Magin Bilog na Kalag sa Ministeryo sa Langtad
Kabtang 2: Pagpakosog sa Entusiasmo
1 Mas pasil na magin entusiastiko sa sarong gibohon kun iyan ikinaoogma niato. Totoo man na an saro naoogma sa sarong bagay na saiyang pinag-andaman. Iyan totoo nanggad sa lubos na pag-otob kan satong ministeryo.—2 Tim. 4:5.
KAIPUHAN AN PAG-ANDAM
2 An satong entusiasmo depende sa kun gurano karahay kan satong pag-andam. Halimbawa, kun manompongan niato an sarong Muslim sa paglilingkod, ano daw an masasabi niato? An nakapag-andam nin igong parahayag tibaad magsabi: “Pambihira iyan. Pipira pa sanang Muslim an nakaolay ko. Pero may nabasa ako manongod sa saindong mga katokdoan sa librong ini. [Bukasan sa pahina 23 kan librong Reasoning.] Sinasabi kaiyan na kamo nagtutubod na si Jesus propeta pero si Muhammad an pinakamahalagang propeta. Bako daw? [Pasimbagon.] Ano nagtutubod man kamo na si Moises tunay na propeta? Puwede ko daw na ipaheling saindo sa Banal na Kasuratan kun ano an nanodan ni Moises manongod sa personal na ngaran nin Dios?” Dangan puwede nindong basahon an Exodo 6:3, sa siring napoponan an marahay na orolay.
3 Masakit para sa dakol sa sato na magirumdoman an mga pahina. Pero paagi sa kadikit na pag-andam asin praktis, puwede niatong gamiton an kabtang na inaapod “Conversation Stoppers” sa librong Reasoning.
4 An librong Reasoning igwa man nin marahayon na kabtang manongod sa mga introduksion. Taano ta dai gamiton an mga ini? Tibaad kaipuhan na iangay niato an satong pag-aatubang sa situwasyon. Sa poro kan dakol na tema sa librong Reasoning, may kabtang na “If Someone Says,” na nagtatao nin mga simbag sa espisipikong mga hapot o pagtumang sa temang iyan. Pero mahalaga sana an materyales na ini kun iyan gagamiton niato sa satong pag-andam.
KUN PAANO MAG-AANDAM
5 Mag-alisto kun may mga demonstrasyon sa Pagtiripon sa Paglilingkod, na dara an mga publikasyon na idinidemonstrar. Sa siring, mas makikinabang kamo sa pag-andam nin iba.
6 Tawan nin kadikit na panahon an pag-andam para sa paglilingkod. Siertohon na igwa kamo kan babasahon na kaipuhan nindo. Helingon nin pirang minuto an Topikong Mapag-oolayan. Repasohon an mga teksto asin humanap nin mga puntong ipakikipag-olay sa iaalok na babasahon. Makatatabang an iribang paggibo kaini bilang pamilya.
7 Magkaigwa nin mga pagpraktis. Magigibo nindo ini pakatapos kan pag-adal sa libro, sa sosyal na mga pagtiripontipon, asin sa pag-oltanan nin mga harong. An pagtao nin mga pag-aatubang asin pagpaheling kun paano aatubangon an mga pagtumang puwedeng makapaoswag kan satong abilidad.
8 An maigot na pag-andam mapakosog sa satong entusiasmo tangani kitang magin ekspertong mga trabahador asin mag-ani nin magayagayang satispaksion.—Juan 2:17.