Namitan an mga Pakinabang sa Librong Reasoning
1 Kanigoan kadakulang gibohon an ipinagigibo ni Jehova sa saiyang nagdusay na banwaan sa huring mga aldaw na ini! (Mat. 24:14; 28:19, 20) Kanigoan an pagpasalamat niato sa tabang nin mga anghel sa pagpahayag kan maogmang bareta!—Kap. 14:6, 7.
2 Kaipuhan an tunay na paghihingoa tanganing maabot an puso nin mga tawo sa “lambang nasyon asin tribo asin tataramon.” Alagad paagi sa saiyang daganon na organisasyon, itinao ni Jehova an kinakaipuhan na tabang na magibo ini. An saro sa mga probisyon na ini iyo an librong Reasoning From the Scriptures, na may abundang impormasyon sa 76 na tema na magagamit sa pakikipag-olay sa gabos na klase nin tawo.
3 Daing duwa-duwa na an pag-adal sa librong ini sa Teokratikong Paadalan sa Pagmiministro nagtatao saindo nin espirituwal na pakinabang. Alagad naghihingoa daw kamong gamiton an impormasyon na ini sa saindong ministeryo? Nag-ooswag daw kamo sa saindong abilidad na mangatanosan sa mga tawo? Nabareta na an dakol na parahayag dai naggagamit kan librong Reasoning, asin an iba dai nagdadara kaiyan sa ministeryo. Taano daw? Tibaad huli ta dai sinda pamilyar sa mahahalagang kabtang kan libro. An dakol na naggamit kan librong Reasoning nadiskobre na iyan nagtatao nin simbag sa kadakol na hapot nin mga tawo.
4 An saro sa mga kabtang kaiyan iyo an indese magpoon sa pahina 439. Dai kaiyan ilinilista an gabos na kabtang kan kada tema, pero iyan nagtatao nin dakol na reperensia na maheheling nindong kapakipakinabang sa pag-atubang sa nagkapirang situwasyon.
5 Halimbawa, tibaad makanompong kita nin mga tawo na naghihingoang halean nin halaga an Biblia. Tibaad ihapot ninda, “Saen kinua ni Cain an saiyang agom?” Minsan ngani dai nindo manonompongan ini sa “Principal Subjects” sa kapinonan kan libro, kun hehelingon nindo an “Cain” sa indese, maheheling nindo na an simbag yaon sa pahina 301-2. O tibaad may magsabi na an Dios nin pagkamoot dai manlalaglag sa maraot. Kun hehelingon nindo an “Love” sa indese, itotokdo kamo sa pahina 48, na dian manonompongan nindo an paagi na makipagrasonan sa tawo.
6 An saro pang nakatatabang na kabtang, na yaon sa pahina 445, iyo an “Scriptures Often Misapplied.” Tibaad probaran nin sarong kagharong na gumamit nin teksto sa Biblia sa pagsuportar sa sarong falsong paniniwala. Tibaad sitaron nia an 1 Tesalonica 4:13-18 sa pagsuportar sa saiyang paniniwala na may mga maduruman sa langit na dai nagagadan digdi sa daga. Itinotokdo kita sa pahina 312 para sa paliwanag sa mga bersikulong ini. Kun may magsabi na an daga sosoloon, na ginagamit an 2 Pedro 3:7, an nagpapaliwanag na impormasyon makukua sa pahina 113 asin 436. Kaya kun hinahagad saindo na ipaliwanag an sarong teksto, helingon kun baga iyan nalilista sa kabtang na ini kan libro.
7 An hoben asin gurang puwedeng makinabang sa librong ini. Magin pamilyar sa 41 introduksion sa pahina 9-15 asin sa 47 simbag sa mga pagtumang sa pahina 15-24, asin pagmaigotan na gamiton iyan sa ministeryo. Iyo, padagos niatong gamiton an saro sa pinakamahalaga niatong instrumento, an librong Reasoning.