Magtrabaho Kaiba ni Jehova Kada Aldaw

1. Sa anong mga paagi puwede kitang magtrabaho kaiba ni Jehova?

MAWOT kan Kaglalang na makipagtabangan sa saiya an perpektong mga tawo tanganing maisagibo an saiyang mga katuyuhan. Sa ibong kan pagkabakong perpekto kan katawuhan, puwede pa man giraray magtrabaho kaiba ni Jehova an maimbod na mga tawo kada aldaw. Halimbawa, nagigi kitang “mga kapwa trabahador nin Diyos” paagi sa paghuhulit kan maugmang bareta kan saiyang Kahadian asin sa paggibo nin mga disipulo. (1 Cor. 3:5-9) Isipa na sana an satong dakulang pribilehiyo na ibilang na maninigo na makipagtabangan sa makakamhan sa gabos na Kaglalang kan uniberso sa sarong gibuhon na mahalaga sa saiya! Pero, an paghuhulit asin paggibo nin mga disipulo bako sana an mga paagi na nagtatrabaho kita kaiba ni Jehova. Pag-uulayan sa artikulong ini an iba pang mga paagi na magigibo ta iyan—pagtabang sa satong pamilya asin mga kapagtubod, pagigin mapag-istimar, pagboluntaryo sa teokratikong mga proyekto, asin pagpahiwas kan satong sagradong paglilingkod.—Col. 3:23.

2. Taano ta bakong madunong na ikumparar ta an nagigibo niyato sa nagigibo kan iba kun dapit sa pagsuportar sa mga katuyuhan ni Jehova?

² Sa pagtukar niyato, dai ipagkumparar an nagigibo mo para ki Jehova sa nagigibo kan iba. Tandaan na magkakaiba an edad, salud, mga kamugtakan, asin abilidad kan kada saro. Pinasabngan si apostol Pablo na sabihon: “Siyasaton kan lambang saro an sadiri niyang mga gibo, dangan magkakaigwa siya nin dahilan para mag-ugma sa mga nagibo niya, asin bako sa pagkumparar kan saiyang sadiri sa iba.”—Gal. 6:4.

TABANGAN AN SAIMONG PAMILYA ASIN MGA KAPAGTUBOD

3. Taano ta masasabi niyatong nakikipagtabangan sa Diyos an gabos na nag-aasikaso kan saindang pamilya?

³ Inaasahan ni Jehova na aatamanon kan saiyang mga lingkod an saindang pamilya. Halimbawa, tibaad kaipuhan mong magtrabaho para masustentuhan an saimong mga mahal sa buhay. Dakul na ina an nagpipirmi sa harong para atamanon an saindang umboy. Asin may mga adulto nang aki na tibaad kaipuhan na mag-ataman sa saindang mga magurang na maluya na an hawak. Kaipuhan gibuhon an mga bagay na ini. Sinasabi kan Tataramon nin Diyos: “Kun an siisay man dai nagtatagama para duman sa mga nasa pangangataman niya, asin lalo na para duman sa mga kabilang sa saiyang pamilya, isinikwal na niya an pagtubod asin mas maraot pa siya kisa sa tawong mayong pagtubod.” (1 Tim. 5:8) Kun igwa ka kan mga responsabilidad na iyan, posibleng marhay na dawa gusto mo, mayo ka nang gayong panahon para sa teokratikong mga aktibidad. Pero dai madisganar! Nauugma si Jehova pag inaasikaso mo an mga pangangaipo kan saimong pamilya.—1 Cor. 10:31.

4. Ano an puwedeng gibuhon kan mga magurang tanganing inuton an intereses kan Kahadian imbes na an saindang mga kagustuhan, asin ano an resulta kaiyan?

