Tokdoan an mga Mahoyo na Lumakaw sa Dalan nin Dios
1. Ano an kalabot sa paggibo nin mga disipulo?
1 An mga disipulo ni Cristo kan enot na siglo sinasabing nasa “Dalan.” (Gibo 9:2) Kalabot sa tunay na Kristianismo an bilog na pamumuhay nin saro. (Tal. 3:5, 6) Kun siring, kun nagkokondukta nin mga pag-adal sa Biblia, kaipuhan niatong gumibo nin orog pa kisa sa pagtao sana nin tamang kaaraman manongod sa doktrina sa Biblia. Dapat man niatong tabangan an mga inaadalan sa Biblia na lumakaw sa dalan ni Jehova.—Sal. 25:8, 9.
2. Ano an makakamotibar sa sarong inaadalan sa Biblia na kuyogon an mga pagboot nin Dios?
2 Pagkamoot ki Jehova Asin ki Jesus: Depisil nanggad para sa bakong sangkap na mga tawo na ioyon sa kabotan nin Dios an saindang kaisipan, mga aktitud, pagtaram, asin gawe-gawe! (Roma 7:21-23; Efe. 4:22-24) Minsan siring, an pagkamoot sa Dios asin sa saiyang Aki nagmomotibar sa mga mahoyo na gibohon an depisil na kahagadan na ini. (Juan 14:15; 1 Juan 5:3) Paano niato matatabangan an satong mga inaadalan sa Biblia na kultibaron an pagkamoot na ini?
3. Paano niato matatabangan an mga inaadalan sa Biblia na kultibaron an pagkamoot ki Jehova asin ki Jesus?
3 Tabangan an saindong inaadalan sa Biblia na mamidbid kun anong klaseng persona si Jehova. An sarong tugang na lalaki nagpaliwanag, “Dai mamomotan nin mga tawo an sarong persona na dai ninda midbid, kaya poon sa kaenot-enoteng pag-adal, itinotokdo ko na sainda an ngaran nin Dios na ginagamit an Biblia, asin naghahanap ako nin mga oportunidad na idoon an mga kualidad ni Jehova.” An pagtampok kan halimbawa ni Jesus ekselenteng paagi na magibo ini. (Juan 1:14; 14:9) Dugang pa, gamiton an kahon sa pagrepaso na nasa katapusan kan lambang kapitulo kan librong Itinotokdo kan Biblia tangani na matabangan an inaadalan sa Biblia na horophoropon an makangangalas na mga kualidad nin Dios asin kan saiyang Aki.
4. (a) Taano ta nadedepisilan sa paghuhulit an dakol na inaadalan sa Biblia? (b) Paano niato matatabangan an satong mga inaadalan sa Biblia na pumoon sa pakikikabtang sa Kristianong ministeryo?
4 Magtokdo Paagi sa Halimbawa: Bilang mga paratokdo asin giya, ipinapaheling niato sa iba paagi sa satong gawe-gawe kun ano an kahulogan kan paglakaw sa dalan nin Dios. (1 Cor. 11:1) Halimbawa, an kadaklan na inaadalan sa Biblia dai tuod na dumolok sa mga dai kamidbid tanganing sabihon an saindang mga tinutubod. Kun siring, tibaad nagkakaipo nin pasensia asin abilidad tangani na tabangan sinda na pataluboon an pagkamoot, pagtubod, asin kosog nin boot na kaipuhan sa pakikikabtang sa paghuhulit asin paggibo nin mga disipulo. (2 Cor. 4:13; 1 Tes. 2:2) An pagmawot niato na giyahan an satong mga inaadalan sa Biblia mamotibar sa sato na ibanan asin suportaran sinda kun magpoon na sindang makikabtang sa Kristianong ministeryo.
5. Paano an marahay na halimbawa nakakatabang sa mga inaadalan sa Biblia na maobserbaran kun ano an kalabot sa pagkuyog sa mga pagboot nin Dios?
5 An saindong halimbawa puedeng magtokdo sa mga inaadalan sa Biblia sa iba pang mahalagang aspekto nin Kristianong pamumuhay. Kun dinadalaw nindo an may helang o makikatood na tinataratara an iba sa mga pagtiripon kan kongregasyon, naheheling ninda an pagkamoot na isinasagibo. (Juan 15:12) Kun kamo nakikikabtang sa paglinig kan Kingdom Hall o ginigibo nindo an mga bagay na nakakatabang sa iba, tinotokdoan nindo sinda kun paano maglingkod. (Juan 13:12-15) Kun naoobserbaran ninda na kamo nagpapadanay nin simpleng estilo nin pamumuhay, nasasabotan ninda kun ano an kahulogan kan ‘padagos na hanapon nguna an kahadean.’—Mat. 6:33.
6. Ano an ibinubunga kan pagtabang sa mga mahoyo na maglingkod ki Jehova?
6 An pagtotokdo sa iba gikan sa Tataramon nin Dios asin an paggibo nin mga disipulo nangangaipo nin dakulang paghihingoa. Alagad kanigoan na kagayagayahan na maheling an mga mahoyo na “padagos na naglalakaw sa katotoohan”!—3 Juan 4.