Gikan sa Boot na Pagpresentar kan Satong Sadiri
1 An salmistang si David naghula na an banwaan ni Jehova “gikan sa boot na magpepresentar kan saindang sadiri.” (Sal. 110:3) Bilang kaotoban kaini, durante kan kada saro sa nakaaging apat na taon nin paglilingkod, nagdusay an banwaan ni Jehova nin labing sarong bilyon na oras sa pagpalakop kan maogmang bareta kan Kahadean. Asin dakol an paagi, dagdag pa sa paghuhulit asin paggibo nin mga disipulo, na gikan sa boot na ikapepresentar niato an satong sadiri na tabangan an iba.
2 Mga Paagi na Ikapaheheling Niato an Satong Pagigin Gikan sa Boot: An nagkapira sa kongregasyon tibaad nangangaipo nin tabang sa pagduman sa mga pagtiripon. Taano ta dai kamo magboluntaryong iiba sinda? An iba tibaad naghehelang, maluya an hawak, o naoospital. Puede daw nindo sindang dalawon o tumabang sa sarong paagi? Napag-isip-isip na daw nindong imbitaran an mga nangangaipo nin pagparigon sa boot na umiba sa panapanahon sa saindong pampamilyang pag-adal? An sarong payunir o parahayag tibaad nangangaipo nin sarong kaibaiba sa ministeryo. Taano ta dai magpresentar na mag-ibanan sa paglilingkod? Nagkapira ini sa mga paagi na boluntaryo kitang makagigibo nin marahay sa mga may relasyon sa sato sa pagtubod.—Gal. 6:10.
3 Ikapaheheling kan mga tugang na lalaki an saindang pagigin gikan sa boot paagi sa pagmamaigot na maabot an mga kualipikasyon para sa kamagurangan asin ministeryal na mga lingkod. (1 Tim. 3:2-10, 12, 13; Tito 1:5-9) Mantang padagos kitang nagdadakol, may pangangaipo para sa dugang pang kualipikadong mga tugang na lalaki na andam na mangenot sa paghuhulit asin pagtotokdo patin sa pagpapastor sa mga kongregasyon.—1 Tim. 3:1.
4 Tibaad an nagkapira sa sato puedeng magpresentar kan satong sadiri para sa paglilingkod ki Jehova nin orog pa paagi sa pagpalista bilang auxiliary payunir sa panapanahon. Siring man, paagi sa nagkapirang pagliliwat sa satong iskedyul, tibaad mahimo niatong mag-auxiliary payunir nin dagos-dagos o lumaog sa paglilingkod bilang regular payunir. Nasa kamugtakan daw kita na puedeng bumalyo sa sarong lugar na kun saen mas dakula an pangangaipo para sa tabang? An mga nagpresentar kan saindang sadiri para sa marahay na mga gibong ini pinahahalagahan na marhay, asin sinda mayaman na binendisyonan!—Luc. 6:38.
5 Kun si Jehova, paagi sa saiyang organisasyon, nag-iimbitar na makikabtang sa dinugangan na aktibidad sa Kahadean, marahay na hapoton niato an satong sadiri, ‘Gikan sa boot ko pa daw na ipinepresentar an sakong sadiri?’ An satong diosnon na debosyon pahihiroon kitang gibohon an bilog niatong makakaya sa sagradong paglilingkod, sa siring pinagagayagayang marhay an puso ni Jehova!—Sof. 3:17.