⁴ Nakikipagtabangan ki Jehova an Kristiyanong mga magurang pag tinatabangan ninda an saindang mga aki na magkaigwa nin teokratikong mga pasuhan. Ginibo iyan kan dakul na magurang asin pag-abot nin panahon, naglaog an saindang mga aki sa bilog na panahon na paglilingkod dawa harayo sa saindang harong. An iba mga misyonero; may mga nagpapayunir kun sain nangangaipo nin dakul na parahayag; an iba man naglilingkod sa Bethel. Huling harayo sa saindang pamilya, tibaad bihira na sindang magkairibanan bakong arog kan dati. Dawa arog kaiyan, an mapagsakripisyong mga magurang dinadagka an saindang mga aki na magdanay sa saindang asignasyon. Taano? Nakakamati sinda nin dakulang kagaya-gayahan asin satispaksiyon huling iniinot kan saindang mga aki an intereses kan Kahadian. (3 Juan 4) Tibaad namamatian kan dakul sa mga magurang na ini an namatian ni Hana, na nagsabi na “ipinasubli” niya ki Jehova an saiyang aking si Samuel. Para sa mga magurang na ini, an pakipagtabangan na iyan sarong mahalagang marhay na pribilehiyo. Mayo na sindang ibang gugustuhon pa.—1 Sam. 1:28, NW.

5. Anong praktikal na mga tabang an puwede mong maitao sa mga miyembro kan saindong kongregasyon? (Hilingon an ritrato sa kapinunan kan artikulo.)

⁵ Kun mayo kang gayong paninimbagan sa pamilya, puwede mo daw tabangan an mga kapagtubod mo na may mga kapamilyang inaataman asin an mga may hilang, may edad na, o an mga may iba pang pangangaipo? Aramon kun sairisay sa saindong kongregasyon an nangangaipo nin tabang. Tibaad may sarong sister na nag-aataman sa saiyang may edad nang magurang. Puwede daw na ika nguna an magbantay para maasikaso kan sister an iba pang bagay? O tibaad puwede mong tabangan an iba na makaatender sa mga pagtiripon, makapanaod, mag-asikaso sa mga bagay-bagay, o dalawon an sarong naospital. Sa paggibo kaiyan, tibaad nagtatrabaho ka na palan kaiba ni Jehova sa pagsimbag sa sarong pamibi.—Basahon an 1 Corinto 10:24.

MAGIN MAPAG-ISTIMAR

6. Ano an kalabot sa pagpahiling nin pagigin mapag-istimar?

⁶ An mga kapwa trabahador nin Diyos midbid sa pagigin mapag-istimar. Sa Kristiyanong Griegong Kasuratan, an terminong itrinadusir na “pagkamapag-istimar” nangangahulugan na “magin mabuot sa mga estranghero.” (Heb. 13:2; nota sa ibaba) May mga istorya sa Tataramon nin Diyos na nagtutukdo sa sato na magpahiling kita nin siring na pagkamuot. (Gen. 18:1-5) Kaya niyato asin dapat tang aprobetsaran an lambang oportunidad na tabangan an iba, sinda man “satuyang mga tugang sa pagtubod” o bako.—Gal. 6:10.

7. Ano an mga pakinabang kan pagigin mapag-istimar sa mga nasa bilog na panahon na paglilingkod na nangangaipo nin madadagusan?

⁷ Puwede ka daw magtrabaho kaiba nin Diyos paagi sa pagigin mapag-istimar sa mga nasa bilog na panahon na paglilingkod na nangangaipo nin madadagusan? (Basahon an 3 Juan 5, 8.) Sa parati, oportunidad iyan na mapakusog an lambang saro. (Roma 1:11, 12) Pag-isipan an eksperyensiya ni Olaf. Nagigirumduman niya na dakul na taon na an nakaagi, mayo sa saindang kongregasyon an puwedeng magpadagos sa paraataman nin sirkito, na soltero. Nagpaaram an hoben na si Olaf sa saiyang bakong Saksing mga magurang kun puwedeng magdagos sa harong ninda an paraataman nin sirkito. Nagtugot sinda pero sinabing sa sofa maturog si Olaf. Sulit an ginibong iyan ni Olaf. “Magayunon nanggad na semana idto!” an sabi ni Olaf. “Amay kaming nagmamata kada aga kan paraataman nin sirkito asin pinag-uulayan mi an dakul na interesanteng tema mantang nagpapamahaw. Huli sa pampakusog na itinao niya, nagkusog an pagmawot kong maglaog sa bilog na panahon na paglilingkod.” Sa nakalihis na 40 taon, naglingkod si Olaf sa manlain-lain na asignasyon bilang misyonero.

