Ginagamit daw Nindo an Librong Reasoning?
1. Paano nagtokdo sa iba si apostol Pablo asin si Jesus?
1 Naghingoa si apostol Pablo na ‘mangatanosan basado sa Kasuratan.’ (Gibo 17:2, 3; 18:19) Sa paggibo kaiyan, inarog nia si Jesus, na parateng nagkokotar sa Kasuratan asin naggagamit nin mga ilustrasyon tanganing tabangan an mga naghihinanyog sa saiya na masabotan an kabotan nin Dios. (Mat. 12:1-12) An librong Reasoning From the Scriptures dinisenyo tanganing tabangan kitang gibohon man iyan.
2. Paano niato magagamit an librong Reasoning sa pag-andam nin epektibong mga introduksion?
2 Pag-andam nin Epektibong mga Introduksion: An Reasoning From the Scriptures igwa sa pahina 9-15 nin mga introduksion na nakakapukaw nin interes. An pakanood asin paggamit nin laen-laen na introduksion, nangorogna kun parate nindong nahuhulitan an teritoryo, makakatabang na magin laen-laen an paagi nin pagdolok nindo sa mga tawo sa saindong ministeryo, asin makakatabang man iyan sa saindo na magin mas maabilidad asin mas epektibo sa pagpoon nin mga pakikipag-olay. An mga introduksion puedeng basahon nin direkta sa libro kun nagpapatotoo paagi sa telepono o kun nakikipag-olay paagi sa intercom sa mga edipisyo na guardiadong marhay.
3. Ano an yaon sa pahina 16-24 kan librong Reasoning na makakatabang sa sato sa ministeryo?
3 Pagsimbag sa Pagsayuma: Taano ta dai nindo antisiparon an puedeng magin pagsayuma nin mga tawo sa saindong teritoryo asin repasohon nin pirang minuto bago maghulit an pahina 16-21 dapit sa kun ano an puede nindong isimbag? Posibleng marhay daw na may mga kagharong na Budista, Hindu, Judio, o Muslim? Kun iyo, makakatabang an impormasyon sa pahina 21-24.
4. Paano niato magagamit an librong Reasoning kun may maghapot o magpalataw nin kontrobersial na tema?
4 Pagsimbag sa mga Hapot: Makakatabang man sa sato an librong Reasoning kun may maghapot o magpalataw nin kontrobersial na tema. Puede nindong sabihon sana sa kaolay nindo na gusto nindong ipaheling sa saiya an sarong interesanteng bagay dapit sa temang iyan asin kuanon an saindong libro na Reasoning. Huling an mga tema nakalista na alpabetiko an pagkasunodsunod, bukasan an pangenot na titulo na sa paghona nindo yaon an impormasyon na kaipuhan nindo. Dangan helingon nin madali an mga hapot na nasa mas maitom na letra. Kun dai tolos nindo maheling an hinahanap nindo, bukasan an indise sa likod. Kun maheling na nindo an angay na impormasyon, basahon iyan nin direkta sa publikasyon. Kun ipinapakipag-olay nindo an sarong espesipikong teksto, tibaad makua nindo sa pahina 445 an kaipuhan nindo, sa titulong “Scriptures Often Misapplied.”
5. Ano an nagkapira pang pakinabang sa paggamit kan librong Reasoning?
5 Iba Pang Pakinabang: An nagkapira igwa nin kopya kan librong Reasoning sa saindang pinagtatrabahohan o sa eskuelahan tanganing matabangan sindang simbagon an mga hapot na arog baga kan, ‘Taano ta dai kamo nagseselebrar nin mga kapiestahan?’ An impormasyon sa mga titulong “Creation” asin “Evolution” nakakatabang para sa mga hoben sa pag-andam nin mga report sa eskuelahan. Madalaw daw kamo sa saro na may helang o nagadanan nin namomotan? An impormasyon sa titulong “Encouragement” puedeng makatabang sa saindo na magtao nin karangahan basado sa Kasuratan. An librong Reasoning igwa man nin nakakatabang na impormasyon para sa mga nag-aandam nin mga pahayag asin namamayo sa mga pagtiripon bago maglingkod sa langtad.
6. Ano an pasohan niato kun naghuhulit?
6 Kun naghuhulit, an pasohan niato bakong manggana sa mga argumento ni magpaabot sana nin impormasyon. Gusto niatong mangatanosan nin eksperto basado sa Kasuratan. Mantang epektibo tang ginagamit an librong Reasoning, ipinapaheling niato na pirme tang tinatawan nin atension an satong pagtotokdo.—1 Tim. 4:16.