—an kamutan an Diyos asin an satong kapwa.—Mat. 22:37-39.