8. Taano ta marahay na magpahiling nin kabuutan dawa kun sa primero garo baga dai iyan pahalagahan? Magtao nin halimbawa.

⁸ Puwede kang magpahiling nin pagkamuot sa mga estranghero sa dakul na paagi dawa kun sa primero dai ninda pahalagahan an mga paghihinguwa mo. Pag-isipan an halimbawang ini. Mantang nagkokondukta nin Bible study, narisa nin sarong parahayag sa Espanya na sigeng hibi kan study niyang si Yesica, na taga Ecuador. Hinapot kan parahayag an dahilan. Sinabi ni Yesica na bago sinda nagbalyo sa Espanya, grabe an pagtios niya kaya sarong aldaw mayo na siyang kakanon. Tubig sana an kaya niyang maitao sa aki niyang babayi. Mantang pinapaturog niya an saiyang umboy, namibi siya para sa tabang. Dai nahaloy, may nagduman saiyang duwang Saksi, pero dai nagin mabuot si Yesica sainda saka ginirisi niya an magasin na iinalok kan mga sister. “Ini an gusto nindong ipakakan ko sa aki ko?” an hapot niya. Pinurbaran kan mga sister na rangahon siya, pero mayo iyan nagibo. Dangan, nagwalat sinda sa may pinto niya nin sarong basket na may mga kakanon. Napahiro an puso ni Yesica sa saindang kabuutan asin nagbabasol siya huling narealisar niyang binaliwala niya kaidto an simbag nin Diyos sa saiyang pamibi. Pero ngunyan, determinado na siyang maglingkod ki Jehova. Marahayon nanggad an nagin epekto kan saindang pagigin matinao!—Par. 11:1, 6.

MAGBOLUNTARYO SA TEOKRATIKONG MGA PROYEKTO

9, 10. (a) Magtao nin pirang pangyayari kan mga panahon kan Bibliya na diyan nangaipo nin mga boluntaryo sa banwaan nin Diyos. (b) Ano an pirang mahalagang gibuhon na inaasikaso nin mga lalaking andam na maglingkod sa kongregasyon ngunyan?

⁹ Sa kasaysayan kan suanoy na Israel, dakul na beses na nangaipo nin mga boluntaryo. (Ex. 36:2; 1 Cron. 29:5; Neh. 11:2) Ngunyan, dakul ka man nin oportunidad na itao an saimong panahon, materyal na pagsadiri, asin mga kakayahan para tabangan an saimong mga tugang. Asin makakamtan mo an dakulang kagaya-gayahan saka dakul na bendisyon sa pagigin andam na magtabang.

¹⁰ Dinadagka kan Tataramon nin Diyos an mga lalaki sa kongregasyon na magtrabaho kaiba ni Jehova paagi sa pag-abot nin mga pribilehiyo sa paglilingkod asin pangangataman. (1 Tim. 3:1, 8, 9; 1 Ped. 5:2, 3) An mga naggigibo kaiyan gustong magtabang sa iba sa praktikal na mga paagi asin sa espirituwal. (Gibo 6:1-4) Hinapot ka na daw kan mga elder kun gusto mong mag-attendant o tumabang sa pag-asikaso sa mga literatura, sa teritoryo, sa pagmentenar, o sa iba pang gibuhon? An mga nag-aasikaso sa siring na mga gibuhon makakapagsabi na nakakaugmang marhay an pagtabang sa iba.

