Kultibaron an Interes sa Librong Mabuhay Sagkod Lamang
1 Kun nagdadalaw kita sa saindang harong, parateng nanonompongan niato na an mga tawo bangkag sa “mga kahaditan sa palakaw na ini nin mga bagay.” (Mar. 4:19) Sa primero, an kadaklan na tawo kakadikit an interes sa satong mensahe. Kun makakasabi kita nin sarong bagay na makakapahiro sa saindang buhay, puwedeng makapukaw kita nin interes sa mensahe kan Kahadean. An liyabe sa pagpoon nin mga pag-orolay iyo na pumili nin nakakaakit na mga punto sa librong Mabuhay Sagkod Lamang. Ano daw an puwedeng sabihon nindo?
2 Puwede nindong gamiton an paaging ini:
◼ “Kun igwa kamo kan kapangyarihan, anong problema sa satong kaaldawan an itatanos nindo? [Pasimbagon.] Sagkod ngonyan, an mga namomoon sa kinaban nagkaigwa nin dikit na kapangganahan sa paghanap nin mga solusyon sa mga problema kan aldaw. Pero igwa nin Saro na matapos sa gabos na problema na nagpapasakit sa katawohan. Mangnoha an sinasabi sa Salmo 145:16. [Basahon an teksto, asin buksan an mga ilustrasyon sa pahina 11-13.] An parapo 14 sa pahina 14 nagpapalataw kan hapot na pinag-olayan pa sana niato asin naghahapot: ‘Alagad ta noarin ini mangyayari?’” Ipaliwanag na sisimbagon kan libro an hapot na iyan, asin ialok an libro.
3 O puwede nindong sabihon an siring kaini:
◼ “Tibaad aram nindo an pakamate nin pagkadaing halaga huli sa pagkagadan nin sarong namomotan. Posibleng ginibo kamo kaiyan na mamondo asin mayo nanggad nin maginibo. Puwedeng hinorophorop nindo an mga hapot na ini: [Basahon an mga hapot sa parapo 1 sa pahina 76.] Bako daw na nakakaranga na magkaigwa kan mga simbag sa mga hapot na ini? An Biblia nagtatao nin sarong seguradong paglaom para sa mga nagadan. [Basahon an Juan 5:28, 29.] Tinatabangan kita kan librong ini na masabotan an kamugtakan kan mga gadan asin kun ano an paglaom para sa ngapit.” Ialok an libro.
4 Daing duwa-duwa na magkakaigwa kamo nin mga oportunidad na impormal na makapatotoo. Kun igwa, puwede kamong magsabi nin arog kaini:
◼ “An kinaban pano-pano nin problema ngonyan na mga aldaw, asin daing duwa-duwa na igwa man kamo kan mga iyan. Makamomondong sabihon, garo baga an mga mayong sala an pinakanasasakitan. Sa paghona daw nindo tatapuson pa nin Dios an kasakitan? [Pasimbagon.] Mangnoha an ipinanunuga nin Dios na gigibohon sa mga naglilingkod sa saiya. [Basahon an Salmo 37:40 dangan buksan an librong Mabuhay Sagkod Lamang sa pahina 99.] An librong ini nagpapaliwanag kun taano ta tinotogotan nin Dios an karatan asin kun paano nia tatapuson iyan.”
5 Kun kamo sarong mas hoben na parahayag, puwede kamong gumamit nin pag-atubang basado sa mga ilustrasyon sa pahina 156-8. Puwede kamong pumoon paagi sa paghapot:
◼ “Boot daw nindong mabuhay sa sarong kinaban na arog kaini? [Pasimbagon.] An kada saro sa magagayon na retratong ini basado sa panuga na sinasabi sa Tataramon nin Dios, an Biblia. [Itokdo an mga reperensia sa Kasuratan.] An librong ini makakatabang saindo na makanood nin dakol pa manongod sa panuga nin Dios na gibohon an bilog na daga na magin sarong paraiso. Iyan igwa nin nagliligtas-buhay na impormasyon asin kapakipakinabang an panahon na kaipuhan sa pagbasa kaiyan.”—Juan 17:3.
6 Gamiton niato gabos an librong Mabuhay Sagkod Lamang ngonyan na Setyembre sa pagkultibar nin interes sa maogmang bareta kan Kahadean.