Kun Paano Mapaooswag an Abilidad sa Pangangatanosan
1 An sarong pakahulogan kan tataramon na “pangangatanosan” iyo an “pagkaolay sa saro tangani na impluwensiahan an saiyang mga hiro-hiro o opinyon.” Tanganing mapaoswag an saindong pagigin epektibo sa ministeryo, kaipuhan nindong kultibaron an abilidad na mangatanosan sa mga nanunuparan nindo. (Gibo 17:2-4) Alagad paano nindo mapaooswag an abilidad na ini?
2 Nagpopoon Iyan sa Paghorophorop: Kun nag-aadal kan mga katotoohan sa Biblia, manonompongan nindong nakatatabang an paghorophorop sa materyal. Kun an mga punto garo baga medyo komplikado, magtao nin panahon na magsiyasat asin horophoropon an mga simbag. Hingoahon na masabotan nin malinaw bako sanang an mga paliwanag na itinatao kundi siring man an mga rason sa Kasuratan para sa mga paliwanag na iyan.
3 Kalabot an Pag-andam Para sa Ministeryo: Isip-isipon kun paano nindo ipaliliwanag an katotoohan sa manlaenlaen na klase nin mga tawo. Gumibo nin nakapupukaw sa isip na hapot tangani na animaron an interes. Determinaran kun paano ikokonektar an sarong Makakasuratan na punto asin mangatanosan manongod dian. Antisiparon an mga pagkontra na puedeng palatawon, asin isip-isipon kun paano iyan ipakikipag-olay. Itokdo sa publikasyon na iinaalok an sarong tampok na kabtang na aplikadong marhay.
4 Sunodon an Halimbawa ni Jesus: Itinao ni Jesus an pinakamarahay na arogan nin epektibong pangangatanosan gikan sa Kasuratan. Tanganing analisaron kun paano sia nagtokdo, konsideraron an pagkasaysay na yaon sa Lucas 10:25-37. Mangnohon an paaging ini: (1) Darahon an atension sa Kasuratan kun sinisimbag an mga hapot nin mga tawo. (2) Agdahon sinda na magpahayag kan saindang sadiri, asin komendaran sinda kun may pakamansay an saindang komento. (3) Siertohon na danay na ikinadodoon an koneksion kan hapot asin kan Kasuratan. (4) Gumamit nin ilustrasyon na nakaaakit sa puso tangani na masierto na nasasabotan an tunay na kahulogan kan simbag.—Helingon an Watchtower na Marso 1, 1986, pahina 27-8, parapo 8-10.
5 Gamiton an Kasangkapan na Itinao sa Sato: An Reasoning From the Scriptures ipinublikar bilang sarong manwal para sa ministeryo sa langtad. An mga introduksion, mga simbag sa mga habong makipag-olay, asin mga punto nin pangangatanosan kaiyan nakatatabang sa sato na mapaoswag an abilidad sa pangangatanosan. An librong Reasoning sarong mahalagang kasangkapan na maninigo niatong pirmeng darahon sa paglilingkod asin dai mag-alangan na gamiton kun nakikipag-olay manongod sa Biblia. Repasohon an pahina 7-8 kan libro tangani na maheling kun paano iyan gagamiton sa pinakakapakipakinabang na paagi.
6 An pagpaoswag sa saindong abilidad sa pangangatanosan makadadagdag sa saindong abilidad sa paghuhulit asin pagtotokdo. Ini maresulta sa mayaman na mga bendisyon para sa saindo asin sa mga nanunuparan nindo sa ministeryo.