11. Paano nakatabang sa sarong sister an nagin mga amigo niya mantang nagboboluntaryo sa mga proyekto nin pagtugdok?

¹¹ An mga nagboboluntaryo sa teokratikong mga proyekto sa parati nagkakaigwa nin bagong mga amigo. Hilinga an halimbawa ni Margie, na 18 taon nang nagtatrabaho sa mga proyekto sa pagtugdok nin Kingdom Hall. Sa paglihis nin mga taon, dakul na mas hoben na sister an sinanay niya. Nahiling niyang marahayon iyan na oportunidad tanganing mapakusog an espirituwalidad kan lambang saro. (Roma 1:12) Sa mga panahon na nasa kasakitan si Margie, rinanga siya kan mga nagin amigo niya sa mga proyekto nin pagtugdok. Nakapagboluntaryo ka na daw sa siring kaiyan na mga proyekto nin pagtugdok? May kasanayan ka man o mayo, puwede ka daw magboluntaryo?

12. Paano ka puwedeng makatabang sa pag-ayuda?

¹² Pag may kalamidad, nagkakaoportunidad an mga lingkod nin Diyos na magtrabaho kaiba Niya sa pagtabang sa praktikal na mga paagi sa saindang mga tugang. Halimbawa, nagtatao sinda nin tabang pinansiyal sa mga ini. (Juan 13:34, 35; Gibo 11:27-30) Saro pang praktikal na paagi iyo an pagtabang sa paglinig o paghirahay. Si Gabriela na taga Poland haros nagaba an bilog na harong huli sa baha. Pero naugma siya kan magsukuro na an mga tugang hali sa kaharaning mga kongregasyon. “Habo kong pag-ulayan an mga nawara sako—materyal na mga bagay lang idto,” an sabi niya. “Imbes, gusto kong sabihon saindo kun ano an mga nakamtan ko. Napakusog ako kan eksperyensiyang ini na an pagigin parte kan Kristiyanong kongregasyon sarong pambihirang pribilehiyo saka gikanan nin dakulang kaugmahan.” Sinasabi kan dakul na nag-aako nin tabang pagkatapos nin kalamidad na arog man kaiyan an namamatian ninda. Asin an mga nagtatrabaho kaiba ni Jehova sa pagtao nin siring na tabang nakakamati man mismo nin dakulang kaugmahan.—Basahon an Gibo 20:35; 2 Corinto 9:6, 7.

13. Paano puwedeng mapakusog kan pagboboluntaryo an satong relasyon ki Jehova? Magtao nin halimbawa.

¹³ Si Stephanie asin an iba pang mga parahayag nagkaoportunidad na magtrabaho kaiba nin Diyos paagi sa pagtabang sa mga Saksing refugee sa Estados Unidos. Nagtabang sinda sa paghanap asin pagpakarhay nin mga harong para sa mga pamilyang nagdulag huli sa giyera. “Napahiro an samong puso kan saindang kagaya-gayahan asin pasasalamat huli sa pagkamuot kan pambilog na kinaban na kasararuan nin magturugang,” an sabi ni Stephanie. “Iniisip kan mga pamilya na natabangan mi sinda, pero an totoo, mas natabangan ninda kami.” Sinabi pa niya, “An pagkamuot, pagkasararo, pagtubod, asin pagtitiwala ki Jehova na nahiling mi mismo nakapakusog nanggad sa pagkamuot mi ki Jehova, asin mas napararom kaiyan an pagpapahalaga mi sa gabos na inaako ta paagi sa saiyang organisasyon.”

PAHIWASON AN SAIMONG PAGLILINGKOD

14, 15. (a) Anong sabuot an ipinahiling ni propeta Isaias? (b) Paano maaarog kan mga parahayag kan Kahadian ngunyan an sabuot ni Isaias?

