Lubos na Omawon an Ngaran nin Dios
1 Kanigoan an satong paggayagaya sa kadakol na bendisyon ni Jehova! Nagkaigwa kita nin pinakahalangkaw na mga bilang nin parahayag asin inaadalan sa Biblia. Nagkaigwa man nin marahayon na bilang nin nag-atender sa Memorial na 332,830. Kita gabos nakinabang sa abundang espirituwal na kakanon sa mga programa kan satong pansirkitong asamblea asin espesyal na aldaw nin asamblea.
2 Paano daw niato ikapaheheling an pag-apresyar sa gabos na bendisyon na ini? Paagi sa lubos na pag-omaw sa ngaran nin Dios!—Sal. 145:21.
PADAGOS NA OMAWON AN NGARAN NIN DIOS
3 Maoomaw niato nin lubos an ngaran ni Jehova paagi sa pag-alok sa mga tawo kan librong Young People Ask. An Topikong Mapag-oolayan manongod sa “An Solusyon sa mga Problema nin Hobenes” angay kapwa sa mga magurang asin hobenes. Kun mga magurang an kaolay, tibaad boot nindong ipaliwanag na an ginigibo nindo paglilingkod sa publiko tanganing matabangan an mga tawo na maatubang an mga problema sa aroaldaw. Itokdo an sarong halimbawa nin praktikal na hatol na yaon sa libro.
4 Kun mga hobenes an kaolay, magin makikatood asin tratohon sindang may dignidad. Pakatapos kan saindong introduksion, puwede nindong ipakipag-olay an manongod sa impluwensia nin mga kaedad asin ihapot saiya, ‘Naisip-isip mo na daw kun paano mo maaatubang an siring na impluwensia kan saimong mga kaedad?’ Pakasimbag nia, buksan an libro sa kapitulo 9, tibaad binabasa an sarong parapo sa pahina 77. Sa konklusyon puwede nindong sabihon, ‘Ipaheheling saimo kan librong ini kun paano an Biblia makatatabang sa mga hobenes na maatubang an masakit na mga situwasyon, arog kan mga yaon sa lista nin mga laog.’
MAG-ANDAM NIN IGO
5 Kaipuhan an pag-andam tangani kitang magin epektibo sa pagtokdo sa iba. Taano ta dai mag-andam kaiba an iba sa saindong pamilya o an saro na kabilang sa saindong grupo sa pag-adal? Paagi sa pagpraktis kan saindong pag-aatubang, magigin kamong mas kompiado kun nakikipag-olay sa mga tawo sa saindong teritoryo.
6 An satong mga pag-aatubang maninigong magparisa kan satong interes sa mga tawo. Kun akoon kan kagharong an libro, tibaad boot nindong idemonstrar kun paano iyan magagamit na pantabang sa pag-adal sa Biblia asin iareglong bumuwelta. Pakalihis nin pirang orolay, tibaad puwedeng iintrodusir an saro pang librong mapag-aadalan. Mantang ini ginigibo niato nin maimbod, matatabangan niato an iba na makanood na lubos na omawon an ngaran ni Jehova.