An Gabos Puwedeng Makikabtang
1 Nadangog ni apostol Juan an 24 kamagurangan sa kalangitan na nag-oomaw sa Dios, na an sabi: “Angay ka, Jehova, . . . na mag-ako kan kamurawayan asin dangog patin kapangyarihan.” (Kap. 4:11) An gabos na lingkod ni Jehova ngonyan makapamumuraway sa Dios paagi sa kaagid na mga tataramon nin pag-omaw. (Sal. 148:1, 12, 13) Magigibo niato ini sa Agosto asin Setyembre paagi sa paggamit sa laen-laen na Topikong Mapag-oolayan asin pag-alok kan saro sa isinusuherir na mga pulyeto, arog kan minasunod:
AN PULYETONG GOVERNMENT
2 Pakapagpamidbid, puwede nindong sabihon: “Dakula an tinios nin katawohan sa bilog na kasaysayan. Ano daw sa paghona nindo an dahelan kaini? [Pasimbagon.] Ipinaheheling kan Biblia na dai kaya nin tawo na pamahalaan nin marahay an saiyang sadiri. [Basahon an Eclesiastes 8:9.] Kaya imposible para sa mga tawo na magpatindog nin gobyerno na magtatao nin nagdadanay na kaogmahan. Solamente an Dios an makagigibo kaiyan. Helinga tabi kun ano an gigibohon kan gobyerno nin Dios.” [Basahon an Miqueas 4:3, 4.] Tapuson sa pagsabi: “Tanganing matabangan kamo na makasabot kun paano ipaaabot kan gobyerno nin Dios an paraiso, puwedeng mapasaindo an pulyetong ini sa kontribusyon na ₱4.20. Helinga tabi an sinasabi kaiyan digdi sa pahina 3.” Basahon an parapo.
AN PULYETONG DIVINE NAME
3 An sarong marahay na paagi nin pag-omaw sa Dios iyo an pagpamuraway sa ngaran niang Jehova. Pakapamidbidan kan ngaran nindo, puwede nindong sabihon: “Nakaolay ko an pagtaraed nindo manongod sa halaga kan paggamit sa ngaran nin Dios. Narisa daw nindo na kakadikit kan mga tawo ngonyan na naggagamit sa ngaran nin Dios? [Pasimbagon.] Pero kan si Jesus yaon sa daga ipinamidbid nia an ngaran nin Dios. [Basahon an Juan 17:26.] Sinasabi kan Biblia sa Salmo 83:18 na an ngaran nin Dios Jehova.” Basahon an teksto dangan buksan an pulyeto sa pahina 31 asin sabihon: “Helinga tabi an mga komentong ini manongod sa halaga nin pakamidbid sa ngaran nin Dios. [Basahon an parapo 1.] Puwedeng mapasaindo an kopyang ini sa kontribusyon na ₱4.20.”
4 Kun kinakaolay niato an tawo kaipuhan na mansayan niato kun saen sia interesado asin ialok saiya an angay na pulyeto, na iinaangay an satong pag-aatubang. Kita logod gabos magin mapanggana sa pag-alok nin mga pulyeto sa Agosto asin Setyembre.