Pag-aatubang kan Maogmang Bareta—Paagi sa Lubos na Paggamit kan Librong Reasoning
1 “Marahay pa kutana kun dara ko an libro kong Reasoning!” Nagsabong na daw ini sa saindong isip mantang hinihingoa nindong simbagon an sarong hapot sa Kasuratan na naaatubang nindo sa ministeryo o mantang nagpapatotoo nin impormal sa trabaho o eskuwelahan? An mga tawong pamilyar sa librong Reasoning asin nagdadara kaini nakuang malalaoman iyan para sa tabang sa tamang panahon. Kumusta naman kamo?
2 Mantang an librong Reasoning ilinuwas kan 1985, an haros lambang luwas kan An Satong Ministeryo sa Kahadean nagtao nin ekselenteng suhestion kun paano gagamiton iyan. Igwa nin mga demonstrasyon na nagpapaheling kun paano magagamit iyan nin mga magurang sa pagtabang sa saindang pamilya na mag-andam sa paglilingkod, sarong magurang na nagtatabang sa sarong hoben na nawiwili sa kinaban, asin mas makokosog na parahayag na nagtatabang sa nangangaipo nin pagdagka. An ibang mga artikulo nagtao nin praktikal na mga suhestion kun paano iyan gagamiton sa kada lado kan satong ministeryo.
GINAGAMIT DAW NIATO IYAN NIN LUBOS?
3 Tanganing epektibong magamit an librong Reasoning, enot dapat na magin pamilyar kita sa mga laog kaiyan. Dangan gumibo nin paghihingoa na gamiton an mga suhestion kaiyan. Prinobaran na daw nindong gamiton an irinekomendar na introduksion sa presenteng Topikong Mapag-oolayan? Kun gamiton nindo an ikaduwang suhestion sa irarom kan “Kingdom” sa pahina 12 (p. 11 sa Tagalog) asin gamiton sa madale an Kapahayagan 21:3-5, dangan rasonable nindong ikakaluwas an tema kan satong Topiko, “Siisay an Satong Sasambahon?”
4 Paagi sa paggamit kan materyal sa seksion na “Conversation Stoppers,” mapapangganahan niato an patienot na pagkontra. Halimbawa, kun an tawo nagsasabi “Dai ako interesado,” magagamit niato an ikaapat na suhestion sa pahina 16, kutaron an Kapahayagan 14:7, dangan idoon na an kasuratan na ini nagpukaw saindo sa pangangaipong ipamidbid asin sambahon an tunay na Dios. Probaran iyan. Nagin mapanggana an iba sa paggamit nin mga ekspresyon na siring kaini.
5 Totoo, kadakol na mga bendisyon an makakamtan sa paggamit kan librong Reasoning. Kun tawan niato nin panahon an pag-andam nin bagong mga pagdolok asin mga introduksion na makakawili sa partikular niatong kaolay, magigin orog kaentusiastiko kita sa pagluwas sa langtad, minsan sa mga teritoryong parateng ginigibo. Taano ta dai gumamit nin panahon na repasohon an nagkapira sa nakaaging mga artikulo na nagtao nin mga suhestion kun paano epektibong gagamiton an librong Reasoning?—km 4/87 p. 4; km 1/88 p. 4.
6 Logod bendisyonan ni Jehova nin lubos an saindong paghihingoa na buksan sa iba “an makangangalas na mga bagay nin Dios”! (Gibo 2:11) Dangan tibaad makikabtang sinda sa pagsabi ki Jehova, siring kan salmistang si David: “Sa sakuya kanigoan kamahalaga an saimong mga kaisipan!”—Sal. 139:17.