¹⁴ Gusto mo daw na urog pang magtrabaho kaiba ni Jehova? Andam ka daw na magbalyo tanganing maglingkod sa saiya sa lugar na nangangaipo nin dakul na trabahador? Siyempre, dai man kaipuhan kan mga lingkod nin Diyos na magbiyahe nin harayo para magpahiling nin pagkamatinao. Pero may mga tugang na nasa kamugtakan na magboluntaryo sa hararayong lugar. An sabuot ninda kaagid kan ki propeta Isaias. Hinapot siya ni Jehova: “Siisay an susuguon ko, asin siisay an maduman para sa samo?” Nagsimbag siya: “Uya ako! Sugua ako!” (Isa. 6:8, NW) Mawot mo daw asin nasa kamugtakan ka daw na sumimbag nin arog man kaiyan kun dapit sa teokratikong mga pangangaipo? Anong mga pangangaipo an igwa ngunyan?

¹⁵ May koneksiyon sa paghuhulit asin paggibo nin mga disipulo, sinabi ni Jesus: “Kadakul kan aanihon, pero kakadikit kan paraani. Kun siring, makimahirak kamo sa Kagurangnan kan pag-ani na magsugo nin mga trabahador sa saiyang pagpaani.” (Mat. 9:37, 38) Puwede ka daw maglingkod sa teritoryong dakula an pangangaipo, tibaad bilang payunir? O puwede mo daw tabangan an iba na magibo iyan? Para sa dakul na tugang, an pinakamarahay na paagi na maipapahiling an pagkamuot sa Diyos asin kapwa iyo an pagpayunir sa mga lugar o teritoryo na dakula an pangangaipo para sa mga paraani. May naiisip ka daw na iba pang mga paagi para mapahiwas o madagdagan an saimong paglilingkod? Kun gigibuhon mo iyan, dakulang kagaya-gayahan an mamamatian mo.

16, 17. Kun gusto mong pahiwason pa an saimong paglilingkod ki Jehova, anong mga oportunidad an bukas para sa saimo?

¹⁶ Andam ka daw na maglingkod sa Bethel o tumabang sa pagtugdok nin teokratikong mga pasilidad, magsalang temporaryong trabahador o commuter? Pirming kaipuhan an mga indibidwal na makakapaglingkod ki Jehova sain man sinda iasignar asin ano man an iasignar sa sainda. Puwede ining mangahulugan na kakaipuhanon nindang magtrabaho sa sarong asignasyon na may espesipikong pangangaipo, dawa bako man iyan an linya ninda. Pero, inaapresyar ni Jehova an pagigin mapagsakripisyo kan mga indibidwal na nagboboluntaryo kun sain may pangangaipo.—Sal. 110:3.

¹⁷ Mawot mo daw na magkaigwa nin dugang na pagsasanay tanganing magin mas epektibo sa saimong sagradong paglilingkod? Kun iyo, tibaad kuwalipikado kang magklase sa School for Kingdom Evangelizers. Sinasanay digdi an espirituwal an kaisipan na mga lalaki asin babaying nasa bilog na panahon na paglilingkod tanganing magamit sinda kan organisasyon ni Jehova sa mas dakul na paagi. An mga gustong magklase digdi kaipuhan na andam na gibuhon an ano man na asignasyon na itao sa sainda pakagradwar ninda. Andam ka daw na aprobetsaran an oportunidad na ini na mag-abot nin dagdag na mga pribilehiyo sa paglilingkod?—1 Cor. 9:23.

18. Ano an makakamtan mo sa pagtrabaho kaiba ni Jehova kada aldaw?

¹⁸ Bilang banwaan ni Jehova, napapahiro kitang magin matinao—na ebidensiya nin karahayan, kabuutan, asin pagkamuot—asin magin matinabang sa iba kada aldaw. Kun ginigibo ta iyan, kita nagigin magaya-gaya, matuninong, asin maugma. (Gal. 5:22, 23) Ano man an saimong kamugtakan, magigin maugma ka paagi sa pag-arog sa pagigin matinao ni Jehova asin paagi sa pagigin saro sa pinapahalagahan niyang marhay na mga kapwa trabahador!—Tal. 3:9, 10.