Sunodon an Halimbawa na Itinao ni Jesus
1. Anong halimbawa an itinao ni Jesus?
1 Kun kita nakikikabtang sa paggibo nin disipulo, dapat niatong tandaan na an satong halimbawa puedeng magkaigwa nin mapuersang epekto sa mga nag-oobserbar sa sato. Nagtokdo si Jesus paagi sa tataramon asin gibo. Naheling kan mga nag-oobserbar sa saiya an saiyang kaigotan, an saiyang pagkamoot sa mga tawo, an saiyang nakakonsentrar na kamawotan na pakangbanalon an ngaran kan saiyang Ama, asin an saiyang determinasyon na gibohon an kabotan kan saiyang Ama.—1 Ped. 2:21.
2. Sa anong mga paagi na an satong halimbawa makakaapektar sa mga naggigibo na kaiba niato sa ministeryo?
2 Mantang Nasa Ministeryo sa Harong-Harong: Arog ni Jesus, an satong halimbawa nakakaimpluwensia sa mga naggigibo na kaiba niato. An mga parahayag na mas bagohan asin mayo pang gayong eksperyensia na naheheling kita na maigot na nakikikabtang sa ministeryo mag-iisip manongod sa kalidad kan saindang kabtang sa paghuhulit. Kun naoobserbaran ninda an satong kagayagayahan asin tunay na interes sa iba, mapapagirumdom sinda kan kahalagahan kan pagpaheling nin siring na mga kualidad sa saindang ministeryo. Kun naririsa ninda an satong kahigosan sa paggamit kan Kasuratan, sa mga pagdalaw liwat, asin sa paggibo nin mga pag-adal sa Biblia, mamomotibar sinda na gibohon man iyan.
3. Paano puedeng matokdoan paagi sa satong halimbawa an mga inaadalan sa Biblia, asin ano an puede nindang manodan?
3 Kun Naggigibo nin mga Pag-adal sa Biblia: An satong gawe-gawe nangorognang maoobserbaran kan satong mga inaadalan sa Biblia. Halimbawa, minsan ngani tibaad ipinapaliwanag niato sa sainda an kahalagahan nin pag-andam para sa pag-adal, paghanap sa mga teksto, asin pagkurit kan pangenot na mga punto, maririsa ninda kun baga kita andam. (Roma 2:21) Kun minaabot kita nin tama sa oras segun sa napag-olayan tanganing adalan sinda, mas dikit an tendensia ninda na togotan an ibang mga aktibidad na makaolang sa saindang pag-adal sa Biblia. Daing duda na maoobserbaran man ninda an pagigin andam niato na magsakripisyo para sa ministeryo asin an satong marigon na pagtubod. Bakong makangangalas na an mga inaadalan sa Biblia kan mga maingat na nagsusunod sa halimbawa ni Jesus sa parate nagigin maigot asin mabungang mga ebanghelisador.
4. Kun nag-aatender kita sa mga pagtiripon kan kongregasyon, ano an itinotokdo kan satong halimbawa?
4 Kun Nag-aatender sa mga Pagtiripon kan Kongregasyon: An gabos na yaon sa Kristianong kongregasyon may kabtang sa pagtotokdo paagi sa halimbawa mantang nasa mga pagtiripon kan kongregasyon. An mga interesado na nagpoon nang mag-atender sa mga pagtiripon nakikinabang sa marahay na halimbawa na naoobserbaran ninda sa kongregasyon. Maririsa ninda an mamomoton na kasararoan nin magturugang, Kristianong pagkasararo, asin mabining paggubing saka pagpakarhay sa sadiri. (Sal. 133:1) Maririsa man ninda an satong halimbawa nin maimbod na pag-atender sa mga pagtiripon kan kongregasyon asin an pagpahayag niato sa publiko kan satong pagtubod mantang nasa pagtiripon. Naobserbaran nin sarong bisita sa saro sa satong mga pagtiripon kun gurano karikas na nakua nin sarong sadit na aking babae an sitadong teksto sa mismong Biblia kaini asin kun gurano kaatento kaining sinundan an pagbasa. An halimbawa kaini nakamotibar sa saiya na makiolay na adalan sia sa Biblia.
5. Taano ta dai niato noarin man maninigong menoson an kahalagahan kan satong halimbawa?
5 Pinaparigon kita kan Kasuratan na arogon an positibong halimbawa nin lambang saro. (Fil. 3:17; Heb. 13:7) Kun siring, maninigo niatong girumdomon na kun maingat niatong sinusunod an halimbawa na itinao ni Jesus, maoobserbaran iyan nin iba asin puedeng makaimpluwensia sa sainda sa positibong paagi. Huling narerealisar ini, logod na isapuso niato an mga tataramon sa 1 Timoteo 4:16: “Pirme mong tawan nin atension an saimo man sana asin an saimong pagtotokdo.”